Kenese 18:1-33
18 Mulimuli ane ona faaali+ mai lea o Ieova iā te ia i le mea ua iai laau maualuluga o Mamere,+ a o nofo o ia i le faitotoʻa o le faleʻie i le aoauli.+
2 Ina ua ia tepa aʻe,+ ona ia iloa atu lea i se mea e lē mamao tele ni tamāloloa se toʻatolu o loo tutū mai. Ua ia vaaia i latou ona tamoʻe atu lea mai i le faitotoʻa o lona faleʻie e faafeiloaʻi i latou, ma ua ia ifo i le eleele.+
3 Ua faapea atu: “Ieova e, afai ua e finagalo malie iā te aʻu, faamolemole aua neʻi e maliu ese mai i lau auauna.+
4 Seʻi aumai sina vai e fufulu ai o outou aao.+ Ona outou mālōlō ai lea i lalo o le laau.+
5 Seʻi oʻu aumaia sina mea tausami e tou te laulelei ai.+ Pe a māeʻa, ona outou talaaao ai lea auā o le mea lea ua outou ō mai ai iā te aʻu, o la outou auauna, ina ia ou faia faapea.” Ona latou tali mai lea: “Ua lelei. Ia faia e pei ona e fai mai ai.”
6 Ua faavave atu Aperaamo i le faleʻie iā Sara ma faapea atu: “Ia vave, aumai ni sea* e tolu o falaoamata lelei, ia palu le paluga ma fai ai ni falaoa.”+
7 Ona tamoʻe atu lea o Aperaamo i lana lafu povi, ma aumai le tamaʻi povi poʻa peti lelei ma avatu i lana auauna, ua ia faavave ona saunia.+
8 Ua ia ave le pata, suāsusu ma le tamaʻi povi poʻa na ia saunia, ma laulau atu i o latou luma.+ Ona ia tū ai pea lea e latalata ane i lalo o le laau, a o latou taumamafa.+
9 Ua latou faapea ane iā te ia: “O fea o iai Sara lau avā?”+ Ona ia tali atu lea: “O loo i le faleʻie!”+
10 Ua ia toe faapea mai: “E mautinoa lava ou te toe sau i le taimi faapenei i le tausaga a sau, faauta! e maua e lau avā o Sara se tama tama.”+ Ua faalogologo mai foʻi Sara i le faitotoʻa o le faleʻie, lea e i tua o le tamāloa.
11 Ua matutua Aperaamo ma Sara ua tele foʻi o la tausaga.+ Ua lē toe faia e Sara le maʻi masina.+
12 Ona ʻataʻata lea o Sara iā te ia lava,+ ma faapea ifo: “Pe e faamalieina ea aʻu ae ua ou loomatua, ma ua toeaina foʻi loʻu alii?”+
13 Ua fetalai mai Ieova iā Aperaamo: “Aiseā ua ʻataʻata ai Sara ma faapea ane, ‘Pe moni ea o le a ou fanau e ui ina ua ou loomatua?’+
14 Pe e iai ea se mea e faigatā iā Ieova?+ Ou te toe sau iā te oe i le taimi faapenei i le tausaga a sau, ma e maua ai e Sara se tama tama.”
