Levitiko 25:1-55
25 Ua toe fetalai mai Ieova iā Mose i le Mauga o Sinai e faapea:
2 “Ia e fai atu i le fanauga a Isaraelu ma e faapea atu iā i latou, ‘Pe a outou taunuu atu i le laueleele ou te foaʻiina atu iā te outou,+ aua neʻi galueaʻiina le laueleele ona o le sapati iā Ieova.+
3 E ono tausaga e te lūlū ai fatu i lou fanua, e ono foʻi tausaga e te teu ai lou togāvine, ma ao ai fua o faaeleeleaga o le fanua.+
4 Ae i le tausaga lona fitu o le sapati iā Ieova ma ia tuu ai pea le fanua,+ auā o le sapati lea. Aua e te lūlū ai fatu i lou fanua, ma aua e te teuina ai lou togāvine.
5 O fua o laau ua ola aʻe mai i fatu na paʻuʻū o lau seleselega, aua e te seleseleina, aua foʻi e te aoaoina vine mai i togāvine e leʻi teuina. E ao ona tuu ai pea le fanua mo le tausaga.
6 O fua ua fua mai i le sapati, e ao ona fai ma meaʻai mo outou, o oe ma lau tane pologa, o lau teine pologa, o lē ua faigaluega totogi, o lē o aumau ma oe, ma tagata ese o aumau faatasi ma oe,
7 o au manu lalata, ma manu o le vao o loo i lou fanua. E ao ona fai ia fua uma o le fanua ma meaʻai.
8 “‘Ia e faitauina foʻi sapati e fitu o tausaga, e fitu taimi faatele i le fitu tausaga, ma o aso o sapati e fitu o tausaga, e tusa ia ma le fā sefulu iva tausaga iā te oe.
9 Ona ili+ leotele lea o le pū i le masina lona fitu i le aso lona sefulu o le masina;+ i le aso o le togisala,+ e ao ona outou faatulagaina le iliga o pu i lo outou atunuu atoa.
10 E tatau ona outou faapaiaina le tausaga lona lima sefulu ma faasilasila atu le saʻolotoga i le atunuu i ona tagata uma.+ O le Iupelī+ lea mo outou, ma e ao ona outou toe faafoʻi atu i tagata taʻitoʻatasi i lona lava fanua, e ao foʻi ona outou toe faafoʻi atu tagata taʻitoʻatasi i lona aiga.+
11 E fai le tausaga lona lima sefulu ma Iupelī mo outou.+ Aua tou te lūlūina fatu pe seleseleina fua o laau ua ola aʻe mai i fatu na paʻuʻū, pe aoaoina vine mai i togāvine e leʻi teuina.+
12 Auā o le Iupelī lea. Ia avea o se mea paia iā te outou. Ia outou aai mai i mea e fua mai i le fanua.+
13 “‘O le tausaga foʻi o le Iupelī, e ao ona outou toe faafoʻi atu ai tagata taʻitoʻatasi i lona lava fanua.+
14 Afai e te faatau atu ni mea i lou tuaoi, pe e te faatau mai se mea mai i lou tuaoi, aua neʻi faia ni faiga faapiʻopiʻo o le tasi i le isi.+
15 Pe a e faatau mai se fanua mai i lou tuaoi, e ao ona e faitau le aofaʻi o tausaga talu mai le Iupelī; e tatau ona ia faatatau le tau e tusa ai ma le aofaʻi o tausaga o le a aoao mai ai fua o faaeleeleaga.+
16 E tusa ma le tele o tausaga, e ao ona ia faateleina lona tau,+ e tusa foʻi ma le itiiti o tausaga, e ao ona ia faaitiitia foʻi lona tau, auā e tusa ma le aofaʻiga o fua o faaeleeleaga ua ia faatau mai ai iā te oe.
17 Aua tou te faia ni faiga faapiʻopiʻo i se tasi o ou tuaoi,+ ae ia e mataʻu i lou Atua,+ auā o aʻu o Ieova o lo outou Atua.+
18 Ia outou usiusitaʻi i aʻu tulafono ma tausi i iʻuga o aʻu faamasinoga, ma ia outou faia ai. Ona outou nonofo ai lea ma le saogalemu i le laueleele.+
19 E fua mai lava le laueleele,+ e tou te aai ma maoona ai ma nonofo ai ma le saogalemu.+
20 “‘Ae afai tou te faapea mai: “O ā mea o le a matou aai ai i le tausaga lona fitu, auā matou te leʻi lūlūina ni fatu pe aoaoina fua o a matou faaeleeleaga?”+
21 o le mea lea, ou te avatu ai laʻu faamanuiaga mo outou i le tausaga lona ono, ma e fua mai faaeleeleaga mo tausaga e tolu.+
22 E ao ona outou lūlū ni fatu i le tausaga lona valu, e ao foʻi ona outou aai mai i fua tuai o faaeleeleaga seʻia oo i le tausaga lona iva. E tou te aai i fua tuai seʻia fua mai ona faaeleeleaga.
