Kenese 29:1-35
29 Ona alu lea o Iakopo ma malaga atu i le laueleele o tagata i Sasaʻe.+
2 Ua ia vaai ma iloa atu le vaieli i le fanua, ua taooto ai i tafatafa ni lafu mamoe se tolu, auā e masani ona latou faainu lafu mamoe mai i le vaieli;+ ma ua iai se maa telē i le gutu o le vaieli.+
3 Pe a faapotopoto i inā ia lafu uma, latou te fuliese le maa mai i le gutu o le vaieli, ma latou faainu ai lafu mamoe, pe a uma ona latou toe fuli lea o le maa i le mea sa iai i le gutu o le vaieli.
4 Ua fesili atu Iakopo iā i latou: “Oʻu uso e, o fea le mea tou te ō mai ai?” ua latou tali mai: “E matou te ō mai, mai i Karana.”+
5 Ua fai atu o ia iā i latou: “Pe tou te iloa Lapana+ le atalii o le atalii o Nakori?”+ ona latou tali mai lea: “Matou te iloa o ia.”
6 Ona ia faapea atu loa lea iā i latou: “Po o manuia o ia?”+ Ona latou tali mai lea: “O loo manuia o ia. A lale e sau Rasela+ lona afafine ma mamoe!”+
7 Ua ia faapea atu: “E leʻi taitai le aso. E leʻi oo i le taimi e faapotopoto ai lafu. Ia faainu mamoe ona fafaga ai lea.”+
8 A ua latou faapea mai: “E sā ona matou faia faapea seʻia faapotopoto mai lafu uma, ona latou fuliese lea o le maa mai le gutu o le vaieli. Ona matou faainu ai lea o mamoe.”
9 A o ia talanoa atu iā i latou, ua sau Rasela+ ma mamoe a lona tamā, auā o ia o le teine leoleo mamoe.+
10 Ua vaai atu Iakopo iā Rasela le afafine o Lapana le tuagane o lona tinā, ma le lafu mamoe a Lapana le tuagane o lona tinā, ona ia faavave lea ona fuliese le maa mai i le gutu o le vaieli ma faainu mamoe a Lapana le tuagane o lona tinā.+
11 Ona sogi+ atu lea o Iakopo iā Rasela, ua ia tagi leotele ma maligi ona loimata.+
12 Ua taʻu atu e Iakopo iā Rasela, o ia o le uso+ o lona tamā ma o ia o le tama a Repeka. Ona tamoʻe lea o Rasela ma taʻu atu i lona tamā.+
13 Ina ua logotala Lapana e uiga iā Iakopo le tama a lona tuafafine, ona ia tamoʻe lea e faafeiloaʻi iā te ia.+ Ua ia fusi ma sogi iā te ia ma ave o ia i lona fale.+ Ua faamatala atu e Iakopo iā Lapana o mea uma na tutupu iā te ia.
14 Ona fai mai lea o Lapana iā te ia: “O oe lava o oʻu ivi ma oʻu aano.”+ Ona la nonofo lea mo le masina atoa.
15 Mulimuli ane ua fai mai Lapana iā Iakopo: “Pe e tatau ona e galue fua+ mo aʻu, e ui ta te aiga?+ Ia taʻu mai iā te aʻu, Pe e fia sou totogi e te manaʻo i ai?”+
16 E iai afafine e toʻalua o Lapana. O le igoa o le ulumatua o Lea,+ a o le laʻitiiti o Rasela.
17 E lē mata manaia Lea a o Rasela+ ua manaia lona fuaitino ma lalelei ona foliga.+
18 Ua alofa tele Iakopo iā Rasela. Ona ia faapea atu lea: “Ua ou lotomalie e galue mo oe i tausaga e fitu mo Rasela lou afafine laʻitiiti.”+
19 Ua fai mai Lapana: “E sili iā te aʻu ona ou avatu o ia iā te oe, nai lo o loʻu avatu o ia i se isi tamāloa.+ Ia ta nonofo pea ia.”
