Kenese 21:1-34
21 Ua silasila mai Ieova iā Sara e pei ona ia fetalai mai ai, ua faia foʻi e Ieova iā Sara e tusa ma lana fetalaiga.+
2 Ua tō+ Sara, ona ia fanaua lea o le atalii o Aperaamo ina ua toeaina o ia, i le taimi atofaina lea na fetalai mai ai le Atua iā Aperaamo.+
3 Ona faaigoa lea e Aperaamo o lona atalii na fanaua iā te ia, o lē na fanau mai iā Sara, o Isaako.+
4 Ua peritomeina e Aperaamo o Isaako lona atalii ina ua valu aso le matua, e pei ona poloaʻi mai ai le Atua iā te ia.+
5 Ua selau tausaga o Aperaamo ina ua fanau mai lona atalii o Isaako.
6 Ona faapea ane lea o Sara: “Ua faia e le Atua se mea ou te ata ai: o i latou uma e faalogo i lenei mea, latou te toē faatasi ma aʻu.”+
7 Ua fai ane foʻi Sara: “O ai e manatu, ‘E faasusu e Sara se fanau,’ ma fai atu lenā tala iā Aperaamo, o lea ua ou fanauina lona atalii ina ua toeaina o ia?”
8 Ua tupu pea le tamaitiiti ma ua teʻa ma le susu;+ ona saunia lea e Aperaamo o se taumafataga tele i le aso na teʻa ai Isaako ma le susu.
9 Ua mātauina pea e Sara le aamu+ o le tama a Akara, le fafine Aikupito+ lea sa fanau iā Aperaamo, iā Isaako.
10 Ona ia faapea atu lea iā Aperaamo: “Ia tuliese lenei teine pologa ma lana tama, auā e lē taitai ona avea ma suli le tama a le teine pologa faatasi ma laʻu tama, o Isaako!”+
11 A ua tigā Aperaamo ona o le mea ua fai atu ai e faatatau i lona atalii.+
12 Ona fetalai mai lea o le Atua iā Aperaamo: “Aua e te tigā i le mea ua fai atu ai Sara iā te oe e uiga i le tama ma lau teine pologa. Ia faalogo iā te ia, auā o lē e taʻua o lau fanau, e ala mai iā Isaako.+
13 O le tama foʻi a le teine pologa,+ ou te fai o ia ma tupuaga o se nuu, auā o lou atalii o ia.”+
14 Ua usu Aperaamo i le taeaopō, ua ia ave le falaoa ma le faguvai e fai mai i paʻu o manu, ma faaee i luga o tauʻau o Akara,+ ona ia aumaia lea o le tama+ ma tuu atu i laʻua e ō. Ua ia alu ma fealuaʻi solo i le toafa o Peresepa.+
15 Mulimuli ane, ua uma+ le vai sa i totonu o le fagu e fai mai i paʻu o manu, ona ia tuu+ lea o le tama i lalo o se tasi o laau itiiti.
16 Ua alu o ia ma nofo na o ia i le mamao e tusa ma le mea e paʻū atu i ai le aū pe a fana atu, auā ua ia faapea ane: “Ou te lē manaʻo e vaai atu i laʻu tama ua oti.”+ Ua nofo o ia i le mamao lava lenā ma tagi leotele ai.+
17 Ona faafofoga lea o le Atua i le leo o le tama,+ ma ua valaau mai le agelu a le Atua iā Akara mai i le lagi, ua faapea mai iā te ia:+ “Akara, aiseā ua e tagi ai? Aua e te fefe auā ua faafofoga le Atua i le leo o le tama mai i le mea ua iai o ia.
18 Inā tulaʻi ia, ia faatū i luga le tama ma fusi mau o ia, auā ou te faia o ia ma tupuaga o se nuu tele.”+
19 Ua faapupulaina e le Atua ona mata, ona ia iloa atu lea o se vaieli;+ ua ia alu atu ma faatumu i vai le fagupaʻu, ma avatu i le tama e inu ai.
20 Ua faamanuia pea le Atua i le tama,+ ua tupu o ia ma ua nofo pea i le toafa; ma ua avea o se tagata fanafana aū.+
21 Ona ia nofo ai lea i le toafa o Parana,+ ma ua aumaia e lona tinā se avā mo ia mai i le atunuu o Aikupito.
22 Ua oo i lenā taimi, ona faapea mai lea o Apimeleko ma Fikolu le pule o ana ʻautau iā Aperaamo: “Ua ma iloa e faatasi le Atua ma oe i mea uma e te faia.+
23 Ia e tautō mai iā te aʻu i le Atua,+ e te lē pepelo iā te aʻu, po o laʻu fanau ma fanau a laʻu fanau;+ ma e pei o loʻu alofa faamaoni i a ta feutagaʻiga,+ e faapena foʻi ona e feutagaʻi ma aʻu ma le atunuu ua e aumau ai o se tagata ese.”+
24 Ona faapea atu lea o Aperaamo: “Ou te tautō atu nei.”+
25 Ua matuā faaseā atu Aperaamo iā Apimeleko e tusa ma le vaieli lea na faoa faamalosi e auauna a Apimeleko,+
26 ona fai mai lea o Apimeleko: “Ou te lē iloa po o ai na faia lenei mea, e te leʻi logo maia foʻi aʻu, ma o aʻu nei foʻi, faatoʻā ou faalogo atu i lenei mea i le asō.”+
27 Ona avatu lea e Aperaamo o mamoe ma povi iā Apimeleko,+ ma ua faia faatasi e i laʻua se feagaiga.+
28 Ua tuu ese e Aperaamo tamaʻi mamoe fafine e fitu o le lafu,
29 ona fai mai lea o Apimeleko iā Aperaamo: “Aiseā ua e tuu ese ai ia tamaʻi mamoe fafine e fitu?”
30 Ua ia tali atu: “Ia e taliaina nei tamaʻi mamoe e fitu mai iā te aʻu, e fai ma molimau+ ua ou eliina lenei vaieli.”
31 O le mea lea na taʻua ai lenā nofoaga o Peresepa,*+ auā na faia e i laʻua uma i inā se tautoga.
32 O lea ua la osia ai se feagaiga+ i Peresepa, ona ō ai lea o Apimeleko faatasi ma Fikolu le pule o ana ʻautau ma toe foʻi atu i Filisitia.+
33 Mulimuli ane, ona ia totōina lea o le laau o le tamarisi* i Peresepa ma ua ia vivii atu i le suafa o Ieova,+ o le Atua o loo soifua e faavavau.+
34 Ua toe aumau Aperaamo o se tagata ese i Filisitia mo nisi aso e tele.+
Faamatalaga Pito i Lalo
^ O lona uiga, o le “Vaieli o le Tautoga.”
^ O lenei laau e mafai ona ola i laufanua e utiuti ai le vai. O le upu Peretania o le Tamarisk.
