Isaia 16:1-14
16 Ia outou avatu se mamoe poʻa i le pule o le atunuu,+ mai i Sela e agaʻi atu i le toafa, e oo i le mauga o le tama fafine a Siona.+
2 Auā e pei o le manulele ua sola ese, ua tuliesea mai i lona faamoega,+ o le a faapea foʻi tama fafine a Moapi i asaga o Arinona.+
3 “Ia outou fai mai ni fautuaga, ma faatino le faaiʻuga.+
“Ia faapaolo mai lou ata lafoia e peiseaʻī o le pō i le aoauli.+ Ia natia ē ua faataapeapeina;+ aua e te faalataina se tasi o loo sola.+
4 Moapi e,+ seʻi aumau iā te oe oʻu tagata ua faataapeapeina. Ia fai oe ma lafitaga iā i latou ona o lē e faatamaʻia mea.+ Auā ua oo lē ua sauā i lona iʻuga; ua faaiʻuina foʻi le faatamaʻiaga o mea; e faaumatia mai i le lalolagi ē ua solia isi i lalo.+
5 “O le alofa faamaoni e faavaeina ai ma le mausalī le nofoālii;+ ma e nofo ma le faamaoni se tupu i le nofoālii i le faleʻie o Tavita,+ e faamasino ma saʻili i le amiotonu, e faataalise foʻi ona faia le mea tonu.”+
6 Ua matou faalogo i le faamaualuga o Moapi, ma ua matuā faamaualuga lava o ia;+ o lona faualuga, o lona faamaualuga, ma lona ita tele,+ ae e lē aogā ma e pepelo foʻi ana tala.+
7 O lea, e tagiauē Moapi ona o Moapi; e tagiauē foʻi le atunuu atoa.+ O le a faanoanoa ē ua afāina ona o keke e faia i le vine mai i Kiriaresa,+
8 auā ua mamae fanua malifa o Hesepona.+ O pule o nuu ua latou gauieseina ai lālā ua tumu i fuifuivine mai i le vine o Sepena.+ Ua oo atu lālā vine i Iasaru;+ ua sosolo atu i le toafa. Ua tuu ona tātupu e tupu olaola; ua sosolo atu i le sami.
9 O le mea lea ou te tagi ai faatasi ma le tagi a Iasaru ona o le vine o Sepena.+ Ou te faasūsūina oe i oʻu loimata Hesepona e,+ ma Eleale e,+ auā ua tupu le alaga i le taimi o le fuata o le tau māfanafana ma le taimi o le seleselega.+
10 Ua aveesea le fiafia ma le olioli mai i le togālaau ʻaina; ua lē toe iai se alaga fiafia i togāvine, e leai foʻi ma se isi e pisa.+ E lē toe maua se uaina i le soligavine e lē e solia vine.+ Ua ou faamutaina le alaga.+
11 O le mea lea ua gatete ai totonu o loʻu tino e pei o uaua o le kitara ona o Moapi,+ atoa ma loʻu manava ona o Kiriaresa.+
12 Ua iloa ua vaivai Moapi i luga o le mea maualuga;+ ma ua alu atu o ia i lona malumalu e tatalo ai,+ ae e lē mafai e ia ona faia se mea.+
13 O le fetalaiga lea na fetalai muamua mai ai Ieova e uiga iā Moapi.
14 A o lenei ua fetalai mai Ieova e faapea: “O tausaga lava e tolu e tusa ma tausaga e faigaluega totogi ai se tagata,+ e faalumaina ai le mamalu+ o Moapi i le tele o vevesi eseese, ma o ē o le a totoe e toʻaitiiti lava i latou, o le a lē malolosi foʻi.”+
