Isaia 45:1-25
45 O le fetalaiga lenei a Ieova i lē ua ia faauuina,+ o Kuresa, o lē ua ou uu i lona lima taumatau,+ ina ia faatoʻilaloina atunuu i ona luma,+ ina ia ou aveesea ai le malosi o tupu;* ia tatalaina ai foʻi i ona luma faitotoʻa feliuaʻi e lua ona itu, ina ia lē tapunia ai faitotoʻa o le aai:
2 “O aʻu lava ou te muamua atu i ou luma,+ ma o le a ou faalaugatasia mea maualuluga o le laueleele.+ Ou te nutililiia faitotoʻa ʻapamemea ma ou gauia foʻi pou faalava uʻamea.+
3 O le a ou avatu iā te oe oloa ua i le mea pogisa ma oloa+ ua natia i mea lilo, ina ia e iloa ai o aʻu o Ieova, o Lē ua valaauina oe i lou igoa,+ o le Atua o Isaraelu.
4 Ona o laʻu auauna o Iakopo ma Isaraelu lē na ou filifilia,+ ua ou valaauina ai oe i lou igoa; ua ou tuuina atu iā te oe se igoa faaaloalogia, e ui e te leʻi iloa aʻu.+
5 O aʻu o Ieova e leai se isi.+ E leai se isi Atua seʻi vaganā ai aʻu.+ O le a ou matuā faamalosia* oe e ui e te leʻi iloa aʻu,
6 ina ia iloa e tagata mai i le mea e oso aʻe ai le lā ma mai i le mea e goto i ai, e leai se isi e na o aʻu lava.+ O aʻu o Ieova, e leai se isi.+
7 O aʻu o lē ua faia le malamalama+ ma ua faia foʻi le pōuliuli,+ o lē ua faia le filemu+ ma faatupu ai mala,+ o aʻu o Ieova o loo oʻu faia nei mea uma.+
8 “O outou lagi e, inā faatotō ifo ia le amiotonu e pei o le timu;+ ia māʻuluʻulu ifo le amiotonu mai i le lagi puaoa.+ Ia faamaga le laueleele ma ia fua mai i le faaolataga, ma ia tutupu aʻe faatasi ma le amiotonu.+ O aʻu lava o Ieova na ou foafoaina lea mea.”+
9 Oi talofa i lē e finau atu ma le Mataisau o lē na foafoaina o ia,+ e pei ona finau o taʻegaipu omea ma isi taʻegaipu omea ua taatitia i le eleele! Pe e fai atu ea le omea i lē na faia o ia:+ “O le ā le mea ua e faia?” Pe e fai atu le mea na e faia: “E leai ni ona lima”?
10 Oi talofa i lē ua fai atu i le tamā: “O le ā le ituaiga o tamaitiiti ua e fanaua?” ma i le tinā: “O le ā le ituaiga o tamaitiiti ua e tigā a fanau ai?”+
11 O le fetalaiga lenei a Ieova, o Lē e Paia o Isaraelu+ ma le Mataisau o lē na foafoaina o ia:+ “Ia fesili mai iā te aʻu e uiga i mea o le a oo mai+ e faatatau i oʻu atalii;+ e ao foʻi iā te outou ona tāpā se tali mai iā te aʻu e tusa ma galuega+ a oʻu lima.
12 O aʻu lava na ou faia le lalolagi+ ma ou foafoaina le tagata o loo iai.+ O aʻu, o oʻu lava lima na fofola ai le lagi,+ ma ou faatonutonuina ai fetu* ma mea uma ua iai.”+
13 Ua fetalai mai Ieova o ʻau: “O aʻu lava ou te faatulaʻi le tagata i le amiotonu+ ma o le a ou faasaʻoina ona ala uma.+ O ia o le a ia fausia loʻu aai,+ ma o le a ia tuu atu oʻu tagata ua ave faapagota ina ia ō,+ e lē ona o se tau po o se taui e totogi+ atu i se ala faaalatua.”
14 O le fetalaiga lenei a Ieova: “O ē e galulue e lē totogia o Aikupito+ ma faatauʻoa o Aitiope ma Seepa,+ o tagata uumi+ o le a latou ō mai lava iā te oe, ma e avea i latou ma ou tagata.+ O le a latou savavali i ou tua; e ō mai i latou ma uʻamea ua faamau i o latou vae,+ e latou te ifo atu foʻi iā te oe.+ O le a latou tatalo iā te oe e faapea, ‘E moni ua faatasi le Atua ma oe,+ ma e leai se isi; e leai lava se isi Atua.’”+
15 E moni lava o oe o le Atua ua e natia oe lava,+ o le Atua o Isaraelu, o le Faaola.+
16 O le a māsiasi tagata ma o le a faamāina i latou uma. O le a savavali faatasi i le māsiasi+ ē o loo fausia tupua.
17 Ae o le a faaolaina Isaraelu ona ua autasi ma Ieova,+ i se faaolataga e faavavau.+ O le a lē māsiasi+ ai outou, e lē faamāina+ foʻi outou e faavavau, faavavau lava.
18 Auā o le fetalaiga lenei a Ieova, o Lē na foafoaina le lagi,+ o Ia o le Atua moni,+ o le Mataisau o Lē na faia le lalolagi,+ o Ia o Lē na faatumauina,+ na ia lē foafoaina fua ae na ia faia ina ia ʻainā:+ “O aʻu o Ieova, e leai se isi.+
19 Ou te leʻi tautala atu i se mea lilo,+ i se mea pogisa o le lalolagi; ou te leʻi fai atu foʻi i le fanau a Iakopo, ‘Ia outou saʻili fua mai iā te aʻu.’+ O aʻu o Ieova, ou te tautala atu i mea ua tonu, ma taʻu atu mea ua saʻo.+
20 “Ia faapotopoto outou ma ō mai.+ Inā faalatalata faatasi mai ia outou, o outou o ē na sao mai i atunuu.+ E lē iloa se mea e i latou ua tauave o latou faatusa ua tā i le laau, e faapena foʻi ma i latou e tatalo atu i se atua e lē mafai ona faaola.+
21 Ia outou tautatala ma aumai la outou mataupu.+ Ia soālaupule faatasi i latou i le autasi. O ai na māfua ai ona faalogo i lea mea mai i aso anamuā?+ O ai na taʻu maia talu mai lenā taimi?+ Pe e lē o aʻu ea? O aʻu o Ieova, e leai lava se isi Atua e na o aʻu lava;+ o le Atua amiotonu ma le Faaola,+ e leai se isi e na o aʻu lava.+
22 “Ia liliu mai iā te aʻu ma faaolaina ai outou,+ o outou uma ua i tuluʻiga o le lalolagi; auā o aʻu o le Atua, e leai se isi.+
23 Ua ou tautō iā te aʻu lava,+ ua alu atu le upu mai i loʻu gutu i le amiotonu,+ ma e lē toe foʻi mai,+ e tootuli+ tulivae uma i oʻu luma ma e tautō laulaufaiva uma,+
24 e faapea, ‘E moni e iā Ieova le tele o le amiotonu ma le malosi.+ O i latou uma e feita iā te ia e ō atu iā te ia, ma māsiasi ai.+
25 O le a faamaonia le saʻo o le fanau+ a Isaraelu, ma o le a latou mitamita foʻi ona o Ieova.’”+
Faamatalaga Pito i Lalo
^ I le gagana Eperu, “Ou te tatalaina sulugātiti o tupu.”
^ I le gagana Eperu, “Ua ou matuā fusia oe.”
^ I le gagana Eperu, o “ʻau uma.”
