Kenese 24:1-67
24 Ua toeaina Aperaamo, ua tele foʻi ona tausaga; ma ua faamanuia e Ieova Aperaamo i mea uma.+
2 Ua fai atu Aperaamo i lana auauna, o lē e aupito i matua i lona aiga, o lē e pule foʻi i ana mea uma:+ “Faamolemole, seʻi tuu mai lou lima i lalo o loʻu ogāvae,+
3 ma ou te manaʻo e te tautō i le suafa o Ieova,+ le Atua o le lagi, o le Atua foʻi o le lalolagi, e te lē aumaia se avā a loʻu atalii mai i afafine o tagata Kanana lea ou te aumau ai,+
4 ae ia e alu i loʻu atunuu ma loʻu aiga,+ e aumai ai se avā ma loʻu atalii, o Isaako.”
5 Peitaʻi, ua tali mai lana auauna iā te ia: “Ae faapefea pe a lē lotomalie le tamaʻitaʻi ma te ō mai faatasi i lenei atunuu? Pe e tatau ona ou faamautinoa e faafoʻi atu lou atalii i le atunuu na e sau ai?”+
6 Ona faapea atu lea o Aperaamo iā te ia: “Ia e nofouta aua neʻi e toe faafoʻi loʻu atalii i inā.+
7 O Ieova o le Atua o le lagi, o lē na aumaia aʻu mai i le aiga o loʻu tamā, mai i le atunuu o oʻu aiga,+ na fetalai mai iā te aʻu ma tautō mai iā te aʻu+ e faapea, ‘Ou te avatu lenei laueleele+ i lau fanau,’+ o le a ia auina mai lana agelu e muamua atu iā te oe,+ ma o le a e aumaia se avā ma loʻu atalii mai i lea mea.+
8 Ae afai e lē lotomalie le tamaʻitaʻi lua te ō mai, e tuusaʻoloto oe mai i lenei tautoga na e fai mai ai iā te aʻu.+ Tau ina ia aua neʻi e toe faafoʻi loʻu atalii i lea mea.”
9 Ona tuu lea e le auauna o lona lima i lalo o le ogāvae o Aperaamo lona matai, ma tautō ai e tusa ma lea mataupu.+
10 Ua ave e le auauna o kamela e sefulu mai i kamela a lona matai, ua ia ave foʻi i lona lima o meaalofa eseese a lona matai.+ Ua ia tulaʻi ma agaʻi atu i le aai o Nakori i Mesopotamia.
11 Mulimuli ane, ua ia taunuu atu i le vaieli i tua o le aai i le afiafi,+ ona mapu lea o le malaga ina ia mālōlō kamela, a o le taimi lea e masani ona ō ane ai fafine mai i le aai e asu vai.+
12 Ua ia faapea atu: “Ieova e, le Atua o Aperaamo+ loʻu matai, faamolemole ia faamanuia mai i aʻu taumafaiga i lenei aso, ma ia faaalia le alofa faamaoni+ i loʻu matai o Aperaamo.+
13 O lenei ua ou tū i le vaipuna, ma o loo ō mai afafine o tagata o le aai e asu vai.+
14 Ia faapenei ona faia, o le tamaʻitaʻi talavou ou te fai atu i ai, ‘Faamolemole, seʻi tuu ifo i lalo lau faguvai ina ia ou inu ai,’ ma o lē e faapea mai, ‘Inā inu ia, ma ou te faainu foʻi i au kamela,’ o ia lenā ua e filifilia mo lau auauna,+ o Isaako; ma e ala i lenei mea ou te iloa ai, ua e faaalia le alofa faamaoni i loʻu matai.”+
15 E leʻi uma atu lana faamatalaga,+ vaai foʻi, ua savali mai Repeka, le afafine o Petueli,+ le tama a Meleka,+ le avā a Nakori,+ le uso o Aperaamo, ma lana faguvai i ona tauʻau.+
16 Ua matuā lalelei+ lava le tamaʻitaʻi talavou, o ia o se teine muli e leʻi feusuaʻi lava ma se tamāloa;+ ua agaʻi ifo i le vaipuna ma faatumu ana faguvai, ona alu aʻe lea i luga.
