Kenese 50:1-26
50 Ua punou Iosefa i luga o fofoga o lona tamā,+ ma ua tagi i ona luga ma sogi atu iā te ia.+
2 Ua faatonu e Iosefa ana auauna o fomaʻi, ina ia atualalaina*+ lona tamā. Ona atualala ai lea e fomaʻi o Isaraelu,
3 ma e fā sefulu aso ua latou faia ai faapea iā te ia, auā o le aofaʻiga ia o aso e atualala ai, ma ua fetagisi pea tagata Aikupito mo le fitu sefulu aso ona o ia.+
4 Mulimuli ane, ua uma aso na faanoanoa ai mo ia, ona fai atu lea o Iosefa i tagata i le maota o Farao e faapea: “Afai ua outou fiafia mai iā te aʻu,+ faamolemole, ia outou fai atu i luma o Farao, e faapea,
5 ‘Na fai mai loʻu tamā ou te tautō atu iā te ia+ ma na ia faapea mai: “Vaai oe! Ua lata ina ou oti.+ Ia e tanu iā te aʻu+ i loʻu tuugamau ua uma ona ou saunia mo aʻu i Kanana.”+ Faamolemole, ia tuu mai aʻu ou te alu aʻe e tanu loʻu tamā, ona ou toe sau ai lea.’”
6 Ona fai mai lea o Farao: “Ia e alu aʻe e tanu lou tamā e pei ona e tautō ai iā te ia.”+
7 Ua alu aʻe Iosefa e tanu lona tamā, ma ua ō aʻe faatasi o ia ma auauna uma a Farao, o toeaina+ o lona aiga, atoa ma toeaina uma o le atunuu o Aikupito,
8 o i latou uma i le aiga o Iosefa, o ona uso ma i latou i le aiga o lona tamā.+ Ae ua latou tuua na o a latou fanau iti, o lafu mamoe ma lafumanu i le laueleele o Kosena.
9 Ua ō aʻe faatasi foʻi ma i latou o kariota+ ma tagata tiʻetiʻe solofanua, ma ua toʻatele la latou ʻaumalaga.
10 Ua latou oo i le mea e soli ai saito*+ a Atatu lea e latalata i Ioritana,+ ma o i inā ua latou matuā tagiauē ai ma tagituʻi, ma ua ia tausia le tū o le faavauvau mo lona tamā i aso e fitu.+
11 Ua vāai tagata o le laueleele o Kanana, i tū o le faavauvau ua faia i le mea e soli ai saito a Atatu ma ua latou faapea ane: “Ua matuā tele lenei faavauvau ua faia e tagata Aikupito!” O le mea lea ua faaigoa ai lea mea o Apelamisarima* lea e latalata i Ioritana.+
12 Ona faia lea e ona atalii iā te ia e pei ona ia poloaʻi atu ai iā i latou.+
13 Ua ave o ia e ona atalii i Kanana, ma tanu ai o ia i le ana i le fanua o Makapelu, le fanua lea na faatau e Aperaamo e fai ma tuugamau, mai iā Eferona le tagata Hetī i luma o Mamere.+
14 Mulimuli ane, ua toe foʻi Iosefa i Aikupito, o ia ma ona uso, ma i latou uma na ō aʻe faatasi ma ia e tanu lona tamā, ina ua uma ona tanu lona tamā.
15 Ua mavae le maliu o lo latou tamā, ona faapea ane lea o ona uso: “Atonu o loo teuloto lava e Iosefa lona ita iā i tatou,+ ma e mautinoa o le a ia toe taui mai iā i tatou ona o mea leaga uma na tatou faia iā te ia.”+
16 Ua latou faailoa atu iā Iosefa lenei poloaʻiga i upu nei: “Na poloaʻi lou tamā a o leʻi maliu e faapea,
17 ‘O le mea lenei ia outou taʻu atu iā Iosefa: “Faamolemole, ou te ōle atu iā te oe, ia faamagalo le fouvalega a ou uso,+ ma a latou agasala ina ua latou faia mea leaga iā te oe.”’+ O lea, faamolemole, ia faamagalo le fouvalega a nei auauna a le Atua o lou tamā.”+ Ina ua latou taʻu atu lea mea iā Iosefa, ona maligi ai lea o ona loimata.
18 Mulimuli ane, ona ō atu foʻi lea o ona uso ma faapaʻuʻū i ona luma ma faapea atu: “O i matou foʻi o au pologa!”+
19 Ua faapea mai Iosefa iā i latou: “Aua tou te fefefe, auā po o aʻu ea e suitulaga i le Atua?+
20 A o outou, na outou faufau leaga iā te aʻu. Ae e pei ona faamaonia i le asō, ua finagalo le Atua ina ia iʻu i le lelei, ina ia faasaoina ai le toʻatele o tagata.+
21 O lea, aua tou te fefefe. Ou te avatu pea meaʻai iā te outou ma a outou fanau.”+ Ua ia faamāfanafana iā i latou ma tautala atu ma le mautinoa iā i latou.
22 Ona nofo pea lea o Iosefa i Aikupito, o ia ma le aiga o lona tamā; ma na ola Iosefa mo le selau sefulu tausaga.
23 Ua oo ina vaai Iosefa i atalii o Efaraima ua oo i le tupulaga lona tolu,+ faapea foʻi ma atalii o Makiro,+ le atalii o Manase. Ua pei lava i latou o ni fanau moni a Iosefa.*+
24 Mulimuli ane ona fai atu lea o Iosefa i ona uso: “Ua lata ina ou oti; ae e mautinoa o le a silasila mai le Atua iā te outou,+ ma o le a ia aveina aʻe outou mai i lenei laueleele, i le laueleele na ia tautō e avatu iā Aperaamo, Isaako ma Iakopo.”+
25 Ua fai atu Iosefa i atalii o Isaraelu ia tautō e faapea: “E mautinoa e silasila mai le Atua iā te outou. O lea, e ao ona outou ave aʻe oʻu ponaivi mai i inei.”+
26 Ona maliu lea o Iosefa ina ua selau sefulu ona tausaga; ua latou atualala+ o ia, ma tuu ai i se pusa maliu i Aikupito.
Faamatalaga Pito i Lalo
^ O le “atualalaina,” o le saunia lea o le tino oti e ala i le faaaogāina o uu manogi ina ia lē pala ai le tino.
^ Pe e faasino atu foʻi i le karite. O le upu Peretania o le barley.
^ O lona uiga, “O le faavauvau o tagata Aikupito.”
^ I le gagana Eperu, “na sapasapaia i luga o tulivae o Iosefa.”
