Isaia 28:1-29
28 Oi talofa i le palealii mamalu o ē o onanā o Efaraima,+ atoa ma le fuga ua mamae, o lona matagofie e faamanaia ai, lea ua i le ulu o le vanu lafulemu o i latou ua faatoʻilaloina i le uaina!
2 Faauta! Ua iai iā Ieova lē e malosi ma tiotio.+ E pei o le faititili ma le uatoʻa,+ o le matagi malosi mataʻutia, e pei foʻi o le faititili ma lologa ua tatafe malosi,+ o le a ia lafotuina ma le malosi i le eleele.
3 O le a solia i vae palealii mamalu a ē o onanā o Efaraima.+
4 O le fuga+ ua mamae, o lona matagofie e faamanaia ai lea ua i le ulu o le vanu lafulemu, o le a pei o le muaʻi mati+ pula ae e leʻi oo i le tau māfanafana, pe a iloa atu e se tagata matamata, e na te tauina ma foloina loa.
5 O lea aso, o le a avea ai Ieova o ʻau ma palealii matagofie+ ma pale manaia+ i ē o totoe+ o lona nuu,
6 o lē foʻi na te uunaʻia* lē e nofo e fai le faamasinoga ia faamasino ma le tonu,+ e avea foʻi ma lē e faamalosi i ē ua puipuia le faitotoʻa o le aai mai i osofaʻiga o le fili.+
7 O i latou foʻi nei ua sesē o latou ala ona o le uaina ma ua fesēaʻi solo ona o le ʻava malosi. Ua sesē ala o ositaulaga ma perofeta+ ona o le ʻava malosi, ua fenuminumiaʻi ona o le uaina, ma ua fesēaʻi solo+ ona o le ʻava malosi; ua sesē la latou vaai, ma ua lē mautonu ai i le faia o faaiʻuga.
8 Auā ua tumu laulau i puaʻiga+ inosia, e leai lava se mea ua sao.
9 O ai o le a aʻoaʻoina e se tasi i le poto,+ o ai foʻi o le a faamalamalama i ai e se tasi mea ua uma ona faalogo i ai?+ O i latou ea ia ua faateʻa ma le suāsusu, o i latou ia ua teʻa ma le susu?+
10 Auā o loo iai “le poloaʻiga i luga o le poloaʻiga, o le poloaʻiga i luga o le poloaʻiga, o le fua faataoto* i luga o le fua faataoto, o le fua faataoto i luga o le fua faataoto, o sina mea itiiti i inei ma sina mea itiiti i inā.”*+
11 O le a fetalai mai o ia i lenei nuu e ala i ē ua ese la latou gagana+ ma lē manino a latou tala,+
12 o le nuu foʻi lea na ia fetalai mai i ai: “O le mea lenei e mapu ai. Ia outou avatu le mālōlōga i ē ua vaivai. O le nofoaga lenei o le toʻafilemu,” a ua mumusu i latou e faalogo i ai.+
13 Ona avea ai lea o le afioga a Ieova iā i latou o “le poloaʻiga i luga o le poloaʻiga, o le poloaʻiga i luga o le poloaʻiga, o le fua faataoto i luga o le fua faataoto, o le fua faataoto i luga o le fua+ faataoto, o sina mea itiiti i inei ma sina mea itiiti i inā,” ina ia ō i latou ma paʻuʻū taliaga, e nutililiia foʻi, e maileia ma maua.+
14 O lea, inā faalogo mai ia i le afioga a Ieova outou o ē e mimitavale, o outou o ē o pule+ i lenei nuu o loo i Ierusalema:
15 Ona ua outou fai atu: “Ua matou osia se feagaiga ma le Oti;+ ua matou faia foʻi se faaaliga+ ma le Tuugamau;* pe a ui ane le lolo e tafe faafuaseʻi mai e lē oo mai iā i matou, auā ua fai le pepelo+ ma o matou lafitaga ma ua matou lalafi i tala sesē”;+
16 o lea, o le fetalaiga lenei a le Alii Pule Silisili Ese o Ieova: “Ua ou tuuina i Siona+ se maa+ e fai ma faavae, o se maa+ ua uma ona tofotofoina, o le tulimanu+ tāua o se faavae+ mausalī. E lē popolevale so o se tasi e faatuatua i ai.+
17 O le a ou faia le faamasinotonu ma fua+ faataoto ma o le amiotonu+ e fai ma meafaigaluega e faalaugatasi ai; e salu ese e le uatoʻa+ le lafitaga o le pepelo,+ ma e lofia foʻi i le vai le mea e lafi ai.+
18 O le a faaiʻuvaleina la outou feagaiga ma le Oti,+ ma e lē tumau foʻi la outou faaaliga ma le Tuugamau.+ Pe a ui ane le lolo e tafe faafuaseʻi mai,+ ona solia ai lea o outou.+
19 O taimi uma e ui ane ai e tafefea ai foʻi outou,+ auā e ui ane i lea taeao ma lea taeao, i le ao ma le pō; ma e ao ona avea ma mea e māfua ai le fefefe+ ina ia malamalama ai nisi i tala ua faalogo i ai.”
