Levitiko 16:1-34
16 Ua fetalai mai Ieova iā Mose ina ua mavae le feoti o atalii e toʻalua o Arona, i lo la faalatalata atu iā Ieova ae e lē tusa ai, ma ua la feoti ai.+
2 Ona fetalai mai ai lea o Ieova iā Mose: “Ia e fai atu iā Arona lou uso, e lē tatau ona alu atu o ia i so o se taimi i le mea paia+ i le isi itu o le ʻie puipui,+ i luma o le ufiufi lea o loo i luga o le Atolaau, ina neʻi oti ai o ia;+ auā ou te iai i le ao+ i luga o le ufiufi.+
3 “E ao iā Arona ona ulufale i le mea paia+ faatasi ma mea nei: o se tamaʻi povi poʻa mo le taulaga o agasala,+ ma se mamoe poʻa mo le taulaga mū.+
4 E ao ona ia ofu i le ofu talaloa lino paia,+ ma le ofuvae lino+ e ufiufi ai lona tino, ia fusi foʻi o ia i le fusi ʻie ua fai i le ʻie lino,+ ma sai lona ulu i le pulou lino.+ O ofu paia ia.+ E ao ona tāʻele lona tino i le vai,+ ona ofu ai lea.
5 “E ao ona ia aumai mai i le faapotopotoga o le fanauga a Isaraelu+ o ni tamaʻi ʻoti poʻa se lua mo le taulaga o agasala,+ ma se mamoe poʻa mo le taulaga mū.+
6 “E aumaia e Arona le povi poʻa o le taulaga o agasala mo ia lava,+ ma na te faia le togisala+ mo ia+ ma lona aiga atoa.+
7 “E ao ona ia ave ʻoti e lua ma faatutū i luma o Ieova, i le faitotoʻa o le faleʻie o le feiloaʻiga.
8 E ao iā Arona ona fai le vili+ i ʻoti e lua, o le tasi mo Ieova a o le isi mo Asaseli.+
9 E ao iā Arona ona avatu le ʻoti lea na maua mai i le vili+ mo Ieova, ma faia ai le taulaga o agasala.+
10 A o le ʻoti na maua mai i le vili mo Asaseli e tatau ona tuu pea e ola i luma o Ieova e faamagalo ai agasala, ma ia tuu atu+ le ʻoti mo Asaseli e alu i le toafa.+
11 “E ao iā Arona ona aumaia le povi poʻa o le taulaga o agasala, lea ua fai mo ia ma faia ai le togisala mo ia ma lona aiga atoa; e ao foʻi ona ia fasia le povi poʻa o le taulaga o agasala, lea ua fai mo ia.+
12 “E ao ona ia aumaia le ipu e mū ai mea manogi,+ ua tumu i malala ola mai i le fata faitaulaga+ i luma o Ieova, ma ua faatumu ona lima+ i mea manogi lelei,+ e ao foʻi ona ia avatu ia mea i le isi itu o le ʻie puipui.+
13 E ao foʻi ona ia tuuina mea manogi i malala ola i luma o Ieova,+ ma e ao ona lilofia le ufiufi o le Atolaau,+ lea ua i luga o le Atolaau o le Feagaiga,+ i le asu o le mea manogi, ina neʻi oti ai o ia.
14 “E ao ona ia ave se vaega o le toto+ o le povi poʻa ma sausau i lona tamatamaʻilima i luma o le ufiufi i le itu i sasaʻe, e ave foʻi se vaega o le toto ma sausau+ faafitu i lona tamatamaʻilima i luma o le ufiufi.+
15 “E ao ona ia fasia le ʻoti o le taulaga o agasala, lea ua fai mo le nuu,+ e ao foʻi ona ia avatu lona toto i le isi itu o le ʻie puipui,+ ma faia ai le mea lava e tasi i lona toto+ lea na ia faia foʻi i le toto o le povi poʻa; e na te sausau ai i luma o le ufiufi.
16 “E ao ona ia faia le togisala mo le mea paia. E ao ona ia faia faapea ina neʻi leaga le mea paia i le lē mamā,+ ona o fouvalega ma agasala+ a le fanauga a Isaraelu. E ao foʻi ona ia faia faapea i le faleʻie o le feiloaʻiga, lea ua iai i le mea e nonofo ai i latou o ē e lē mamā.
