Kalatia 5:1-26
5 O le saʻolotoga lava lenei ua faasaʻoloto+ ai i tatou e Keriso. O lea la, ia tutumau+ ma aua neʻi toe taofia outou i le amo o le pologa.+
2 Silasila foʻi! O aʻu o Paulo, ou te fai atu iā te outou, pe afai e peritomeina+ outou, ua lē aogā la Keriso iā te outou.
3 Ou te toe taʻutino atu, o ē uma ua peritomeina, e tatau ona latou tausia le Tulafono atoa.+
4 O outou uma o ē e fia taʻuamiotonuina i le tulafono,+ ua vavaeese outou mai iā Keriso, ma ua teʻa ese mai i lona agalelei faifua.+
5 Auā o le agaga ua tatou faatalitali ai ma le naunau i le amiotonu ua faamoemoe i ai, ona o le faatuatua.+
6 Auā e lē aogā le peritome po o le lē peritome+ e tusa ai ma mataupu a Keriso Iesu, ae o le faatuatua+ e ala i le alofa.+
7 Sa outou taufetuli lelei.+ O ai na faalavelavea outou mai i le usiusitaʻi atu pea i le upu moni?+
8 E lē o faapena ona faatauanauina outou e Lē na valaauina outou.+
9 E faafefeteina le paluga falaoa atoa i sina fefete itiiti.+
10 Ou te matuā mautinoa+ iā te outou o ē ua autasi+ ma le Alii, tou te lē manatu i se isi lava mea; ae po o ai lava se tasi e faatigā+ iā te outou, e faasalaina+ lava o ia.
11 O lea la, le ʻauuso e, afai ou te talaʻi atu pea le peritome, aiseā ua sauāina ai pea aʻu? O lenei ua soloia+ le mea e tausuai+ ai, o le laau lea e faapuapuagatia ai.*+
12 Maʻimau pe ana tipieseina na tane ina ia lē toe fananau,+ o ē o loo taumafai e faasesēina outou.+
13 Le ʻauuso e, na valaauina outou i le saʻolotoga.+ Ae aua neʻi avea lenei saʻolotoga ma mea e faamalie ai tuʻinanauga o le tino,+ ae ia pologa le tasi i le isi i le alofa.+
14 Ua taunuu+ le Tulafono atoa i lenei faaupuga: “Ia e alofa atu i lou tuaoi e pei o oe lava iā te oe.”+
15 Afai e faatigā le tasi i le isi ma feʻainaʻi,+ ia faaeteete neʻi faaumatia e le tasi le isi.+
16 Ou te fai atu, Ia outou savavali pea i la le agaga,+ ona outou lē faia lea o tuʻinanauga o le tino.+
17 Ona e tetee atu tuʻinanauga o le tino i le agaga,+ e faapena foʻi le agaga i le tino. O mea e tou te loto e fai, e tou te lē faia lava auā e feteenaʻi nei mea.+
18 Afai e taʻitaʻiina outou e le agaga,+ e tou te lē o nonofo la i le tulafono.+
19 Ua faaalia galuega a le tino,+ o le faitaaga,*+ o le amio lē mamā, o le amio matagā,+
20 o le ifo i tupua, o faiga faaagaga,+ o le feitagaʻi, o le femisaaʻi, o le lotoleaga, o le lotoa, o le finauvale, o fevaevaeaʻiga, o le mulimuli i aʻoaʻoga a tagata,
21 o le matauʻa, o onāga,+ o patī lē taupulea, ma mea faapena. Ou te muaʻi lapataʻia outou e tusa ai ma nei mea, e pei ona ou muaʻi lapataʻia outou. O ē o loo faia+ mea faapena, e lē fai le malo o le Atua mo o latou tofi.+
22 A o le fua+ o le agaga, o le alofa, o le olioli, o le filemu, o le faapalepale, o le agalelei, o le mataalofa,*+ o le faatuatua,
23 o le agamalu, ma le amio pulea.+ E lē faatulafonoina mea faapena.+
24 O ē e mulimuli iā Keriso Iesu, ua latou faatoʻilaloina* le tino, ma ona manaʻonaʻoga ma ona tuʻinanauga.+
25 Afai tatou te ola i la le agaga, ia tatou savavali ma le maopoopo i le agaga.+
26 Aua neʻi o tatou mimitavale, pe faatautavā i isi,+ ma matauʻa i mea a isi.+
Faamatalaga Pito i Lalo
^ Tagaʻi i le Faaopoopoga e 10.
^ Tagaʻi i le Faaopoopoga e 8.
^ O le upu Eleni, e mafai ona faasino atu i le “lelei,” e pei o le amiolelei.
^ I le gagana Eleni, o le “tutuʻi faatasi i luga o le laau.”