17 Ua tamoʻe atu le auauna e faafeiloaʻi iā te ia ma faapea atu: “Faamolemole, aumai sina vai soʻu inu ai mai i lau faguvai.”+
18 Ua ia tali mai: “Loʻu alii e, taumafa ia.” Ua vave ona ia tuu i lalo lana faguvai i ona lima, ma tuu atu iā te ia e inu ai.+
19 Ina ua uma ona ia avatu iā te ia le vai, ona ia faapea mai lea: “Ou te asu mai foʻi ni vai ma faainu i au kamela seʻia malilie.”+
20 Ua ia faavave ona sasaa o lana faguvai i le faatanoa e faainu ai manu, ua ia fefoʻifoʻiaʻi i le vaieli e asu mai vai,+ ma asu mai pea vai mo ana kamela uma.
21 Ua vaai ma le ofo le tamāloa iā te ia, ua ia manatunatu po ua faamanuia mai Ieova i lana malaga pe e leai.+
22 Ina ua uma ona feinu kamela, ona avatu lea e le tamāloa o le mama auro o le isu+ e tusa ma le ʻafa sekeli le mamafa, ma taulima+ e lua mo ona lima, e tusa ma le sefulu sekeli le mamafa,
23 ma ua ia faapea atili atu: “O oe o se afafine o ai? Faamolemole taʻu mai iā te aʻu. Pe e avanoa le fale o lou tamā matou te momoe ai nanei?”+
24 Ona ia tali mai lea iā te ia: “O aʻu o le afafine o Petueli,+ o le tama a Meleka na ia fanaua mai iā Nakori.”+
25 Ua ia toe faapea mai iā te ia: “Ua iā i matou o vao mamago ma le tele o meaʻai a manu, ma se mea e momoe ai i le pō.”+
26 Ona punou lea ma faapaʻū faō le tamāloa i luma o Ieova+
27 ma faapea atu: “Ia faamamaluina Ieova+ le Atua o Aperaamo loʻu matai, o lē ua faaalia pea lona alofa faamaoni ma lona maufaatuatuaina i loʻu matai. Na ou i le ala, ona taʻitaʻiina lea o aʻu e Ieova i le fale o uso o loʻu matai.”+
28 Ua tamoʻe atu le tamaʻitaʻi talavou ma faamatala iā i latou i le aiga o lona tinā nei mea uma.
29 E iai le tuagane o Repeka, o lona igoa o Lapana.+ Ona tamoʻe mai lea o Lapana i le tamāloa o loo i le vaipuna i tua o le aai.
30 Talu ai ua ia vaai atu i le mama o le isu ma taulima+ a lona tuafafine, ma faalogo atu i upu a lona tuafafine o Repeka e faapea: “O mea nei na taʻu mai e le tamāloa iā te aʻu,” ona ia alu lea i le tamāloa ma maua o ia o loo tū i autafa o kamela i luga o le vaipuna.
31 Ua ia faapea mai: “Maliu mai ia, o oe o lē ua faamanuia e Ieova.+ Aiseā ua e tū ai i inā, ae o lea ua uma ona ou teuina le fale ma saunia se mea e tuu ai au kamela?”
