Levitiko 18:1-30
18 Ua toe fetalai mai Ieova iā Mose e faapea:
2 “Ia e fai atu i le fanauga a Isaraelu, ma ia e fai atu iā i latou, ‘O aʻu o Ieova o lo outou Atua.+
3 O mea ua faia i le atunuu o Aikupito lea na outou nonofo ai, aua neʻi outou faia faapea;+ o mea ua faia i le atunuu o Kanana lea ou te avatu i ai outou, aua neʻi outou faia faapea;+ aua neʻi outou mulimuli i a latou tulafono.
4 Ia outou usiusitaʻi i iʻuga o aʻu faamasinoga,+ ia outou tausi foʻi ma mulimuli+ i aʻu tulafono.+ O aʻu o Ieova o lo outou Atua.
5 E ao ona outou tausia aʻu tulafono ma iʻuga o aʻu faamasinoga, pe afai e faia e se tagata, ia ola ai o ia e tusa ma nei mea.+ O aʻu o Ieova.+
6 “‘Aua lava neʻi faalatalata atu outou, o so o se tane mai iā te outou, ina ia faatelenoa*+ le tino o se tasi o lona aiga vavalalata. O aʻu o Ieova.
7 Aua neʻi e faatelenoa i lou tamā+ po o lou tinā. O ia o lou tinā. Aua neʻi e faatelenoa iā te ia.
8 “‘Aua neʻi e faatelenoa le avā a lou tamā.+ E faalumaina ai lou tamā.
9 “‘O le telenoa o lou tuafafine, o le afafine o lou tamā, po o le tama teine a lou tinā, e tusa lava pe na fanau i le aiga e tasi pe leai, aua lava neʻi e faatelenoa iā te ia.+
10 “‘O le telenoa o le afafine o lou atalii, po o le tama teine a lou afafine, aua lava neʻi e faatelenoa se isi o i laʻua, auā e faalumaina ai oe.
11 “‘O le telenoa o le tama teine a le avā a lou tamā, o lē na fanau mai i lou tamā, o lou tuafafine o ia, aua lava neʻi e faatelenoa iā te ia.
12 “‘Aua lava neʻi e faatelenoa le tuafafine o lou tamā. O ia o le toto ma aano o lou tamā.+
13 “‘Aua lava neʻi e faatelenoa le uso o lou tinā, auā o ia o le toto ma aano o lou tinā.
14 “‘Aua lava neʻi e faalumaina le uso o lou tamā, i lou faalatalata atu i lana avā ina ia faatelenoa iā te ia. O ia o le tuafafine o lou tamā.+
15 “‘Aua lava neʻi e faatelenoa le avā a lou atalii.+ O ia o le avā a lou atalii. Aua neʻi e faatelenoa iā te ia.
16 “‘Aua lava neʻi e faatelenoa le avā a lou uso.+ Auā e faalumaina ai lou uso.
17 “‘Afai e te faaipoipo i se fafine, aua lava neʻi e feusuaʻi ma lana tama teine.+ Aua neʻi fai ma au avā le afafine o lana tama tama, ma le tama teine a lana tama teine, ma e faatelenoa iā te ia. O ou toto ma aano i latou. O se amioga matagā lenā.+
18 “‘Aua neʻi e faaipoipo i le uso o lau avā e faatigā+ ai iā te ia, ma e feusuaʻi ai ma ia, a o ola pea lau avā.
19 “‘Aua lava neʻi e faatelenoa+ se fafine a o lē mamā o ia i lona maʻi masina.+
20 “‘Aua lava neʻi e faamatuu atu lou sua i le avā a lau uō, ma lē mamā ai.+
21 “‘Aua lava neʻi e tuuina atu*+ se tasi o lau fanau iā Moloka.+ Aua neʻi e faalumaina+ le suafa o lou Atua i lenā mea. O aʻu o Ieova.+
22 “‘Aua lava neʻi lua momoe ma se tane+ e pei ona lua momoe ma se fafine.+ O se mea e matuā inosia lea.
23 “‘Aua lava neʻi e faamatuu atu lou sua i so o se manu+ ma lē mamā ai, e lē tatau i se fafine ona tū atu i luma o se manu ina ia la feusuaʻi.+ Ua solia ai le tū ua masani ai.
24 “‘Aua neʻi lē mamā outou i so o se tasi o nei mea, auā o mea ia ua lē mamā+ ai nuu ia ou te tuliesea mai i o outou luma.
25 O le mea lea, ua lē mamā ai le laueleele, ma ou te faasalaina ai ona o lana agasala, ma e luai mai e le laueleele ē o loo nonofo ai.+
26 E ao ona outou tausia aʻu tulafono ma iʻuga o aʻu faamasinoga,+ ma aua lava neʻi outou faia se tasi o ia mea e inosia, e tusa lava po o se tagatānuu, po o se tagata ese ua aumau iā te outou.+
27 Auā o mea inosia uma nei ua faia e tagata o le laueleele o ē ua muamua nonofo i lo outou,+ ua lē mamā ai le laueleele.
28 Ona e tou te leʻi faaleagaina le laueleele, e lē luai mai ai outou e le laueleele, e pei o le a luai mai e le laueleele o nuu ia ua muamua nonofo ai i lo o outou.+
29 Afai e faia e se tasi se mea o ia mea inosia uma, o le a fasiotia i latou uma ua faia ia mea.+
30 E ao ona outou tausia la outou matafaioi iā te aʻu, ma aua neʻi faia so o se tū e inosia, lea ua faia e nisi na muamua atu iā te outou,+ neʻi lē mamā ai outou ona o ia mea. O aʻu o Ieova o lo outou Atua.’”
Faamatalaga Pito i Lalo
^ E foliga mai e faatatau atu i feusuaʻiga.
^ Atonu na aofia ai i lenei mea le tuuina atu o se tasi o le fanau e osi ai le taulaga.