15 A ua faafiti Sara ma faapea ane: “Ou te leʻi ʻataʻata lava!” Auā ua fefe o ia. Ona fetalai mai lea o ia: “E leai! na e ʻataʻata lava.”+
16 Mulimuli ane, ua ō ese tamāloloa mai i lea nofoaga, ua latou vāai atu i Sotoma,+ ma ua latou savavali ma Aperaamo e momoli i latou.+
17 Ua fetalai mai Ieova: “Ou te natia ea mai iā Aperaamo mea o le a ou faia?+
18 E mautinoa o le a fai Aperaamo ma tupuga o se nuu tele ma malosi, ma e maua e nuu uma o le lalolagi faamanuiaga* ona o ia.+
19 Ua ou mafuta vavalalata atu iā te ia, ina ia mafai ona ia poloaʻi atu i ona atalii ma lona aiga pe a mavae o ia, ia latou tausia ala o Ieova ma fai le amiotonu ma le faamasinotonu;+ ina ia faataunuuina e Ieova iā Aperaamo mea na ia folafola mai ai.”+
20 Ona fetalai mai ai lea o Ieova: “O le alaga o le faaseā e faatatau iā Sotoma ma Komoro,+ ua matuā leotele lava, ma ua matuā mamafa a latou agasala.+
21 Ua ou maumauaʻi e alu ifo ina ia ou iloa ai po ua latou amioaʻi e tusa ma le alaga ua oo mai iā te aʻu, ma afai e leai, ona ou iloa ai lea.”+
22 Ona ō ese mai lea o tamāloloa ma agaʻi atu i Sotoma; a o loo tulaʻi pea Ieova+ i luma o Aperaamo.+
23 Ua faalatalata atu Aperaamo ma faapea atu: “Pe e te faaumatia ea o ē e amiotonu faatasi ma ē e amioleaga?+
24 Seʻi faapea e toʻalima sefulu tagata amiotonu o i le aai. Pe e te faaumatia ea le aai atoa ae lē faamagalo le aai ona o tagata amiotonu e toʻalima sefulu o loo iai?+
25 E lē taitai ona e finagalo e faaumatia tagata amiotonu faatasi ma ē e amioleaga, e tasi le mea e oo i le tagata amiotonu ma lē e amioleaga!+ E lē taitai ona e finagalo faapea.+ Pe e lē faia ea e le Faamasino o le lalolagi uma le mea ua tonu?”+
26 Ona fetalai mai lea o Ieova: “Afai ou te maua i Sotoma o tagata amiotonu e toʻalima sefulu i le aai, ou te faamagaloina le aai atoa ona o i latou.”+
27 Ae ua tali atu Aperaamo e faapea: “Faamolemole, ua ou faamalosi ona ou tautala atu iā Ieova, a o aʻu o le efuefu ma le lefulefu.+
28 Seʻi faapea ua toe toʻalima ona atoa lea o le toʻalima sefulu. Pe e te faaumatia ea le aai atoa ona o lenā toʻalima?” Ona ia fetalai mai lea: “Afai ou te maua i inā le toʻafā sefulu lima, ou te lē faaumatiaina le aai.”+
29 Ua ia toe faapea atu iā te ia: “Seʻi faapea e maua i inā le toʻafā sefulu.” Ona ia fetalai mai lea: “Ou te lē faaumatia le aai ona o i latou e toʻafā sefulu.”
30 Ua ia faapea atili atu: “Faamolemole Ieova, aua e te toʻatamaʻi+ ae seʻi oʻu fai atu pea:+ Seʻi faapea e maua i inā le toʻatolu sefulu.” Ua ia fetalai mai: “Ou te lē faaumatia i latou pe afai ou te maua i inā le toʻatolu sefulu.”
31 Ua ia faapea atili atu: “Faamolemole, ua ou faamalosi ona ou tautala atu iā Ieova:+ Seʻi faapea e maua i inā le toʻalua sefulu.” Ua ia fetalai mai: “Ou te lē faaumatia le aai ona o i latou e toʻalua sefulu.”+
32 Ona ia fai atu lea: “Faamolemole Ieova, seʻi aua e te toʻatamaʻi+ ae seʻi oʻu toe fai atu tasi lava:+ Seʻi faapea e maua i inā le toʻasefulu.” Ua ia fetalai mai: “Ou te lē faaumatia le aai ona o i latou e toʻasefulu.”+
33 Ona afio aʻe lea o Ieova+ ina ua māeʻa ona la talanoa ma Aperaamo, a ua toe foʻi atu Aperaamo i le mea o nofo ai.
Faamatalaga Pito i Lalo
^ O le “sea” o le fua o se mea pe tusa ma le 10 kilokalama.
^ Ua faaalia i le gagana Eperu, e manaʻomia ona faia se gaoioiga ina ia maua ai le faamanuiaga.
