Isaia 14:1-32
14 O le a alofa mutimutivale Ieova iā Iakopo,+ ma e toe filifilia foʻi e ia Isaraelu;+ o le a ia tuuina atu iā i latou le mapusaga i lo latou laueleele,+ ma e aufaatasi atu ma i latou tagata ese e aumau, e latou te faatasi atu foʻi i le aiga o Iakopo.+
2 O le a toe faafoʻi i latou e tagata o isi nuu i lo latou lava laueleele, ma o le a fai e le aiga o Isaraelu tagata mo i latou lava i le laueleele a Ieova, e fai ma auauna tane ma auauna teine;+ e latou te faapagotaina o ē sa faia i latou ma pagota,+ e latou te pule foʻi i ē sa faamalosia i latou e faia galuega.+
3 O lea aso, pe a tuuina atu e Ieova iā te oe le mapusaga mai i lou tigā ma lou atuatuvale ma galuega mamafa i le taimi sa e nofo pologa ai,+
4 e te lāgā ai se faaupuga faasaga i le tupu o Papelonia e faapea:
“E! Ua taofia lē sa faamalosia isi e fai galuega, ma ua faamutaina sauāga!+
5 Ua gausia e Ieova le tootoo o ē e amioleaga, o le laau a ē e pule,+
6 o lē ua taia tagata i le maʻemaʻeā i le tā e le aunoa,+ o lē ua faatoʻilaloina atunuu i le ita tele i sauāga e lē mataofiofia.+
7 Ua iai le mapusaga i le lalolagi atoa,+ ua saʻoloto mai i vevesi. Ua olioli ma alalaga fiafia tagata.+
8 E oo lava i laau o le perosi+ ua olioli ona o mea ua oo iā te oe, ua faapea mai foʻi laau o le arasi o Lepanona, ‘Talu mai lava ona e taoto, ua lē toe iai se tagata e tā laau+ ua faasagatau mai iā i matou.’
9 “E oo i le Tuugamau*+ i lalo, ua atuatuvale ona o oe ina ia faafetaiaʻi iā te oe i lou alu atu. Ua feala i latou ua feoti ona o oe,+ o taʻitaʻi uma o le lalolagi e pei o ni ʻoti.+ E na te faatulaʻi ese tupu o atunuu mai i o latou nofoālii.+
10 Ua latou tautatala uma mai ma faapea mai iā te oe, ‘O oe foʻi, po ua e vaivai e pei o i matou?+ Po ua tutusa oe ma i matou?+
11 Ua oo ifo lou mimita i le Tuugamau ma le paʻō o au meafaifaaili e fai uaua.+ I lalo ifo o oe ua fola ai ilo e pei o se nofoa umī; ma anufe e fai ma ou ie afu.’+
12 “Oi ua e paū mai i le lagi,+ o lē ua susulu atu, o le atalii o le vaveao! Oi ua tātuu oe i lalo i le eleele,+ o oe na faatoʻilaloina nuu!+
13 A o oe sa e faapea ifo i lou loto, ‘Ou te alu aʻe i lagi.+ Ou te sii loʻu nofoālii+ i luga o fetu+ a le Atua, ma ou te saofaʻi i luga o le mauga o feiloaʻiga,+ i le vaega pito i mamao o le itu i mātū.+
14 Ou te alu aʻe i luga o mea maualuluga o ao;+ ou te faia aʻu e tusa ma le Silisili Ese.’+
15 “Peitaʻi, o le a ave ifo oe i le Tuugamau,+ i le vaega pito i mamao o le lua.+
16 O i latou o ē e vāai iā te oe e pulatoʻa atu iā te oe; o le a latou matuā saʻiliʻili iā te oe i lo latou faapea ane, ‘Po o le tamāloa ea lenei na faavevesia le lalolagi, ma ia lūlūina malo,+
