Isaia 61:1-11
61 Ua i oʻu luga le agaga o le Alii Pule Silisili Ese o Ieova,+ auā ua faauuina aʻu e Ieova+ e folafola atu le tala lelei i ē e agamalu.+ Ua ia auina atu aʻu e fusifusi i ē ua loto momomo,+ e folafola atu le saʻolotoga i ē ua ave faapagota+ ma le matuā faapupulaina o mata o pagota;+
2 ina ia folafola atu le tausaga e faaalia mai ai e Ieova lona agalelei+ ma le aso e tauimasui ai e lo tatou Atua;+ e faamāfanafana ai i ē uma o loo faavauvau;+
3 ina ia avatu se ufiulu i ē o faavauvau ona o Siona e sui ai le lefulefu,+ o le suāuu o le olioli+ e sui ai le faavauvau, o le ofu tele o viiga e sui ai le agaga nutimomoia;+ e ao ona taʻua i latou o laau tetele o le amiotonu,+ o mea totō a Ieova+ ina ia faamatagofieina ai o ia.+
4 E latou te toe fausia mea ua leva ona faatafunaina;+ e latou te toe atiaʻe mea na gaogao mai i aso ua mavae,+ e latou te toe faafouina aai ua faatafunaina,+ o mea na gaogao mai i lea tupulaga ma lea tupulaga.
5 “E ō mai foʻi tagata ese ma leoleo i a outou lafu,+ e fai foʻi tagata mai i isi atunuu+ ma a outou faifaatoʻaga ma ē e galulue i ou togāvine.+
6 A o outou o le a taʻua outou o ositaulaga a Ieova;+ e taʻua foʻi outou o auauna+ a lo tatou Atua.+ O le a aai outou i punaʻoa o atunuu,+ ma e tou te tautatala ma le fiafia ona o ʻoa mamalu tou te maua mai iā i latou.+
7 E suia lo outou faamāina i le faaluaina o mea e tou te maua,+ ma e suia le faalumaina i le alalaga fiafia ona o vaega o mea e latou te maua.+ O lea la, o le a faaluaina mea latou te maua e fai ma o latou tofi i lo latou laueleele.+ O le a latou olioli i aso uma.+
8 Auā o aʻu o Ieova ou te fiafia i le faamasinotonu,+ ae ou te ʻinoʻino i le gaoi ma le amiolētonu.+ O le a ou avatu lo latou totogi i le faamaoni,+ ma o le a ou osia ma i latou se feagaiga e tumau.+
9 E iloga foʻi a latou fanau i totonu o atunuu,+ ma a latou tupuaga i totonu o nuu.+ O i latou uma e vāai iā i latou o le a iloaina o i latou o fanau ua faamanuiaina e Ieova.”+
10 Ou te olioli lava iā Ieova.+ E fiafia loʻu loto i loʻu Atua.+ Auā ua ia faaofu aʻu i ofu o le faaolataga;+ ua ia faapulupulu aʻu i le ofu talaloa lima pupuu o le amiotonu,+ e pei o le alii faaipoipo o lē na te faia lona ufiulu e pei o le ositaulaga,+ ma e pei foʻi o le tamaʻitaʻi faaipoipo o lē e teuteu o ia i ana teuga.+
11 Auā e pei ona faatupuina mai e le laueleele ona tātupu, e pei foʻi ona faatupuina mai e le togālaau o mea ua uma ona totō ai,+ e faapea foʻi ona faatupuina e le Alii Pule Silisili Ese o Ieova le amiotonu+ ma le viiga i luma o atunuu uma.+
