Levitiko 23:1-44
23 Ua toe fetalai mai Ieova iā Mose e faapea:
2 “Ia e fai atu i le fanauga a Isaraelu ma e faapea atu iā i latou, ‘O aso o tausamiga+ iā Ieova e ao ona outou faasilasila+ atu o ni tauaofiaga paia. O aso o tausamiga lava ia iā te aʻu:
3 “‘Ia faia galuega i aso e ono, a o le aso lona fitu o le sapati lea e mālōlō lelei ai,+ o se tauaofiaga paia. Aua lava neʻi outou faia ai so o se galuega. O le aso sapati lea iā Ieova i mea uma ua outou nonofo ai.+
4 “‘O aso o tausamiga+ ia iā Ieova, o tauaofiaga paia,+ ia outou faasilasila atu aso atofaina+ e faia ai:
5 O le masina muamua, o le aso lona sefulu fā o le masina,+ i le afiafipō* e faia ai le paseka+ iā Ieova.
6 “‘O le aso lona sefulu lima o lea masina ia fai ai le tausamiga o le falaoa e lē faafefeteina iā Ieova.+ E fitu aso e tou te aai ai i falaoa e lē faafefeteina.+
7 O le aso muamua e tou te faia ai le tauaofiaga paia.+ Aua lava neʻi outou faia ai so o se galuega mamafa.
8 Ae e ao ona outou avatu taulaga iā Ieova ua faia i le afi i aso e fitu. O le aso lona fitu e faia ai le tauaofiaga paia. Aua lava neʻi outou faia ai so o se galuega mamafa.’”
9 Ua fetalai mai pea Ieova iā Mose e faapea:
10 “Ia e fai atu i le fanauga a Isaraelu ma e faapea atu iā i latou, ‘Pe a outou taunuu atu i le laueleele ou te tuu atu iā te outou, ma ua outou selesele i a outou seleselega, e ao ona outou avatu se fusikarite* o uluaʻi fua+ o a outou seleselega i le ositaulaga.
11 E ao ona ia lūlū i luma o Ieova le fusi karite i le isi itu i le isi itu+ ina ia talileleia ai outou. E ao i le ositaulaga ona lūlū i le isi itu i le isi itu i le aso tonu e uma ai le sapati.
12 I le aso ua lūlūina ai le fusi saito i le isi itu i le isi itu mo outou, e ao ona outou avatu ai se tamaʻi mamoe poʻa e matuā lelei lava, faatoʻā atoa le tausaga, e faia ai le taulaga mū iā Ieova;
13 ma e tusa ma le taulaga i meaʻai e lua vaesefulu o le fua o le efa o le falaoamata lelei ua iai sina suāuu, o le taulaga lea iā Ieova ua faia i le afi o se mea manogi e faamalieina ai; ma o le taulaga i meainu e tasi vaefā o le sinu o le uaina.
14 Aua tou te aai i se falaoa, po o ni fatu ua tao, po o ni fatu fou seʻia oo i lea aso,+ lea tou te avatu ai le taulaga i lo outou Atua. O le tulafono lea mo se taimi umi mo outou ma a outou tupulaga o loo mulimuli mai, i mea uma ua outou nonofo ai.
15 “‘E ao ona outou faitau sapati e fitu+ e amata mai i le aso e uma ai le sapati, mai i le aso na outou aumaia ai le fusi karite e faia ai le taulaga lūlū. E tatau ona fitu vaiaso atoatoa.
16 E ao ona outou faitau aso e lima sefulu+ mai i le aso e uma ai le sapati lona fitu, ona outou avatu ai lea o le taulaga i meaʻai fou+ iā Ieova.
17 Ia outou aumaia mai i mea ua outou nonofo ai o falaoa e lua+ e faia ai le taulaga lūlū. Ia faia mai i le lua vaesefulu o le fua o le efa o le falaoamata lelei. E tatau ona tao faatasi ma le mea faafefete+ o uluaʻi fua matua ia iā Ieova.+
18 E ao ona outou aumaia falaoa faatasi ma tamaʻi mamoe poʻa e matuā lelei lava e fitu,+ e faatoʻā atoa tausaga o ia manu, o le tamaʻi povi poʻa e tasi ma mamoe poʻa e lua. E ao ona faia ai le taulaga mū iā Ieova faatasi ma taulaga i meaʻai ma taulaga i meainu e fai ma taulaga ua faia i le afi, o se mea manogi e faamalieina ai Ieova.
19 E ao ona outou avatu se tamaʻi ʻoti+ se tasi e fai ai le taulaga o agasala, ma tamaʻi mamoe poʻa e lua e taʻitasi tausaga o ia manu e fai ai le taulaga faifaatasi.+
20 E ao i le ositaulaga ona lūlū o tamaʻi mamoe poʻa e lua i le isi itu i le isi itu,+ faatasi ma falaoa o uluaʻi fua matua, o le taulaga lūlū i luma o Ieova. E tatau ona faia o ni mea paia iā Ieova mo le ositaulaga.+
21 E ao ona outou faia se faasilasilaga+ i lea lava aso; e faia se tauaofiaga paia mo outou. Aua lava neʻi outou faia ai so o se galuega mamafa. O le tulafono lea mo se taimi umi mo outou ma a outou tupulaga o loo mulimuli mai, i mea uma ua outou nonofo ai.
