Isaia 29:1-24
29 “Oi talofa iā Arielu,*+ iā Arielu le aai na faatū ai faleʻie o Tavita!+ Ia outou faia faamanatuga i lea tausaga+ ma lea tausaga.
2 Ou te faatigāina+ iā Arielu, o le a iai i inā le faavauvau ma le auēga,+ ma e avea o ia ma taʻinafi o le fata faitaulaga a le Atua iā te aʻu.+
3 Ou te nofo i faleʻie i itu uma e faasagatau iā te oe, ma ou te siʻomia oe i se pā e fai i laau ma ou faatūina faupuʻega maa ina ia tau ma oe.+
4 E paʻū oe ma faamaulaloina ma e te tautala mai i le eleele, ma e leo itiiti mai au upu mai i le efuefu.+ E pei lou leo o lē e saʻili i agaga e alu aʻe mai i le efuefu, ma e te tautala mai i se leo ii mai i le pefu.+
5 O tagata e toʻatele ia e te lē masani ai o le a pei i latou o le pauta ninii,+ o le a pei foʻi pule sauā+ e toʻatele o aputi o saito ua lelea ese.+ E tupu faafuaseʻi lenei mea.+
6 O le a liliu mai Ieova o ʻau e laveaʻi iā te oe i le faititili ma le mafuiʻe, o le taalili, o le matagi malosi ma le afā ma le mū o le afi e faaumatia ai.”+
7 E pei o se miti, e pei o se faaaliga i le pō, e faapea foʻi le mea e tupu i tagata e toʻatele o nuu uma o loo tau faasaga iā Arielu,+ e oo lava iā i latou uma o loo tau faasaga iā te ia, ma fata maualuluga e fesiitaʻi i le taua faasaga iā te ia ma i latou uma ua faatigāina iā te ia.+
8 Ioe, e pei o se tasi o fia ʻai ae ua fai sana miti e faapea o loo ʻai, ua ala o ia ae o loo mole pea;+ e pei foʻi o se tasi ua fia inu ae ua fai sana miti e faapea o loo inu, ua ala o ia ae ua vaivai ma ua fia inu lava; e faapea lava le mea e tupu i tagata e toʻatele o nuu uma o loo tau faasaga i le Mauga o Siona.+
9 Inā outou tutū ia ma ofo;+ Ia moeiini* o outou mata ina ia lē vāai i ai.+ Ua onanā i latou, ae e lē ona o le uaina;+ ua tautevateva i latou, ae e lē ona o le ʻava malosi.+
10 Auā ua liligi atu e Ieova i o outou luga le agaga e moegase ai;+ ua ia pupuni o outou mata, le ʻauperofeta,+ ua ia ufitia foʻi o outou ulu,+ le ʻau vāai i faaaliga.+
11 Ua avea foʻi le faaaliga o mea uma iā te outou e pei o upu o le tusi ua faamauina,+ lea ua latou tuuina atu i lē ua iloa faitau ma faapea atu: “Faamolemole seʻi faitau leotele mai,” ma e ao ona ia faapea mai: “Ou te lē mafai auā ua faamauina le tusi”;+
12 ona tuuina atu lea o le tusi i lē e lē iloa faitau, ma faapea atu iā te ia: “Faamolemole seʻi faitau mai,” ma e ao ona ia faapea mai: “Ou te lē iloa faitau.”
13 Ua fetalai mai Ieova: “Talu ai ua faalatalata mai lenei nuu i o latou laugutu, ma ua latou faamamaluina aʻu i o latou laugutu,+ a ua mamao ese lava o latou loto mai iā te aʻu,+ o lo latou matataʻu iā te aʻu e na o se mataupu a tagata ua aʻoaʻoina ai i latou,+
14 o lea, o aʻu lenei, o Lē o le a ou faia se gaoioiga ofoofogia i lenei nuu,+ i se auala ofoofogia ma o se mea ofoofogia foʻi; ma e faaumatia le atamai o ē e atamamai, e natia foʻi le malamalama o o latou tagata faautauta.”+
15 Oi talofa iā i latou ua taumafai malosi e natia a latou fuafuaga mai iā Ieova,+ ma ē foʻi ua faia a latou gaoioiga i le mea pogisa,+ a ua latou faapea ane: “O ai o loo vaai mai iā i tatou, ma o ai e iloa mai i tatou?”+
16 Pagā lo outou faatuʻiese! Pe e ao ona manatu i le fai ipu omea e pei ona manatu i le omea?+ Pe e tatau ea ona fai atu le mea na faia e faatatau i lē na faia o ia: “E na te leʻi faia aʻu”?+ Pe e fai atu foʻi le mea na gaosia e faatatau i lē na gaosia o ia: “E leai sona malamalama”?+
17 Pe e lē toeitiiti lava ea ona liua lea o Lepanona e fai ma togālaau+ o fualaau ʻaina, ma manatu i le togālaau o fualaau ʻaina o se vaomatua?+
18 O lea aso, o le a faalogo ai o ē e tutuli i upu o le tusi,+ o le a vāai foʻi mata o ē e tauaso mai i le mea pōuliuli ma le mea pogisa.+
19 O le a faateleina e i latou e agamalu+ lo latou olioli iā Ieova, o le a fiafia foʻi o ē e matitiva o le fanau a tagata i Lē e Paia o Isaraelu,+
20 auā e oo atu le pule sauā i lona mutaaga,+ ma e faaumatia lē e mimitavale,+ e fasiotia i latou uma o ē e nofosauni e fai mea leaga i isi,+
21 o i latou ua faaaogā upu a se tasi e taʻusalaina ai o ia,+ ma i latou e tuu se mailei mo le tagata o loo aʻoaʻia i le faitotoʻa o le aai,+ ma i latou ua liliueseina le tagata amiotonu i faamatalaga lē faavaea.+
22 O lea, o le fetalaiga lenei a Ieova o lē na togiolaina Aperaamo+ i le aiga o Iakopo: “E lē toe faamāina Iakopo pe toe sesega ona foliga;+
23 auā pe a vaai atu o ia i lana fanau, o le galuega a oʻu lima o i totonu iā te ia,+ latou te faapaiaina loʻu igoa,+ ma latou te faapaia Lē e Paia o Iakopo,+ latou te matataʻu foʻi i le Atua o Isaraelu.+
24 O i latou ua sesē i o latou loto o le a latou maua le malamalama ma e oo foʻi i ē ua muimui o le a latou maua le aʻoaʻoga.”+
Faamatalaga Pito i Lalo
^ Atonu o lona uiga o le “taʻigafu o le fata faitaulaga a le Atua” e faatatau atu iā Ierusalema.
^ I le gagana Eperu, “ia pipii faatasi o outou mata.”