32 Ona sau ai lea o le tamāloa i le fale, a ua tatala e Lapana nofoa o kamela, ua ia avatu vao mamago ma meaʻai i kamela, ma vai e fufulu ai vae o le tamāloa, ma vae o tamāloloa ua faatasi ma ia.+
33 Ua laulau atu le meaʻai i luma o le tamāloa, ae ua ia faapea atu: “Ou te lē ʻai lava seʻiloga ua faailoa atu laʻu mataupu.” Ona ia faapea mai lea: “Ia saunoa ia!”+
34 Ona ia faapea atu lea: “O aʻu o le auauna a Aperaamo.+
35 Ua matuā faamanuiaina e Ieova loʻu matai i le faatamaoaigaina o ia, ma ua foaʻi mai iā te ia o mamoe, o povi, o siliva, o auro, o auauna tane, o auauna fafine, o kamela atoa ma asini.+
36 Ua fanaua foʻi e Sara, le faletua o loʻu matai se tama tama ina ua loomatua o ia;+ ma o le a tuu atu iā te ia e loʻu matai mea uma lava.+
37 Na fai mai loʻu matai iā te aʻu ia ou tautō, auā ua ia faapea mai, ‘Aua e te aumaia se avā a loʻu atalii mai i afafine o tagata Kanana, le atunuu ua ou aumau ai.+
38 E leai, ae ia e alu i le aiga o loʻu tamā ma loʻu aiga,+ ma ia aumai ai se avā ma loʻu atalii.’+
39 Ae na ou fai atu i loʻu matai, ‘Ae faapefea pe a lē lotomalie le tamaʻitaʻi ma te ō mai?’+
40 Ona ia faapea mai lea iā te aʻu, ‘E auina mai e Ieova, o lē ua ou savali ai i ona luma,+ lana agelu+ ia faatasi ma oe, ma e na te faamanuia lau malaga;+ ia e aumai se avā ma loʻu atalii mai i loʻu aiga ma le aiga o loʻu tamā.+
41 E tuusaʻoloto oe mai i le tausia o le tautoga pe afai e te alu i loʻu aiga ae ua lē avatu e i latou o ia iā te oe, ona e saʻoloto ai lea mai i le tausia o le tautoga iā te aʻu.’+
42 “Ina ua ou oo mai i le vaipuna i le asō, ona ou faapea ifo lea, ‘Ieova e, le Atua o loʻu matai o Aperaamo, pe afai e te faamanuia laʻu malaga ua ou sau ai,+ o le mea lenei e tatau ona tupu,
43 a o oʻu tū i autafa o le vaipuna, o le tamaʻitaʻi+ e sau e asu vai, ou te fai atu i ai: “Faamolemole aumai sina vai mai i lau faguvai seʻi ou inu ai,”
44 ma o lē e fai mai iā te aʻu: “Inā inu ia i le vai ma ou te asu foʻi le vai e faainu ai au kamela,” o le tamaʻitaʻi lea ua filifilia e Ieova mo le atalii o loʻu matai.’+
45 “E leʻi pine lava ona ou faapea ifo+ lea i loʻu loto,+ vaai foʻi, ua sau Repeka ma lana faguvai i ona tauʻau; ma alu ifo i le vaipuna e asu vai.+ Ona ou fai atu lea iā te ia, ‘Faamolemole aumai sina vai seʻi ou inu ai.’+
46 Ua faavave ona ia tuu i lalo lana faguvai ma faapea mai, ‘Inā taumafa ia,+ ma ou te faainu foʻi i au kamela.’ Ona ou inu ai lea, ma na ia faainu foʻi i kamela.
47 Ona ou fesili atu lea iā te ia e faapea, ‘O oe o se afafine o ai?’+ ua tali mai, ‘O aʻu o le afafine o Petueli le atalii o Nakori, lea na ia fanaua mai iā Meleka.’ Ona ou tuu lea o le mama i lona isu ma taulima i ona lima.+
48 Ona ou punou lea ma faapaʻū faō i luma o Ieova ma faamamaluina Ieova, o le Atua o Aperaamo+ loʻu matai, o lē na taʻitaʻiina aʻu i le ala saʻo+ e aumai ai le afafine o le uso o loʻu matai ma lona atalii.
