Isaia 6:1-13
6 O le tausaga na maliu ai le Tupu o Usia,+ ua ou iloa ai Ieova+ o loo afio i lona nofoālii+ sili ma le maualuga, ma o ona pito ofu ua tumu ai le malumalu.+
2 Ua tutū serafi e latalata ane.+ Ua tofu ma apaʻau taʻiono. E lua e na te ufiufi ai ona foliga,+ e lua e na te ufiufi ai ona vae, ma le isi lua e feleleaʻi ai.
3 Ua valaau atu le tasi i le isi ma faapea atu: “E paia, e paia, e paia Ieova o ʻau.+ Ua faaalia e mea uma o le lalolagi lona mamalu.”
4 Ona lūlū ai lea o sooga+ o faitotoʻa i le leo o lē o loo valaau atu, ma ua faasolosolo ona faatumulia le fale i le asu.+
5 Ona ou faapea atu lea: “Oi talofa iā te aʻu! O le a ou oti auā o aʻu o se tagata e lē mamā laugutu,+ o aʻu foʻi ua ou nofo faatasi ma tagata e lē mamā o latou laugutu;+ ae ua vaai oʻu mata i le Tupu o Ieova o ʻau lava ia!”+
6 Ona lele mai ai lea o se tasi o serafi iā te aʻu, ma ua i lona lima se malala ola+ ua ia aveese mai i le fata faitaulaga i se iofi.+
7 Ua ia paʻi mai i loʻu gutu+ ma faapea mai: “Silasila! Ua paʻi atu lenei mea i ou laugutu, ma ua aveesea ai au mea sesē ma ua faia ai le togisala mo au agasala.”+
8 Ona ou faalogo lea i le siʻufofoga o Ieova, ua faapea mai: “O ai ou te auina atu, ma o ai foʻi o le a alu atu mo i matou?”+ Ona ou fai atu lea: “O aʻu lenei! Inā auina atu ia aʻu.”+
9 Ua ia toe fetalai mai: “Inā alu atu ia, ma fai atu i nei tagata, ‘Ia outou faalogo ma saga faalogo, ae e lē malamalama; ia vāai ma toe vāai ae e lē iloa ni mea.’+
10 Ia faamaaa loto o nei tagata,+ ma ia faataligatuli o latou taliga,+ ma faapipii faatasi o latou mata, ina ia aua neʻi o latou iloa se mea i o latou mata ma aua neʻi faalogo o latou taliga, ina neʻi malamalama foʻi o latou loto ma latou toe liliu mai ma faamālōlōina i latou.”+
11 Ona ou fai atu lea: “Ieova e, o le ā ea le umi?”+ Ua fetalai mai o ia: “Seʻia faatafunaina aai, ma leai se isi e nofo ai, ma faagaogaoina fale e leai se tagata e nofo ai, ma matuā faatamaʻia foʻi le laueleele;+
12 ma e ave lava e Ieova tagata i se mea mamao, ma matuā tuulafoaʻiina le atunuu atoa.+
13 Peitaʻi, o le a iai pea le tasi vaesefulu,+ ma e ao ona avea o se mea e toe susunuina e pei o se laau telē ma o se laau e matuā maualuga, pe a tuuina i lalo+ e iai pea le pogati;+ o le fanau paia o le pogati lea.”+
