Kenese 37:1-36
37 Ua nofo pea Iakopo i le laueleele na aumau ai lona tamā o se tagata ese,+ i le atunuu o Kanana.+
2 O le talaaga lenei o Iakopo.
Ina ua sefulu fitu tausaga o Iosefa,+ ona ō lea o ia ma ona uso e leoleo le lafu mamoe,+ a o talavou lava. Ua iai faatasi o ia ma le fanau tama a Pila+ ma le fanau tama a Selepa,+ o avā a lona tamā. Ua sau Iosefa i lo latou tamā ma se tala lē lelei e uiga iā i latou.+
3 Ua sili le alofa o Isaraelu iā Iosefa nai lo o isi ona atalii+ uma, auā na ia fanaua lenei atalii ina ua toeaina lava o ia; ma ua ia saunia se ofu talaloa tusitusi lima uumi mo ia.+
4 Ua iloa e ona uso ua sili le alofa o lo latou tamā iā te ia nai lo o ona uso uma, ona latou ʻinoʻino ai lea iā te ia+ ma ua lē mafai ai ona latou talanoa lelei* atu iā te ia.+
5 Mulimuli ane ua fai le miti a Iosefa ma ua ia faamatala atu i ona uso,+ ua atili ai ona latou ʻinoʻino iā te ia.
6 Ua ia faapea atu iā i latou: “Faamolemole, seʻi faalogo mai i laʻu miti na fai.+
7 Sa tatou fusifusia fusi saito i le fanua, ae ua tulaʻi laʻu fusi saito ma tū i luga, ona siʻosiʻo ai lea e a outou fusi saito ma ua ifo i laʻu fusi saito.”+
8 Ua fai mai ona uso iā te ia: “Pe e moni lava o le a fai oe ma tupu iā i matou?+ ma, Po o le a e pulea lava i matou?”+ O le mea lea ua atili ai ona latou ʻinoʻino iā te ia ona o lana miti ma ana faamatalaga.
9 Ua mavae lea ona toe fai foʻi lea o le isi ana miti ma ua ia faamatala atu i ona uso e faapea: “O lenei foʻi ua toe fai le isi aʻu miti. I lenei miti ua ifo mai iā te aʻu le lā, le masina ma fetu e sefulu tasi.”+
10 Ua ia taʻu atu foʻi i lona tamā atoa ma ona uso, ona aʻoaʻia ai lea o ia e lona tamā ma faapea mai iā te ia:+ “O le ā le uiga o lenei miti? Pe e moni ea o le a matou ifo toʻele iā te oe o aʻu, o lou tinā, ma ou uso?”
11 Ua lotoleaga ona uso iā te ia,+ ae ua teuloto e lona tamā lenei tala.+
12 Ua ave e ona uso le lafu a lo latou tamā, ina ia fafaga ai i se mea e lata ane i Sekema.+
13 Mulimuli ane, ua fai atu Isaraelu iā Iosefa: “Pe e lē o leoleo ea e ou uso o lafu e lata ane i Sekema? Sau ia, ou te auina atu oe iā i latou.” Ona ia tali mai lea iā te ia: “Ua ou sauni ou te alu!”+
14 Ua ia faapea atu iā te ia: “Faamolemole ia alu ia. Ia vaai po o saogalemu ma manuia ou uso, po o saogalemu ma lelei foʻi le lafu, ma aumai se tala iā te aʻu.”+ Ona ia auina atu lea o ia mai i le fanua laugatasi o Heperona,+ ma ua ia alu atu agaʻi i Sekema.
15 Mulimuli ane ua maua o ia e se tamāloa o fesavaliaʻi i le fanua. Ona fesili mai lea o le tamāloa iā te ia e faapea: “O le ā lau mea o suʻe?”
16 Ua tali atu o ia: “O loo oʻu saʻili i oʻu uso. Faamolemole taʻu mai iā te aʻu, atonu e te iloa, Po o fea o loo leoleo ai a latou lafu?”
17 Ua toe fai atu le tamāloa: “Ua latou ō ese mai i inei, auā ua ou faalogo ua latou faapea ane, ‘Seʻi o tatou ō i Totana.’” Ona mulimuli atu lea o Iosefa i ona uso ma ua maua i latou i Totana.