49 Afai ua e faaalia le alofa faamaoni ma le maufaatuatuaina i loʻu matai,+ ia e faailoa mai iā te aʻu; afai e leai, ia e faailoa mai iā te aʻu, ina ia ou faasaga ai i le itu taumatau po o le itu tauagavale.”+
50 Ua tali mai Lapana ma Petueli: “Ona o lenei mataupu e mai iā Ieova,+ e lē tatau la iā i maʻua ona fai atu ioe pe e leai.+
51 Ia o Repeka lenā. Ia ave loa o ia ma ō, ma ia fai o ia ma avā a le atalii o lou matai, e pei ona fetalai mai ai Ieova.”+
52 Ua faalogo le auauna a Aperaamo i ia upu, ona ia faapaʻū faō loa lea i le eleele i luma o Ieova.+
53 Ua ia aumaia o mea siliva, o mea auro atoa ma ofu ma avatu iā Repeka; ua ia avatu meaalofa i lona tuagane ma lona tinā.+
54 Ona latou aai lea ma feinu, o ia ma tamāloloa na latou ō mai ma ia, ma ua latou momoe i inā i le pō, ua latou feala i le taeao.
Ona fai atu lea o le auauna: “Tuu mai aʻu ou te alu i loʻu matai.”+
55 Ua fai mai lona tuagane ma lona tinā: “Seʻi o matou nonofo ma le teine talavou mo ni aso se sefulu. Pe a mavae lenā ona ia alu ai lea.”
56 Ae ua ia faapea atu iā i laʻua: “Aua lua te taofia aʻu, auā ua faamanuia Ieova i laʻu malaga.+ Ia tuu mai aʻu ina ia ou alu i loʻu matai.”+
57 Ona la faapea mai lea: “Seʻi o ma valaau i le teine talavou ma fesili iā te ia i sona manatu.”+
58 Ona la valaau lea iā Repeka ma faapea atu iā te ia: “Pe lua te ō ma lenei tamāloa?” Ua ia tali mai: “Ua ou lotomalie ma te ō.”+
59 Ua latou aauina atu o Repeka+ lo latou tuafafine, ma lē na faafaileleina o ia,+ o le auauna a Aperaamo, atoa ma tagata ua faatasi ma ia.
60 Ua latou faamanuia iā Repeka ma faapea atu iā te ia: “O oe o lo matou tuafafine, ia afe o afe lau fanau e faatele i le sefulu afe, ma ia pule lau fanau i le faitotoʻa o ē e ita iā i latou.”+
61 Ona tulaʻi lea o Repeka ma ana auauna teine,+ ua latou tiʻetiʻe i kamela+ ma mulimuli atu i le tamāloa; ua aumaia e le auauna Repeka ona latou ō ai lea.
62 Ua sau Isaako mai i le ala e agaʻi i Pere-laaroi,+ auā ua nofo o ia i le laueleele o Nekepi.+
63 Ua savalivali solo Isaako i le fanua i le afiafipō ina ia mafaufau loloto ai.+ Ua tepa aʻe o ia, ma ia iloa atu ai o kamela o loo ō mai!
64 Ina ua tepa aʻe Repeka, ua ia iloa atu Isaako, ona ia alu ifo ai lea mai i le kamela.
65 Ua ia fesili atu i le auauna: “O ai le tauleʻaleʻa lale e agaʻi mai e faafetaui i tatou?” ua tali mai le auauna: “O loʻu matai o ia.” Ona tago lea o ia i le ufimata ma ufiufi ai ona mata.+
66 Ona faamatala lea e le auauna iā Isaako o mea uma na ia faia.
67 Ona ave lea e Isaako o Repeka i le faleʻie o Sara lona tinā.+ Ua ia ave o ia ma fai ma ana avā;+ ua alofa lava Isaako iā te ia,+ ma ua faatoʻā faamāfanafanaina ai o ia talu ona oti lona tinā.+
