Levitiko 2:1-16
2 “‘Pe afai e aumai e se tasi se taulaga i meaʻai*+ e ofo atu iā Ieova, e ao ona faia lana taulaga i le falaoamata lelei;+ e tatau foʻi ona ia liligiina i ai le suāuu ma tuu i ai le lipano.
2 E tatau ona ia avatu lenei mea i ositaulaga, o atalii ia o Arona, ma e luluu mai ai e le ositaulaga se luuga o falaoamata lelei faatasi ma le suāuu ma le lipano; e ao foʻi ona ia faamū i luga o le fata faitaulaga, e fai lea ma faamanatuga+ i le Atua, o le taulaga e faia i le afi, o se mea manogi e faamalieina ai Ieova.
3 O mea e totoe mai i le taulaga i meaʻai, e fai mo Arona ma ona atalii,+ o mea ia e sili ona paia+ mai i le taulaga iā Ieova ua faia i le afi.
4 “‘Pe afai e te aumaia se taulaga i meaʻai e ofo atu o se mea ua tao i le ogaumu, e ao ona faia i le falaoamata lelei, o falaoa e lē faafefeteina lapotopoto+ ua iai sina suāuu po o falaoa manifinifi e lē faafefeteina+ ua nini i le suāuu.+
5 “‘Afai o lau taulaga o se taulaga i meaʻai ua faia i luga o le uʻamea mafolafola,+ ia faia i le falaoamata lelei e lē faafefeteina ua iai sina suāuu.
6 E vaevae i ni vaega ninii, ma e ao ona e liligiina i ai le suāuu.+ O le taulaga lea i meaʻai.
7 “‘Afai o lau taulaga o se taulaga i meaʻai ua faia i se ulo ua iai le gaʻo, ia faia i le falaoamata lelei ma le suāuu.
8 E ao ona e aumaia iā Ieova taulaga i meaʻai ua faia i ia mea; e ao foʻi ona e avatu i le ositaulaga e na te aumaia le taulaga i autafa o le fata faitaulaga.
9 E ao i le ositaulaga ona aveese nisi o mea mai i le taulaga i meaʻai ma faamū ai i luga o le fata faitaulaga, e fai ma faamanatuga+ i le Atua, o se taulaga e faia i le afi, o se mea manogi e faamalieina ai Ieova.+
10 O mea e totoe mai i le taulaga i meaʻai, e fai mo Arona ma ona atalii, o mea ia e sili ona paia mai i le taulaga iā Ieova ua faia i le afi.+
11 “‘E lē tatau ona faia i se mea faafefete+ o so o se taulaga i meaʻai e tou te avatu iā Ieova, auā e tou te lē faamūina se paluga ua fefete po o le meli* i se taulaga iā Ieova ua faia i le afi.
12 “‘Ia outou aumaia na taulaga iā Ieova o se taulaga o uluaʻi fua,+ e lē tatau ona faamū ia mea i le fata faitaulaga e fai ma mea manogi e faamalieina ai.
13 “‘E ao ona e faamasima au taulaga uma ua faia i meaʻai;+ ia lē aunoa ona iai le masima, e faamanatu ai iā te oe le feagaiga+ a lou Atua i au taulaga i meaʻai. E te avatu au taulaga uma faatasi ma le masima.
14 “‘Afai e te aumaia iā Ieova le taulaga i meaʻai o uluaʻi fua ua matutua, ia e avatu o fatu ua vaivai ma ua faapaʻu i le afi, o fatu mai i uluaʻi fua ua tuʻi e fai ma taulaga i meaʻai o uluaʻi fua ua matutua.+
15 Ia e liligiina i ai le suāuu ma tuu i ai le lipano. O le taulaga lea i meaʻai.+
16 Ona faamū lea e le ositaulaga o ia mea e fai ma faamanatuga+ i le Atua, o nisi o fatu ua tuʻi, o le suāuu ma le lipano uma, o se taulaga iā Ieova ua faia i le afi.
Faamatalaga Pito i Lalo
^ I le gagana Eperu, “O taulaga i fatu.” E aofia i ia taulaga o falaoamata lelei, o fatu ua tunu, o falaoa lapotopoto, o falaoa manifinifi ua tao, o falaoa manifinifi ua faia i luga o uʻamea mafolafola po ua falai i le gaʻo i se ulo.
^ E foliga mai e lē o le meli (honey) e maua mai i lagomeli a o le sua suamalie o fualaau ʻaina.