20 Ona galue lea o Iakopo i tausaga e fitu ona o Rasela,+ ae ua pei ia tausaga iā te ia o ni nai aso ona o lona alofa iā Rasela.+
21 Ua fai atu Iakopo iā Lapana: “Ia aumai laʻu avā, auā ua uma aso na tatau ona ou galue ai, ma seʻi o ma feusuaʻi.”+
22 Ona faapotopoto lea e Lapana o tagata uma i lea mea ma faia se ʻaiga+ o le faaipoipoga.
23 A o faagasolo lea pō, ua ia aumaia lona afafine o Lea ma avatu iā te ia ma ua la feusuaʻi.
24 Ua avatu foʻi e Lapana iā te ia o Selepa+ lana auauna teine e fai ma auauna teine a Lea lona afafine.
25 Ua oo i le taeao ona iloa ai lea e ia, o Lea! Ona ia fai atu lea iā Lapana: “O le ā lenei mea ua e faia iā te aʻu? Po ou te leʻi galue ea iā te oe mo Rasela? Aiseā ua e faavaleaina ai aʻu?”+
26 Ua fai mai Lapana: “E lē o se aganuu i lo matou atunuu le faaipoipo muamua o le teine laʻitiiti, ae e leʻi faaipoipo le teine matua.
27 Ia lua matuā fiafia+ ma lenei fafine mo le vaiaso atoa. A mavae ia aso ona toe tuuina atu lea iā te oe o le isi fafine, e te galue foʻi iā te aʻu mo le isi fitu tausaga.”+
28 Ua faia faapea e Iakopo ma ua ia matuā fiafia ma lenei fafine mo le vaiaso atoa, ona avatu lea e Lapana iā te ia o Rasela lona afafine e fai ma ana avā.
29 Ua avatu foʻi e Lapana lana auauna teine o Pila+ iā Rasela lona afafine e fai ma ana auauna teine.
30 Ua la feusuaʻi foʻi ma Rasela, ua sili lona alofa iā Rasela nai lo o Lea,+ ma ua ia toe galue mo Lapana mo le isi fitu tausaga.+
31 Ua silasila mai Ieova ua lē alofagia Lea,* ma ona o Ia ua mafai ai ona fanau o Lea,*+ ae ua lē fanau Rasela.+
32 Ona tō lea o Lea ma fanau mai se tama tama, ua ia faaigoa iā te ia o Reupena*+ auā ua ia faapea ifo: “Ona ua silasila mai Ieova i loʻu tigā,+ ma o le a alofa mai ai laʻu tane iā te aʻu.”
33 Ua toe tō foʻi o ia ma fanaua se tama tama ma faapea ifo: “Ua ou fanau, auā ua faafofoga mai Ieova+ i le lē alofagia o aʻu, o lea ua ia aumaia ai ma lenei tama.” Ua ia faaigoa iā te ia o Simeona.*+
34 Ua toe tō foʻi o ia ma fanaua se tama tama ma faapea ifo: “O le a atili māfana mai ai loʻu toʻalua iā te aʻu, auā ua ou fanaua iā te ia o tama tama e toʻatolu.” O lea, ua ia faaigoa ai iā te ia o Levi.*+
35 Ua toe tō foʻi o ia ma fanaua se tama tama ma faapea ifo: “O lenei ou te faaneenee atu ai iā Ieova.” Ona ia faaigoa lea iā te ia o Iuta.*+ Ua lē toe fanau o ia mo se taimi.
Faamatalaga Pito i Lalo
^ I le gagana Eperu, ua “tatala lona faaʻautagata.”
^ I le gagana Eperu, “ua inosia Lea.”
^ O lona uiga, “Vaai, o se Tama Tama.”
^ O lona uiga, “Ua Faafofoga Mai.”
^ O lona uiga, o “Pipii Atu” po o “Faatasia.”
^ O lona uiga, “Faaneeneega” po o le “Taulaʻiga o Faaneeneega.”