17 o lē na faia le laueleele ua fua mai e pei o le toafa ma ia faatoʻilaloina ona lava aai,+ e leʻi tatalaina foʻi ana pagota e toe foʻi i o latou aiga?’+
18 O tupu o isi atunuu uma, ioe o i latou uma, ua taooto i latou ma le mamalu, e taʻitoʻatasi i lona lava loa.+
19 A o oe, e tuulafoaʻi oe e aunoa ma se nofoaga e tanu ai oe,+ e pei o se moemoe e inosia, ua ufitia i tagata ua oti, o ē sa tutui i le pelu ma ua ō ifo i maa o le lua,+ e pei o le tino oti ua solia.+
20 E lē tanua oe faatasi ma tupu, i se tuugamau, ona ua e faaleagaina lou laueleele, na e fasiotia foʻi ou lava tagata. E lē toe taʻua lava fanau a ē e amioleaga.+
21 “Inā outou sauni ia se mea e fasiotia ai ona lava atalii ona o mea sesē a o latou augātamā,+ ina ia latou lē tutulaʻi mai ma fai mo i latou le laueleele ma faatumu le fogāeleele ua fua mai i aai.”+
22 “Ou te tulaʻi e faasagatau iā i latou,”+ ua fetalai mai ai Ieova o ʻau.
“Ou te tineia le igoa+ o Papelonia ma ē o totoe, o fanau atoa ma fanau a fanau,”+ ua fetalai mai ai Ieova.
23 “O le a ou faia Papelonia ma mea e nofo ai le kifota* ma vaivai ua iai ū, ou te saluina o ia i le salu o le faaumatiaga,”+ ua fetalai mai ai Ieova o ʻau.
24 Ua tautō+ Ieova o ʻau e faapea: “E pei ona ou manatu e faapea lava ona tupu; ma e tusa ma laʻu faaiʻuga, o le mea lea e taunuu,+
25 ina ia tuʻimomomoina le tagata Asuria i loʻu laueleele+ ma ou solia o ia i luga o oʻu mauga;+ ma aveesea lana amo mai i loʻu nuu ma aveesea foʻi lana avega mai i o latou tauʻau.”+
26 O le poloaʻiga lenei ua fuafuaina e faasaga i le lalolagi uma, o le aao foʻi lenei o loo faaloaloa pea faasagatau i nuu uma.
27 Auā ua faia e Ieova o ʻau le faaiʻuga,+ o ai na te mafai ona lepetia?+ O loo faaloaloa atu lona aao, o ai na te mafai ona faafoʻisiaina?+
28 O le tausaga na maliu ai le Tupu o Aasa,+ na oo mai ai lenei feʻau:
29 “Filisitia e,+ aua tou te olioli+ o so o se tasi o outou, talu ai ua gausia le tootoo o lē na taia outou.+ Auā o le a tupu mai i le aa o le gata+ se gata uogo,+ ma o lana tama, o le gata lea e pei o le afi mumū o loo lele.+
30 O le a aai ulumatua a ē e faatauvaa, ma e taooto ē e matitiva ma le saogalemu.+ O le a ou fasiotia lou aa i le oge, ma e fasiotia foʻi ē o le a totoe mai iā te oe.+
31 Le faitotoʻa e, inā tagiauē ia! Le aai e, inā alaga leotele atu ia! Filisitia e, o le a faavaivai o o outou loto uma lava! Auā o loo sau le asu mai i le itu i mātū ma e leai se fitafita e vavaeese mai i lana ʻautau.”+
32 O le ā se tali o le a fai atu e se tasi i avefeʻau+ o nuu? Ua faataatia e Ieova le faavae o Siona,+ ma e sulufaʻi i ai ē ua puapuagatia o lona nuu.
Faamatalaga Pito i Lalo
^ Tagaʻi i le Faaopoopoga e 6.
^ O se meaola e pei o se lapiti e talatala matuitui lona tino e puipuia ai o ia. E taʻua i le faa-Peretania o le porcupine.
