Kenese 12:1-20
12 Ona fetalai mai lea o Ieova iā Aperamo: “Ia e tuua lou atunuu, o lou aiga, ma le aiga o lou tamā ae malaga atu i le atunuu ou te faasino atu iā te oe;+
2 ou te faia oe ma nuu tele,* ou te faamanuia iā te oe, ou te matuā faamamaluina foʻi lou igoa; ma ia avea oe ma faamanuiaga+ i isi.
3 Ou te faamanuia atu i ē o faamanuia iā te oe, ou te faamalaia+ atu i lē ua fetuu iā te oe, ma e maua e aiga uma o le lalolagi faamanuiaga* ona o oe.”+
4 Ona malaga ai lea o Aperamo e pei ona fetalai mai ai Ieova, faatasi ma Lota. E fitu sefulu lima tausaga o Aperamo ina ua ia malaga ese mai i Karana.+
5 Ona ave lea e Aperamo o lana avā+ o Sarai, o Lota le atalii o lona uso,+ o mea uma na latou maua,+ o pologa na latou maua i Karana, ua latou ō ma agaʻi atu i le atunuu o Kanana.+ Mulimuli ane, ona latou taunuu ai lea i Kanana.
6 Ona ui atu lea o Aperamo i le atunuu seʻia oo i le mea e taʻua o Sekema,+ e lata ane i laau maualuluga o Morē;+ ma o le taimi lea sa nonofo ai tagata Kanana i le atunuu.
7 Ua faaali mai Ieova iā Aperamo ma fetalai mai: “Ou te foaʻi atu lenei laueleele+ i lau fanau.”+ Ona ia fausia lea i inā o se fata faitaulaga iā Ieova, o lē na faaali atu iā te ia.
8 Mulimuli ane na ia siitia atu i itu maugā i sasaʻe o Peteli,+ ua ia faatū ai lona faleʻie, o le itu i sisifo o le faleʻie o Peteli, a o le itu i sasaʻe o Ai.+ Ona ia fausia lea i inā o se fata faitaulaga iā Ieova+ ma ua valaau* atu i le suafa o Ieova.+
9 Mulimuli ane ona tuu lea i lalo e Aperamo o faleʻie, a o malaga atu agaʻi i Nekepi*+ ua latou nonofo solo i faleʻie.
10 Ua tupu se oge i le atunuu, ona alu ai lea o Aperamo i Aikupito e aumau ai o se tagata ese,+ ona ua matuā tele le oge i le atunuu.+
11 Ua lata ina oo i Aikupito, ona ia faapea atu lea i lana avā o Sarai: “Faamolemole faalogo mai iā te aʻu. Ou te iloa o oe o se fafine lalelei tele.+
12 Ae pe a vāai tagata Aikupito iā te oe ona latou faapea lea, ‘O lana avā lea.’ O le a latou fasiotia aʻu, ae faasaoina oe.
13 Faamolemole, ia e fai atu o oe o loʻu tuafafine,+ ina ia aua neʻi tupu se mea iā te aʻu ona o oe, ma e ola foʻi aʻu ona o oe.”+
14 Ina ua taunuu Aperamo i Aikupito, ona vāai lea o tagata Aikupito i le fafine, ua matuā lalelei o ia.
15 Ua vāai foʻi i ai perenise a Farao iā te ia ma ua latou viiviia o ia iā Farao, ona ave ai lea o le fafine i le maota o Farao.
16 Ua ia tausia lelei Aperamo ona o ia, ma ua ia avatu iā Aperamo o mamoe, o povi, o asini poʻa ma asini fafine, o kamela atoa ma auauna tane ma auauna fafine.+
17 Ona taia lea e Ieova o Farao ma lona aiga i mala mataʻutia+ ona o Sarai le avā a Aperamo.+
18 Ua aami e Farao o Aperamo ma fai atu: “O le ā lenei mea ua e faia iā te aʻu? Aiseā na e lē fai mai ai iā te aʻu o ia o lau avā?+
19 Aiseā na e fai mai ai, ‘O loʻu tuafafine+ o ia,’ ae o lea ua ou sauni e fai o ia ma aʻu avā? O lau avā lea, ia ave o ia ma oulua ō loa!”
20 Ua poloaʻi atu Farao i ona tagata e faatatau iā te ia, ma ua latou momoli o ia ma lana avā atoa ma ana mea uma.+
Faamatalaga Pito i Lalo
^ O se nuu tāua foʻi.
^ Ua faaalia i le gagana Eperu, e manaʻomia ona faia se gaoioiga ina ia maua ai le faamanuiaga.
^ Po o le “itu i saute,” o lona uiga o le itu i saute o le Nuu Folafolaina.