17 “E lē tatau ona iai se tagata i totonu o le faleʻie o le feiloaʻiga pe a ulu atu o ia e faia le togisala i le mea paia seʻia toe ulufafo o ia; e na te faia le togisala mo ia+ lava ma lona aiga atoa ma le faapotopotoga uma o Isaraelu.+
18 “E alu foʻi o ia i fafo i le fata faitaulaga+ lea ua i luma o Ieova ma fai ai le togisala mo le fata faitaulaga, e na te ave se vaega o le toto o le povi poʻa, ma se vaega o le toto o le ʻoti ma nini ai seu ia soo ai le fata faitaulaga.+
19 E ao foʻi ona ia sausau+ faafitu i ona luga sina vaega o le toto i lona tamatamaʻilima ma faamamā ai, ma faapaia ai, mai i le lē mamā o le fanauga a Isaraelu.
20 “Pe a uma ona ia faia le togisala+ mo le mea paia, ma le faleʻie o le feiloaʻiga, ma le fata faitaulaga, ona aumaia ai lea e ia o le ʻoti ola.+
21 E ao iā Arona ona faaee foʻi ona lima+ uma i luga o le ulu o le ʻoti ola ma taʻu+ atu mea sesē+ uma a le fanauga a Isaraelu, ma a latou fouvalega uma, ma a latou agasala uma,+ ma e faaee e ia mea uma i luga o le ulu o le ʻoti+ ma tuu atu le ʻoti e alu i le toafa+ e ala i le tagata ua tofia.+
22 E na te tuu atu le ʻoti e alu ma e ao ona tauave e le ʻoti a latou agasala+ uma i le toafa.+
23 “E tatau iā Arona ona ulu atu i le faleʻie o le feiloaʻiga, ona tatala ese lea o le ofu lino na ofu ai ina ua ulu atu i totonu o le mea paia, ma e ao ona ia tuu ai i inā.+
24 E ao ona tāʻele lona tino i le vai+ i se mea paia,+ ma ofu ona ofu+ ona sau ai lea i fafo, ma faia le taulaga mū+ mo ia lava ma le taulaga mū mo le nuu,+ ma faia ai le togisala mo ia lava atoa ma le nuu.+
25 E na te susunuina le gaʻo o le taulaga o agasala i luga o le fata faitaulaga.+
26 “A o lē+ na tuu atu le ʻoti e alu mo Asaseli,+ e ao ona ia tatā ona ofu ma tāʻele lona tino i le vai,+ a mavae lenā ona sau lea i le togālauapi.
27 “Peitaʻi o le a ave le povi poʻa o le taulaga o agasala ma le ʻoti o le taulaga o agasala, o le toto o ia manu na ave i le mea paia e fai ai le togisala, i tua o le togālauapi; ma susunu paʻu, o aano ma otaota o ia manu i le afi.+
28 E ao i lē na susunuina ia manu ona tatā ona ofu, ma tāʻele lona tino i le vai, a mavae lenā ona sau lea i le togālauapi.
29 “O le tulafono lea mo outou mo se taimi umi:+ I le masina lona fitu,+ i le aso sefulu o le masina, e ao ona outou faapuapuagatia* iā te outou+ ma aua tou te faia ni galuega,+ e tusa lava po o le tagatānuu po o se tagata ese lea e aumau iā te outou.
30 Auā e faia ai le togisala+ mo outou i lea aso ina ia taʻu atu ai ua mamā outou. E tou te mamā ai i luma o Ieova mai i a outou agasala uma.+
31 O le sapati+ mo outou e mālōlō ai, e ao ona outou faapuapuagatia ai outou. O le tulafono lea mo se taimi umi.
32 “O le ositaulaga, o lē o le a faauuina+ ma tuu atu i ai le pule,* e auauna o se ositaulaga,+ e suitulaga+ i lona tamā, e ao ona ia faia le togisala ma ofu i ofu lino.+ O ofu paia ia.+
33 E ao ona ia faia le togisala mo le mea e sili ona paia,+ e fai foʻi e ia le togisala mo le faleʻie+ o le feiloaʻiga, ma le fata faitaulaga;+ ma faia le togisala+ mo le ʻauositaulaga ma tagata uma o le faapotopotoga.
34 E fai lea ma tulafono iā te outou mo se taimi umi,+ ina ia faatasi ai ona faia i le tausaga le togisala mo le fanauga a Isaraelu ona o a latou agasala.”+
Ua ia faia foʻi e pei lava ona poloaʻi mai ai Ieova iā Mose.
Faamatalaga Pito i Lalo
^ E ono faasino atu i le anapogi ma isi faasāsāaga faapea.
^ I le gagana Eperu, “ia faatumu le lima i le pule” ma e faasino atu i le tuu atu o le pule atoa i lima o ē e auauna o ni ositaulaga.