18 Ua latou iloa mamao iā te ia, ae e leʻi lata atu iā i latou, ona latou taupulepule lea e fasiotia o ia.+
19 Ua faapea ane le tasi i le isi: “Faauta! O lale ua sau le tama faimiti.+
20 O lenei, ia ō mai loa seʻi o tatou fasioti iā te ia, ma togi i totonu o se lua;+ ma tatou faapea atu ai ua ʻaina o ia e se manufeʻai.+ Ona tatou iloa lea po o fea o le a tua i ai ana miti.”
21 Ina ua faalogo Reupena i lenei mea, ona ia taumafai lea e laveaʻi o ia mai i o latou lima.+ Ua ia faapea atu: “Aua tatou te fasiotia o ia.”+
22 Ua faapea atili atu Reupena iā i latou: “Aua le faamasaatoto.+ Ia togi o ia i totonu o le lua, lea o loo i le toafa ma aua le faaoolima iā te ia.”+ O lana fuafuaga ia laveaʻi o ia mai i o latou lima ina ia toe foʻi o ia i lona tamā.
23 O lea, ina ua oo atu Iosefa i ona uso, ona latou aveese lea mai iā Iosefa o lona ofu talaloa, o le ofu talaloa tusitusi lea o loo ofu ai;+
24 ona latou ave lea o ia ma togi i totonu o le lua.+ Ae i lea taimi e leai se mea o i totonu o le lua; e leai se vai o iai.
25 Ua latou saofafaʻi e aai i falaoa.+ Ua latou tetepa aʻe ma iloa ai o loo sau se malaga a tagata Isamaeli+ mai i Kiliata e agaʻi atu i Aikupito, ma o loo ave i a latou kamela o pulu mai i se laau, o pasama*+ ma pulu mai i paʻu o laau.
26 Ua faapea atu Iuta i ona uso: “O le ā sa tatou mea e maua ai pe a tatou fasioti i lo tatou uso ma ufiufi lona toto?+
27 Ō mai ia, seʻi o tatou faatau atu o ia i tagata Isamaeli,+ ae aua neʻi o tatou faaoolima iā te ia.+ Auā foʻi o lo tatou uso o ia, ma lo tatou tino lava o ia.” Ua latou faalogo i lo latou uso.+
28 Ua agaʻi ane tagata faatauʻoa o Mitiana.+ O lea, ua latou ave aʻe ai Iosefa mai i le lua+ ma faatau atu Iosefa i tagata Isamaeli i tupe siliva e lua sefulu.+ Mulimuli ane, ua latou avatu Iosefa i Aikupito.
29 Ona toe foʻi atu lea o Reupena i le lua a ua leai se Iosefa i inā. Ua ia saeia ona ofu.+
30 Ua alu atu o ia i le mea ua iai ona uso ma faapea atu: “Auoi, ua leai se tama! A o aʻu, o le ā nei laʻu mea o le a fai?”+
31 Ae ua latou ave le ofu talaloa o Iosefa, ua fasi se ʻoti poʻa ma fufui atoa i ai le ofu talaloa i le toto.+
32 Mulimuli ane ua latou ave le ofu talaloa tusitusi ma avatu i lo latou tamā ma faapea atu: “O le ofu lenei na matou mauaina. Faamolemole, vaai i ai+ po o le ofu talaloa lea a lou atalii pe leai.”+
33 Ua ia iloilo le ofu ma ua faapea ane: “O le ofu talaloa lava lenei o si oʻu atalii! Atonu ua ʻaina o ia e se manufeʻai!+ Ua saeia lava Iosefa!”+
34 Ua saei e Iakopo o ona ofu ma fusi i lona puimanava le ʻie talatala ma faavauvau pea i le tele o aso ona o lona atalii.+
35 Ua tulaʻi pea ona atalii ma ona afafine uma e faamāfanafana iā te ia,+ a ua lē mafai ona faamāfanafanaina o ia, ua faapea ane:+ “Ou te alu ifo i le Tuugamau* ma loʻu faanoanoa lava i loʻu atalii!” Ua tagi pea lona tamā ona o ia.
36 Peitaʻi ua faatau atu e tagata Mitiana o ia i Aikupito iā Potifara, o se tagata aloaʻia i le maota o Farao,+ o le pule foʻi o le ʻauleoleo a le tupu.+
Faamatalaga Pito i Lalo
^ I le gagana Eperu, “ona ua latou lē mafai ona tautatala filemu iā te ia.”
^ Tagaʻi i le Faaopoopoga e 13.
^ Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
