Kenese 25:1-34
25 Ua toe fai avā Aperaamo i se fafine, o Kitura+ lona igoa.
2 Mulimuli ane, ua ia fanaua o Semerana, o Iokasana, o Metana, o Mitiana,+ o Isepaka ma Sua.+
3 O atalii o Iokasana, o Seepa+ ma Titana.+
O atalii o Titana o Asurimo, o Letusimo ma Leumemo.
4 O atalii o Mitiana o Efa,+ o Efara, o Hanoka, o Apita ma Eletaa.+
O fanau uma nei a Kitura.
5 Mulimuli ane ona tuu atu lea e Aperaamo o ana mea uma iā Isaako,+
6 ae ua avatu e Aperaamo meaalofa+ i ona atalii na maua mai i ana palake. A o ola pea o ia, ua ia aauina ese atu i latou mai i lona atalii+ o Isaako, i le itu i sasaʻe i le mea ua taʻua o atunuu i Sasaʻe.+
7 O tausaga nei o le olaga o Aperaamo, sa ola o ia mo le selau fitu sefulu lima tausaga.
8 Ona maliu lea o Aperaamo ina ua matuā toeaina lava, ua matua tele ma ua faamalieina o ia i le olaga, ua faatasia foʻi o ia ma ona tagata.+
9 Ua tanu o ia e ona atalii o Isaako ma Isamaeli i le ana o Makapelu, i le fanua o Eferona le atalii o Soaro le tagata Hetī, lea o loo i luma o Mamere,+
10 o le fanua na faatau e Aperaamo mai i atalii o Heti. O i inā ua tanu ai Aperaamo i le mea sa tanu ai lana avā o Sara.+
11 Ua mavae le maliu o Aperaamo, a ua faamanuia pea le Atua i lona atalii o Isaako,+ ma ua nofo Isaako e latalata i Pere-laaroi.+
12 O le talaaga lenei o Isamaeli+ le atalii o Aperaamo+ na ia fanaua mai iā Akara le Aikupito, le auauna teine a Sara.
13 O igoa nei o atalii o Isamaeli, e tusa ma tupuaga o o latou aiga: O le ulumatua a Isamaeli, o Nepaiota+ ia, ma Kitara,+ ma Atepeelu, ma Mepesama,+
14 ma Mesema, ma Tuma, ma Maase,
15 o Atata,+ o Tema,+ o Ietura, o Nafiso ma Katema.+
16 O atalii ia o Isamaeli, o o latou igoa ia e tusa ma o latou nofoaga ma o latou togālauapi ua siʻomia i pā:+ e sefulu lua taʻitaʻi e tusa ma o latou ʻauaiga.+
17 O tausaga nei o le olaga o Isamaeli, e selau tolu sefulu fitu tausaga. Ona oti lea o ia ma ua faatasia ma ona tagata.+
18 Ua nonofo i latou i faleʻie mai i le vaipanoa o Havila+ e lata ane i Sura,+ lea e latalata i Aikupito e oo atu i Asuria. Ua nofo o ia i luma o ona uso.+
19 O le talaaga lenei o Isaako le atalii o Aperaamo.+
Ua fanaua e Aperaamo o Isaako.
20 E fā sefulu tausaga o Isaako ina ua fai ma ana avā o Repeka, le afafine o Petueli+ le Suria+ mai i Patanarama, o le tuafafine foʻi o Lapana le Suria.
21 Ua ʻaiʻoi atu pea Isaako iā Ieova ona o lana avā,+ auā e lē fanau o ia;+ ua faafofoga Ieova i lana ʻaiʻoi atu,+ ma ua tō ai Repeka lana avā.
22 Ua tauivi tamaiti ua i totonu iā te ia,+ o lea ua ia faapea ifo ai: “Afai ou te mafatia faapenei, o le ā ea le aogā ou te toe ola ai?” O lea ua ia ōle atu ai iā Ieova+ e tusa ma lenei mataupu.
23 Ona fetalai mai lea o Ieova iā te ia: “E lua nuu o loo i lou manava,+ ma e lua nuu eseese e fanau mai iā te oe;+ e sili atu ona malosi le tasi nuu nai lo o le isi,+ ma e auauna le ulumatua i le uii.”+
24 Ua oo i ona aso e fanau ai o ia, faauta foʻi! ua iai se masaga i lona manava.+
25 O lē ua fanau muamua mai ua mūmū o ia, ua pei lona tino atoa o se ofu fulufulu;+ ona faaigoa lea o ia o Esau.*+
26 Ona fanau mai lea o lona uso ma ua ia uu le mulivae o Esau i lona lima;+ ua faaigoa e Isaako o ia o Iakopo.*+ E ono sefulu tausaga o Isaako ina ua fanaua e Repeka i laʻua.
27 Ua matutua tama, ma ua poto Esau e tulimanu,+ o ia o le tagata o le vao, a o Iakopo o ia o se tagata e lē ponā+ e nofo i faleʻie.+
28 Ua alofa Isaako iā Esau ona e na te aumaia ni manu e ʻai ai o ia, a o Repeka ua alofa o ia iā Iakopo.+
29 I se tasi aso a o fai le sitiū a Iakopo, ua sau Esau mai i le vao ma ua matuā lēlavā lava.
30 Ona fai atu lea o Esau iā Iakopo: “Faamolemole, seʻi aumai faavave sina sitiū mūmū, le sitiū mūmū lenā soʻu ʻai ai, ona ua ou matuā lēlavā lava!” O le mea lea ua faaigoa ai o ia o Etoma.*+
31 Ua fai mai Iakopo: “Ia faatau muamua mai iā te aʻu lou tofi o le ulumatua!”+
32 Ua faapea atu Esau: “O lenei o le a ou oti, ae o le ā le aogā o lea tofi iā te aʻu?”
33 Ua toe faapea mai Iakopo: “Ia e tautō muamua mai iā te aʻu!”+ Ona tautō lea o Esau iā te ia ma faatau atu lona tofi o le ulumatua iā Iakopo.+
34 Ua avatu e Iakopo iā Esau le falaoa ma le sitiū pi, ua ia ʻai ma inu.+ Ona ia tulaʻi lea ma alu. O lea, ua ʻinoʻino Esau i le tofi o le ulumatua.+
Faamatalaga Pito i Lalo
^ O le uiga o lona igoa, e “Taufulufulua.”
^ O lona uiga, ua “Uu le Mulivae i Lona Lima” pe “Suitulaga.”
^ O lona uiga, e “Mūmū Enaena.”
