Levitiko 12:1-8
12 Ua toe fetalai mai Ieova iā Mose e faapea:
2 “Ia e fai atu i le fanauga a Isaraelu e faapea, ‘Afai e afuafua+ se fafine ma fanau mai se tama tama, e lē mamā o ia mo aso e fitu; e pei o aso e lē mamā ai pe a fai lona maʻi masina, e lē mamā o ia.+
3 E peritomeina+ foʻi le tama i le paʻu* o lona tino i le aso lona valu.
4 E nofo le fafine mo le isi tolu sefulu tolu aso i le fale auā lona faamamāina mai i le toto. E lē tatau ona ia paʻi i se mea paia, pe ulufale atu i le mea paia seʻia atoa aso o lona faamamāina.+
5 “‘Afai e fanau mai e ia se tama teine, e lē mamā o ia i aso e sefulu fā, e pei o le taimi o lona maʻi masina. E nofo foʻi o ia i le fale mo isi aso e ono sefulu ono, auā lona faamamāina mai i le toto.
6 Pe a atoa aso o lona faamamāina mo lana tama tama po o lana tama teine, e na te aumaia i le ositaulaga o se tamaʻi mamoe poʻa, e faatoʻā atoa le tausaga mo le taulaga mū+ ma se tamaʻi lupe po o se manutagi,+ mo le taulaga o agasala i le faitotoʻa o le faleʻie o le feiloaʻiga.
7 E ao i le ositaulaga ona avatu le taulaga i luma o Ieova ma fai le togisala mo ia, ina ia mamā ai o ia mai i lona puna toto.+ O le tulafono lenei e faatatau i le fafine e fanaua se tama tama po o se tama teine.
8 Ae afai e na te lē gafatia se mamoe, e ao ona ia aumai ni manutagi se lua po o ni tamaʻi lupe se lua,+ e tasi mo le taulaga mū ma le tasi mo le taulaga o agasala, e fai e le ositaulaga le togisala+ mo ia, ona mamā ai lea o ia.’”
Faamatalaga Pito i Lalo
^ O le “paʻu” lenei e faasino atu i le paʻu o totogasā o tamāloloa.
