Isaia 63:1-19
63 O ai lea o loo afio mai mai i Etoma,+ o lē ua ofu i ofu sesega mai i Posara,+ o lē ua matagofie ona ofu, ua savali i le tele o lona mana?
“O aʻu, o Lē e tautala i le amiotonu,+ o Lē ua tele le mana e faaola ai.”+
2 Aiseā ua mūmū ai lou laʻei, ma ua pei ou laʻei o ofu o i latou o ē e solia vine i le mea e soli ai vine?+
3 “Ua ou solia toʻatasi lava le mea e soli ai vine,+ a ua leai se tasi mai i le nuu e faatasi ma aʻu. Ua ou soli pea lava i latou ona o loʻu ita,+ ma ua ou solia i latou i lalo i loʻu lotoa.+ Ua pisipisi mai o latou toto i oʻu ofu+ ma ua leaga uma ai oʻu ofu.
4 Auā ua i loʻu loto le aso o le tauimasui,+ ma ua oo mai le tausaga o ē ua ou toe faatauina mai.
5 Ua ou vaavaai pea, a ua leai se fesoasoani; ua ou ofo foʻi, a ua leai se isi e fia lagolago mai.+ Ona faia lea e loʻu lima o le faaolataga+ mo aʻu, o loʻu lotoa+ foʻi na lagolagoina aʻu.
6 Ona ou solia pea lea o tagata i loʻu ita, ma ou faaonanā i latou i loʻu lotoa,+ ma sasaa i le eleele o latou toto ua pisipisi solo.”+
7 Ou te taʻutaʻu atu gaoioiga o le alofa faamaoni o Ieova,+ o viiga o Ieova e tusa ma mea uma na faia e Ieova iā i tatou,+ e tusa ma le anoanoaʻi o mea lelei ua ia faia i le aiga o Isaraelu,+ e tusa ma lona alofa mutimutivale,+ e tusa foʻi ma le faulaʻi o lona alofa faamaoni.
8 Ua ia toe fetalai mai: “E moni o loʻu nuu i latou,+ o atalii e lē pepelo.”+ Na fai foʻi o ia ma o latou Faaola.+
9 Na mafatia o ia i taimi o o latou mafatiaga.+ Na faaolaina i latou e lana lava avefeʻau.+ Na ia toe faatauina i latou ona o lona alofa ma lona alofa mutimutivale iā i latou,+ na ia siitia ma ave i latou i aso uma i taimi ua mavae.+
10 Ae na latou fouvale+ ma faatigā i lona agaga paia.+ Ona suia ai lea o ia e fai ma o latou fili;+ na tau foʻi o ia faasaga iā i latou.+
11 Ona manatua ai lea e lona nuu o aso ua mavae, o lana auauna o Mose: “O fea o iai Lē na ia taʻitaʻiina i latou mai i le sami+ faatasi ma leoleo mamoe o lana lafu?+ O fea o iai Lē na tuuina i totonu iā te ia Lona lava agaga paia?+
12 O Lē foʻi na tuuina atu Lona aao+ matagofie i le itu taumatau o Mose; o Lē na vaeluaina vai mai i o latou luma+ ina ia faia ai se suafa e tumau pea mo ia lava;+
13 o Lē na taʻitaʻiina i latou e savavali i le va o galu maualuluga, ina ia lē tausūsūlu i latou e pei o se solofanua i le toafa?+
14 E pei o le alu ifo o se manu o le vao i le vanu laugatasi, na avatu le mālōlōga iā i latou e le agaga o Ieova.”+
O le mea lea, na e taʻitaʻia ai ou tagata ina ia faia ai se igoa matagofie mo oe lava.+
15 Ia e silasila mai mai i le lagi+ ma e silafia ai mai i lou afioaga maualuga e paia ma matagofie.+ O fea lou maelega+ ma lou malosi atoa, o ou faalogona loloto+ ma lou alofa mutimutivale?+ Ua e taofia ia mea mai iā te aʻu.+
16 Auā o oe o lo matou Tamā;+ e ui e lē iloa i matou e Aperaamo, ma e lē iloa foʻi e Isaraelu i matou, o oe Ieova e, o lo matou Tamā. O lou suafa, o Lē na toe faatauina i matou i aso ua mavae.+
17 Ieova e, aiseā ua e tuua ai i matou e ō ese mai i ou ala? Aiseā foʻi ua e tuua ai i matou ia faamaaa o matou loto ma lē matataʻu iā te oe?+ Ia e liuliualo mai mo le lelei o au auauna, ma ituaiga o ou tofi.+
18 E itiiti ona aso na fai ai e lou nuu paia lea mea.+ Ua solia i lalo e o matou lava fili lou malumalu.+
19 Ua umi se taimi ua pei e te lē o toe pule iā i matou, e pei foʻi o i latou e lē o taʻua i lou suafa.+
