Kolose 3:1-25
3 Ae afai na faaeaina+ outou faatasi ma Keriso, ia saʻili pea la i mea faalelagi,+ o i inā o loo nofo ai Keriso i le itu taumatau o le Atua.+
2 Ia taulaʻi o outou mafaufau i mea faalelagi,+ ae e lē o mea o i le lalolagi.+
3 Auā ua oti outou,+ ma ua natia ai lo outou ola+ faatasi+ ma Keriso e tusa ma le finagalo o le Atua.
4 Pe a faaali mai le Keriso o lo tatou ola,+ ona faaali+ mai foʻi lea o outou faatasi ma ia i le mamalu.+
5 O le mea lea, ia fasiotia+ tuʻinanauga i o outou itutino,*+ o le faitaaga,* o amioga lē mamā, le tuʻinanau i feusuaʻiga,+ o tuʻinanauga leaga ma le manaʻo tele,+ o le ifo i tupua lava lea.
6 O mea uma na e oo mai ai le toʻasā o le Atua.+
7 O mea uma foʻi na, sa masani ona outou faia, a o outou ola i lenā olaga.+
8 A o lenei ia outou tuu ese+ mai iā te outou le lotoa, o le ita, o le leaga, o upuleaga,+ ma e lē tatau ona sau se upu masoā+ mai i o outou gutu.
9 Aua le pepelo le tasi i le isi.+ Ae ia toese le tagata tuai+ ma ana gaoioiga,
10 a ia oofu outou i le tagata fou+ ua faafouina i le poto saʻo, ina ia foliga+ e pei o Lē na foafoaina o ia,
11 o lea la, e lē o iai se Iutaia po o se Eleni, o sē e peritomeina po o sē e lē peritomeina, o se tagata ese, po o se Sekutia,* se pologa po o sē e saʻoloto,+ ae ua iā Keriso mea uma, ua iai foʻi o ia i tagata uma lava.+
12 Talu ai o outou o ē ua filifilia e le Atua,+ o ē ua paia ma alofagia, ia oofu outou i le alofa mutimutivale,+ le agalelei, lotomaulalo,+ agamalu+ ma le faapalepale.+
13 Ia faaauau ona onosaʻi le tasi i le isi, ma ia fefaamagaloaʻi ma le lotoatoa+ pe afai ua faia e se tasi se mea e tigā+ ai le isi. E pei ona finagalo malie Ieova e faamagalo iā te outou,+ ia faapea foʻi ona outou faia.
14 Peitaʻi, e iai foʻi se isi mea e manaʻomia, ia oofu outou i le alofa,+ auā o le fusi+ lea e atoatoa ona autasi ai.
15 Ia pulea foʻi e le filemu+ mai iā Keriso o outou loto,+ auā o le mea moni lea na valaauina ai outou i le tino e tasi.+ Ia faaalia foʻi lo outou loto faafetai.
16 Ia nofo i totonu iā te outou le upu a Keriso, ia tele lava ma iʻu i le atamai uma.+ Ia faaauau ona aʻoaʻo+ ma apoapoaʻi atu le tasi i le isi i salamo,+ o viiga i le Atua, o pese mananaia faaleagaga,+ ia pepese iā Ieova+ mai i o outou loto.
17 O mea uma foʻi tou te tautatala ai pe tou te faia,+ ia faia mea uma lava i le suafa o le Alii o Iesu,+ ma faafetai+ atu ai i le Atua le Tamā e ala iā te ia.
18 O outou avā, ia gauaʻi+ i a outou tane, auā o le mea lea e tatau i le Alii.
19 O outou tane, ia alolofa atu pea i a outou avā,+ ma aua le soona feita iā i latou.+
20 O outou le fanau, ia usiusitaʻi+ i o outou mātua i mea uma lava, auā o le mea lea e finagalo malie i ai le Alii.
21 O outou tamā, aua le faaonoono i a outou fanau,+ ina neʻi lotovaivai i latou.
22 O outou pologa, ia usiusitaʻi i mea uma iā i latou o ē ua avea ma o outou matai i le lalolagi,+ aua le faatagā auauna e pei o ē e faafiafia i tagata,+ ae ia faia i le lotofaamaoni ma le mataʻu iā Ieova.+
23 O so o se mea e tou te faia, ia galue i ai ma le lotoatoa,+ e pei o loo faia iā Ieova+ ae e lē o tagata,
24 auā ua outou iloa, tou te maua mai iā Ieova+ le taui talafeagai, o le tofi lea.+ Ia outou pologa mo le Matai, o Keriso lea.+
25 O le mea moni, o lē e faia le mea sesē, e toe taui+ mai iā te ia e tusa ma le mea sesē na ia faia, auā e lē faailoga tagata le Atua.+
Faamatalaga Pito i Lalo
^ Tagaʻi i le Faaopoopoga e 8.
^ I le gagana Eleni, “o outou itutino na faia mai le efuefu.”
^ O le upu “Sekutia” e faatatau atu foʻi i tagata amio faanuupō i na vaitaimi.