22 “‘Pe a outou faia le seleselega i o outou fanua, aua e te selesele pito uma o lou fanua pe a faia lau seleselega, aua foʻi e te ao ni fua ua paʻuʻū i lau seleselega.+ E ao ona e tuu ia mea mo lē e mativa+ ma le tagata ese ua aumau.+ O aʻu o Ieova o lo outou Atua.’”
23 Ua fetalai atili mai Ieova iā Mose e faapea:
24 “Ia e fai atu i le fanauga a Isaraelu e faapea, ‘I le masina lona fitu,+ i le aso muamua o le masina, e ao ona outou mālōlō ai, o se aso faamanatu e faailoa atu e ala i le ilia o pū,+ o le tauaofiaga paia.+
25 Aua lava tou te faia ai so o se galuega mamafa ma e ao ona outou avatu le taulaga iā Ieova ua faia i le afi.’”
26 Ua fetalai mai pea Ieova iā Mose e faapea:
27 “Peitaʻi o le aso lona sefulu o le masina lona fitu, o le aso lea o le togisala.+ E ao ona faia ai se tauaofiaga paia mo outou, ma e ao ona outou faapuapuagatia outou lava,+ ma avatu le taulaga+ iā Ieova ua faia i le afi.
28 Aua tou te faia ai so o se galuega i lea aso, auā o le aso o le togisala e fai ai le togisala+ mo outou i luma o Ieova o lo outou Atua;
29 auā o le tagata e lē o faapuapuagatia o ia lava i lea aso, e tatau ona fasiotia o ia.+
30 O se tasi e faia so o se galuega i lea aso, ou te fasiotia lava lea tagata.+
31 Aua lava neʻi outou faia ai so o se galuega.+ O le tulafono lea mo se taimi umi mo outou ma a outou tupulaga o loo mulimuli mai, i mea uma ua outou nonofo ai.
32 O le sapati lea e tou te mālōlō lelei ai,+ ma e ao ona outou faapuapuagatia+ ai outou lava i le afiafipō o le aso lona iva o le masina. E mai le afiafipō i le isi afiafipō e tou te tausia ai la outou sapati.”
33 Ua fetalai mai pea Ieova iā Mose e faapea:
34 “Ia e fai atu i le fanauga a Isaraelu e faapea, ‘O le aso lona sefulu lima o le masina lona fitu, o le tausamiga lea o fale lauvao mo aso e fitu iā Ieova.+
35 O le aso muamua, o le tauaofiaga paia lea. Aua lava neʻi faia ai so o se galuega mamafa.
36 E ao ona outou avatu le taulaga iā Ieova ua faia i le afi i aso e fitu. O le aso lona valu, e faia ai la outou tauaofiaga paia,+ ma e ao ona outou avatu le taulaga iā Ieova ua faia i le afi. O le fonotaga paia lea. Aua lava neʻi outou faia ai so o se galuega mamafa.
37 “‘O aso o tausamiga+ ia iā Ieova, e ao ona outou faasilasila atu o ni tauaofiaga paia,+ ina ia avatu ai le taulaga iā Ieova ua faia i le afi:+ o le taulaga mū,+ o le taulaga i meaʻai,+ ma le taulaga i meainu+ e tusa ma le faasologa o aso taʻitasi,
38 atoa ma sapati a Ieova,+ ma a outou meaalofa,+ o a outou taulaga o le tautoga,+ atoa foʻi ma a outou taulaga tauofo,+ e ao ona avatu iā Ieova.
39 Peitaʻi, i le aso lona sefulu lima o le masina lona fitu, pe a uma ona outou aoaoina fua o o outou fanua, e ao ona outou faamanatu le tausamiga+ a Ieova i aso e fitu.+ O le aso muamua o le aso e mālōlō lelei ai, o le aso lona valu foʻi e mālōlō lelei ai.+
40 E ao ona outou ave i le aso muamua o fua o laau matagofie, o laulaau o laau pama,+ o lālā laau e tele ai laulaau ma laau o le garava mai i le vanu ua iai le ālia, ma e ao ona outou olioli+ i luma o Ieova lo outou Atua i aso e fitu.
41 E ao ona outou faamanatu lenei tausamiga iā Ieova mo aso e fitu i tausaga taʻitasi.+ Talu ai o se tulafono lea mo se taimi umi mo outou ma a outou tupulaga o loo mulimuli mai, e ao ona outou tausia i le masina lona fitu.
42 E ao ona outou nonofo i fale lauvao i aso e fitu.+ E ao ona nonofo uma ai tagatānuu o Isaraelu i fale lauvao,+
43 ina ia iloa+ ai e o outou tupulaga o loo mulimuli mai, o faleʻie na ou faanonofo ai Isaraelu ina ua ou aumaia i latou mai i le atunuu o Aikupito.+ O aʻu o Ieova o lo outou Atua.’”
44 Ua faapea lava ona fai atu Mose i le fanauga a Isaraelu e uiga i aso o tausamiga+ iā Ieova.
Faamatalaga Pito i Lalo
^ I le gagana Eperu, i “le va o afiafi e lua.” O lona uiga o le va o le goto o le lā ma le pō.
^ O le “karite” o se isi ituaiga saito. O le upu Peretania o le barley.
