Isaia 50:1-11
50 Ua faapea ona fetalai mai o Ieova: “O fea le pepa faamaonia+ a lo outou tinā o le teteʻaga, o lē na ou tuliesea?+ O ai le tagata na ou aitalafu ai o lē na ou faatau atu i ai outou?+ Faauta! Ona o a outou mea sesē+ ua faatauina atu ai outou, ua tuliesea foʻi lo outou tinā ona o a outou solitulafono.+
2 Aiseā ua leai ai se tasi ina ua ou sau?+ Aiseā foʻi ua leai ai se tasi e tali mai ina ua ou valaau atu?+ Po ua puupuu ea loʻu lima ma lē mafai ai ona faaolaina,+ po ona ua leai se mana iā te aʻu e laveaʻi ai? Tagaʻi foʻi! O laʻu aʻoaʻiga malosi+ e mātūtū ai le sami;+ ou te faia vaitafe ma toafa.+ E elo iʻa i ia mea ona ua leai se vai, ma mamate ai ona o le fia feinu.+
3 Ua ou faaofuina le lagi i le pōuliuli,+ ua ou faia foʻi ʻie talatala e ufiufi ai.”+
4 Ua foaʻi mai iā te aʻu e le Alii Pule Silisili Ese o Ieova le laulaufaiva o ē ua aʻoaʻoina,+ ina ia ou iloa le tala e fai atu i lē ua vaivai.+ E na te fafagu iā te aʻu i lea taeao ma lea taeao; e na te fafagu iā te aʻu ina ia faalogo oʻu taliga e pei o ē ua aʻoaʻoina.+
5 Ua tuuina mai le malamalama* e le Alii Pule Silisili Ese o Ieova iā te aʻu, ae o aʻu, ou te leʻi tetee i ai.+ Ou te leʻi liliu i le isi itulagi.+
6 Ua ou tuuina atu loʻu papatua i ē e tā mai, o oʻu alafau+ i ē e futi i le ʻava. E leʻi natia foʻi oʻu mata mai i mea e māsiasi ai ma le feanu mai.+
7 Ae o le a fesoasoani mai le Alii Pule Silisili Ese o Ieova iā te aʻu.+ O le mea lea ou te lē mā ai. O le mea foʻi lea, ua faia ai oʻu mata e pei o se maa malō, ou te iloa foʻi o le a lē faamāina aʻu.+
8 Ua latalata mai Lē o loo taʻuamiotonuina aʻu.+ O ai sē e mafai ona finau mai iā te aʻu? Seʻi o maʻua tutū faatasi.+ O ai lē e finau faasaga iā te aʻu i le faamasinoga?+ Ia sau o ia iā te aʻu.+
9 Faauta! O le a fesoasoani mai le Alii Pule Silisili Ese o Ieova iā te aʻu. O ai e mafai ona taʻuleagaina aʻu?+ Tagaʻi foʻi! O le a pala i latou uma e pei o se ofu.+ E ʻaina i latou e lelefua.+
10 O ai se isi o outou ua mataʻu+ iā Ieova, ua faalogo foʻi i le leo o lana auauna,+ o lē e savali i le pogisa+ ma o lē foʻi ua leai ai se malamalama iā te ia? Ia faatuatuaina e ia le suafa o Ieova+ ma faalagolago o ia i lona Atua.+
11 “Faauta! O outou uma ua tutuina le afi ma faatupuina le susulu o aloiafi, ia savavali i le malamalama o lo outou afi, ma i totonu o aloiafi ua outou tutuina. E oo iā te outou lenei mea mai i loʻu lima: O le a outou taooto ma le matuā tigāina.+
Faamatalaga Pito i Lalo
^ I le gagana Eperu, “ua tatalaina loʻu taliga.”
