Le Pese a Solomona 5:1-16
5 “Loʻu tuafafine e,+ le tamaʻitaʻi ou te faaipoipo i ai,+ ua ou sau i loʻu togālaau.+ Ua ou tau laʻu muro+ atoa ma laʻu mea manogi. Ua ou ʻaina laʻu meli e sisina ifo atoa ma laʻu meli;+ ua ou inu foʻi laʻu uaina atoa ma laʻu suāsusu.”
“Aʻu aumea e, inā taumamafa ia! Inā feinu ia ma onanā i faailoaga o le alofa!”+
2 “Ua ou moe, ae o loo ala loʻu loto.+ Ua ou lagona le leo o laʻu pele o loo tuʻituʻi mai!”+
“Loʻu tuafafine e, laʻu uō teine,+ o lē ua lē ponā, inā tatala mai ia iā te aʻu!+ Auā ua susū loʻu ulu i le sau, o lauulu foʻi o loʻu ulu i le maʻulu o le sau o le pō.”+
3 “‘Ua tatala ese loʻu ofu talaloa. E faapefea ona ou toe ofu ai? Ua ou fufulu oʻu vae. E faapefea ona ou toe faaeleelea ai?’
4 Ua aveese e laʻu pele lona lima mai i le pū o le faitotoʻa, ma ua tātā vale loʻu fatu i totonu iā te aʻu.+
5 Na ou tulaʻi e tatala le faitotoʻa i laʻu pele, ona sisina ifo lea o le muro mai i oʻu lima, ma le muro ua sisina ifo mai i oʻu tamatamaʻilima i pū o le loka.
6 Na ou tatala atu i laʻu pele, ae ua toe liliuese laʻu pele ua alu ese. Na ou tau matapogia ina ua tautala mai o ia. Na ou saʻili iā te ia, ae ou te leʻi maua o ia.+ Na ou valaau foʻi iā te ia, ae e leʻi tali mai o ia iā te aʻu.
7 Na maua aʻu e leoleo+ na feoaʻi solo i le aai. Na latou fasia aʻu, ma latou faamanuʻalia aʻu. Na aveese e leoleo o pā+ loʻu ʻie pulupulu mai iā te aʻu.
8 “Tama fafine a Ierusalema e,+ ou te faatautō+ iā te outou, pe afai tou te mauaina laʻu pele,+ ona outou taʻu lea iā te ia ua ou maʻi i loʻu alofa.”+
9 “O oe lenā o lē e silisili ona lalelei i fafine, e faapefea ona sili lau pele+ nai lo o se isi pele?+ E faapefea ona sili lau pele nai lo o se isi pele, ua e faatautō ai i matou faapenei?”+
10 “E aulelei ma e enaena le paʻu o laʻu pele, o lē ua silisili i le faitau sefulu afe.+
11 O lona ulu o le auro lea, o le auro ua faamamāina. O lona lauulu, o taufuifui o fua o le laau o le pama. O lona lauulu uliuli e pei o le oreva.
12 O ona mata e pei o lupe o loo i tafatafa o alāvai, o loo tāʻeele i le suāsusu ma nonofo i auvai.
13 O ona alafau ua pei o se togālaau o mea manogi,+ o ʻolo o loo iai laau manogi. O ona laugutu o lili o loo sisina ifo ai le muro.+
14 O ona lima o auro ia, ua tumu i le tasesa.* O lona manava o le ipu mafolafola lea ua fai i nifo elefane ua ufitia i safaira.
15 O ona vae o poutū o maamora ua faatūina i luga o le auro ua faamamāina. O ona foliga ua pei o Lepanona, ua sili ona lelei e pei o arasi.+
16 O lona fofoga ua matuā suamalie, ma o mea uma foʻi e uiga iā te ia e matagofie lava.+ Tama fafine a Ierusalema e, o laʻu pele lenei, ma o laʻu uō tama foʻi lea.”
Faamatalaga Pito i Lalo
^ O se maa tāua e lanu samasama pe meamata. E mai i le upu Eperu, o le tar·shishʹ.
