Levitiko 22:1-33
22 Ua fetalai mai pea Ieova iā Mose e faapea:
2 “Ia e fai atu iā Arona ma ona atalii, ia faamamao ese mai i mea paia a le fanauga a Isaraelu, ma aua neʻi faaleagaina loʻu igoa paia+ i mea ua latou faapaiaina mo aʻu.+ O aʻu o Ieova.
3 Ia e fai atu iā i latou, ‘I o outou tupulaga o loo mulimuli mai, o so o se tasi o a outou fanau e faalatalata mai i mea paia, o mea ia o le a faapaia e atalii o Isaraelu mo Ieova, a o lē mamā o ia,+ ia fasiotia lenā tagata ma ia lē toe tū o ia i oʻu luma. O aʻu o Ieova.
4 E leai se tane o le fanau a Arona e ʻai i mea paia pe a lepela+ o ia, pe sau le vavale+ mai iā te ia seʻiloga ua mamā+ o ia, po o lē foʻi e paʻi i se tasi ua lē mamā ona ua paʻi i se tagata oti,+ po o se tane ua alu lona sua,+
5 po o se tane ua paʻi i meaola ua feoaʻi faatasi lea e lē mamā mo ia,+ pe paʻi i se tamāloa o lē e lē mamā e tusa ai o so o se mea e lē mamā ai o ia.+
6 O le tagata e paʻi i so o tasi o nei mea, e lē mamā o ia seʻia oo i le afiafipō, ma e lē ʻai o ia i so o se mea paia, ae e ao ona tāʻele lona tino i le vai.+
7 E mamā o ia pe a goto le lā, a mavae lea ona ʻai ai lea o ia i nisi o mea paia, auā o lana meaʻai lea.+
8 Aua neʻi ʻai o ia i le aano o se manu ua mate fua po o se mea ua saeia e se manu o le vao, ma lē mamā ai o ia.+ O aʻu o Ieova.
9 “‘E ao ona latou tausia la latou matafaioi iā te aʻu, ina ia aua neʻi o latou agasala ona o lea mea, ma feoti+ ai ona o le agasala auā ua latou faaleagaina ai mea paia. O aʻu o Ieova o lē e faapaiaina i latou.
10 “‘Aua neʻi ʻai ai se isi tagata i so o se mea paia.+ Aua foʻi neʻi ʻai se tagata e aumau ma se ositaulaga po o se tagata ua faafaigaluega i so o se mea paia.
11 Pe afai e faatau e se ositaulaga se tagata i ana tupe, e mafai ona ia ʻai ai. O pologa foʻi ua fananau mai i tagata ua i lona fale, e mafai ona latou aai i lana meaʻai.+
12 Afai e nofotane le afafine o le ositaulaga i se isi tagata,* e lē mafai foʻi ona ʻai o ia i mea ua foaʻi e fai ma mea paia.
13 Ae afai ua oti le tane a le afafine o le ositaulaga, po ua teteʻa ma lana tane ae e leai sana fanau, ma e toe foʻi o ia i le fale o lona tamā e pei o aso o lona talavou,+ e mafai ona ʻai o ia i le meaʻai a lona tamā;+ ae aua neʻi ʻai ai lava se isi tagata.
14 “‘Afai e ʻai ma le lē iloa+ e se tasi se mea paia, e ao ona ia faaopoopo i ai le tasi vaelima+ o le tau o le mea paia, ma avatu le mea paia i le ositaulaga.
15 E lē tatau ona faaleagaina e ositaulaga mea paia a le fanauga a Isaraelu, ia ua latou foaʻi atu iā Ieova,+
16 ma māfua ai le faasalaina o tagata ona ua nofosala, i lo latou ʻaina o a latou lava mea paia; auā o aʻu o Ieova o lē ua faapaiaina le nuu.’”
17 Ua fetalai mai pea Ieova iā Mose e faapea:
18 “Ia fai atu iā Arona ma ona atalii, ma le fanauga uma a Isaraelu, e ao ona e fai atu iā i latou, ‘O se tagata o le nuu o Isaraelu po o nisi o ē e aumau i Isaraelu, e na te avatu lana taulaga+ mo ni a latou tautoga,+ po o ni taulaga tauofo,+ e latou te aumaia iā Ieova e fai ai taulaga mū,
19 ina ia talileleia+ ai outou, e ao ona matuā lelei+ lava se manu poʻa mai i le lafu, o se tamaʻi mamoe poʻa po o se tamaʻi ʻoti poʻa.
20 Aua tou te avatua so o se manu e faalētonu lona tino,+ auā e lē talileleia outou i se taulaga faapena.
21 “‘Afai e avatu e se tasi se taulaga faifaatasi+ iā Ieova ina ia faia ai se tautoga,+ po o se taulaga tauofo, e ao ona matuā lelei le manu mai i le lafu povi po o le lafu mamoe, ina ia talileleia ai o ia. Aua neʻi i ai se mea e faalētonu i lona tino.
22 Aua neʻi avatua iā Ieova se manu e tauaso, pe gau sona ivi, pe manuʻa, pe lafetogā, pe poʻupoʻua, pe lafā,+ aua lava neʻi outou faia ai ni taulaga mai i ia manu iā Ieova i le afi+ i luga o le fata faitaulaga.
23 E mafai ona fai le taulaga tauofo i le povi poʻa po o le mamoe e faalēgatusa vaega o lona tino;+ ae e lē talileleia pe afai e faia ai le taulaga o le tautoga.
24 Aua tou te avatua iā Ieova le manu ua omia, po o ua manuʻa, po ua aveese, po ua tipi ese ona fuāmanava,+ ma aua tou te fai taulaga ai i na manu i lo outou laueleele.
25 O ia mea uma mai i le lima o le tagata mai se isi atunuu, aua tou te avatua e fai ma falaoa a lo outou Atua, auā ua leaga ia manu. Ua iai le mea e faalētonu+ i ia manu. E lē talileleia+ ai outou.’”
26 Ua toe fetalai mai Ieova iā Mose e faapea:
27 “Afai e fanau mai se povi poʻa po o se tamaʻi mamoe poʻa po o se ʻoti, e ao ona tuu pea i lona tinā mo aso e fitu,+ ae i le aso lona valu ma aso e sosoo ai, e talileleia ai pe a faia le taulaga, o le taulaga lea iā Ieova ua faia i le afi.
28 Aua tou te fasia se povi ma lana tama po o se mamoe ma lana tama i se aso e tasi.+
29 “Afai tou te avatu se taulaga, o se taulaga faafetai iā Ieova,+ e ao ona outou avatu le taulaga ina ia talileleia ai outou.
30 E ao ona ʻai i lenā aso.+ Aua tou te tuua se mea o le taulaga seʻia oo i le taeao.+ O aʻu o Ieova.
31 “Ia outou tausia ma faia aʻu poloaʻiga.+ O aʻu o Ieova.
32 Aua tou te faaleagaina loʻu igoa paia,+ ma e ao ona faapaiaina aʻu i le fanauga a Isaraelu.+ O aʻu o Ieova o lē o loo faapaiaina outou,+
33 o Lē na aumaia outou mai i le atunuu o Aikupito, e faailoa ai iā te outou o aʻu o lo outou Atua.+ O aʻu o Ieova.”
Faamatalaga Pito i Lalo
^ E faasino atu i se tagata e lē o se tasi o le aiga o Arona.