20 Auā ua puupuu le nofoa umi e lē mafai ona faaloloa ai se tasi, ua lauitiiti foʻi le ʻie na lalagaina e pulupulu ai se tasi.
21 Auā o le a tulaʻi Ieova e pei ona faia i le Mauga o Faresa,+ o le a toʻasā e pei ona faia i le fanua laugatasi e lata ane i Kipeona,+ ina ia faia lana gaoioiga, o lana gaoioiga e matuā ese lava, ina ia galue i lana galuega, o lana galuega e uiga ese.+
22 Aua le avea outou ma tagata tauemu,+ ina neʻi atili malosi ai o outou noanoataga, auā ua ou faalogo i le Alii Pule Silisili Ese+ o Ieova o ʻau e faapea, ua faamasinoina le atunuu uma ma o le a faaumatia ai.+
23 Ia uaʻi mai o outou taliga ma faalogo mai i loʻu leo; ia faasaga mai ma faalogo mai i aʻu upu.
24 Po o le aso atoa+ ea e sua ai le fanua e le tagata sua fanua ina ia lūlūina fatu, ma suatia ma faamalūina lona fanua?+
25 Pe a uma ona faalaulelei le laueleele pe e lē o lūlūina solo ea e ia le kumina uliuli ma totōina kumina,+ pe e lē o lūlūina foʻi ea e ia saito, tokana+ ma karite i le mea ua faatulagaina+ e totō ai, ma le kaseme*+ i lona tuaoi?+
26 E aʻoaʻia+ o ia e se tasi e tusa ma le mea ua tonu. E faatonuina o ia e lona lava Atua.+
27 Auā e lē solia kumina uliuli i se meafaigaluega+ e soli ai fatu; e lē faataamilo i luga o le kumina le uili o le taavale toso. Auā e masani ona sasa le kumina uliuli i le tootoo+ ma le kumina i se laau.
28 Pe e masani ea ona nutililiia fatu i le mea e soli ai fatu? Auā e lē solia pea lava pea+ e se tasi ia fatu.+ E ao ona ia faaalu le mea faataavalevale o lana taavale toso ma ana solofanua, ae e na te lē nutililiia.+
29 O le mea foʻi lea ua sau mai iā Ieova o ʻau lava ia,+ o lē ua maʻeu le manaia o ana fautuaga, o lē foʻi ua sili ona manuia ana galuega.+
Faamatalaga Pito i Lalo
^ Po o le “agaga e uunaʻia ai.”
^ I le gagana Eperu o lenei fuaiupu o se solo e taʻua faalua upu e tai pei o se solo a tamaiti.
^ O loo faatatau atu le faaupuga “fua faataoto” i lenei mau i se tulafono po o tapulaa e tusa ma amio.
^ Tagaʻi i le Faaopoopoga e 6.
^ O le “tokana” o se tamaʻi laau e iai ona fatu ninii e masani ona fai ai falaoa. O le upu Peretania o le millet. O le “karite” o se isi ituaiga saito. O le upu Peretania o le barley. O le “kaseme” o se ituaiga o saito. O le upu Peretania o le spelt.