23 “‘E lē tatau ona faatau motu le fanua,+ auā o aʻu e ana.+ Auā i loʻu manatu o outou o tagata ese ma ē e aumau i le fanua.+
24 E tusa ma laueleele uma o le a fai mo outou, e ao ona outou tuu atu le aiā e toe faatau mai ai fanua.+
25 “‘Afai e oo ina mativa lou uso ma ua ia faatau atu nisi o ana mea, e ao i lē e na te toe faataua, o se tasi foʻi e la te aiga ona alu atu lea ma toe faatau mai mea na faatau atu e lona uso.+
26 Afai ua lē o iā te ia sē e na te toe faataua mai, ma ua lava le tupe ua maua i lana lava galuega e toe faatau mai ai lona fanua,
27 e ao ona ia faitau tausaga mai i le taimi na ia faatau atu ai lona fanua, ma faafoʻi atu le tupe ua totoe i le tagata o lē na faatauina mai, ma toe foʻi atu o ia i lona fanua.+
28 “‘Ae afai e na te lē gafatia le tupe e avatu iā te ia, o mea ua ia faatau atu e faaauau ona i le lima o lē na faataua seʻia oo i le tausaga o le Iupelī; e toe faamatuu mai ia mea i le Iupelī,+ ma toe foʻi atu ai o ia i ana mea.+
29 “‘Ae afai e faatau atu e se tasi se fale i le aai ua siʻomia i le pā, e faaauau pea lana aiā mo le tausaga e toe faatau mai ai le fale, e amata mai i le taimi na ia faatau atu ai; e faaauau pea mo le tausaga lana aiā e toe faatau mai ai.+
30 Ae afai e uma le tausaga e leʻi toe faatauina mai e ia le fale, ona fai pea lea o le fale ua iai i le aai ua siʻomia i le pā ma meatotino a lē na faatauina e oo lava i ona tupulaga o loo mulimuli mai. E lē faamatuuina atu i le Iupelī.
31 Ae o fale o nuu e leai ni pā o siʻomia ai, e ao ona taʻua o ni vaega o fanua i uta. E faaauau pea le aiā e toe faatau ai+ ma e faamatuu atu i le Iupelī.+
32 “‘Ae o fale o le ʻau sa Levī, ia ua iai i totonu o o latou aai,+ e ao ona faaauau pea le aiā e toe faatau mai ai e le ʻau sa Levī.+
33 A faapea e leʻi toe faatauina mai meatotino a le ʻau sa Levī, e ao ona faamatuu atu le fale ua faatauina ua iai i lona aai pe a oo i le Iupelī;+ auā o fale o i aai o le ʻau sa Levī, o lo latou tofi lea mai i le fanauga a Isaraelu.+
34 O fanua taalaelae+ i tua o o latou aai e lē faatauina, auā e fai pea ia fanua mo i latou.
35 “‘Afai e oo ina mativa lou uso, o lē e nofo latalata ane iā te oe+ ma ua lē tagolima i se tupe, e ao ona e tausia o ia.+ E pei ona faia i le tagata ese ma lē e aumau,+ ia faapea ona e faia i lou uso ina ia ola ai pea o ia faatasi ma oe.
36 Aua e te manaʻo i se tupe faasili po o se polofiti i nonogatupe mai iā te ia,+ ae ia e mataʻu i lou Atua;+ ina ia ola ai lou uso faatasi ma oe.
37 Aua e te nonō atu iā te ia au tupe ia maua mai ai se tupe faasili,+ ma aua e te avatu au meaʻai ona o se polofiti.
38 O aʻu o Ieova o lo outou Atua, o lē na aumaia outou mai i le atunuu o Aikupito ina ia avatu iā te outou le laueleele o Kanana,+ e faailoa ai iā te outou o aʻu o lo outou Atua.+
39 “‘Afai e oo ina mativa lou uso e nofo latalata ane iā te oe ma ia faatau atu o ia iā te oe,+ aua e te faafaigaluega o ia e pei o se pologa.+
40 E ao ona faia o ia e pei o sē ua faigaluega totogi,+ e pei foʻi o sē e aumau. E ao ona galue iā te oe seʻia oo i le tausaga o le Iupelī.
41 Ona alu lea o ia, o ia ma ona atalii faatasi ma ia, ua toe foʻi i lona aiga, ma ia toe foʻi i meatotino a ona augātamā.+
42 Auā o aʻu pologa le fanauga a Isaraelu o ē na ou aumaia mai i le atunuu o Aikupito.+ E lē tatau ona latou faatauina i latou e fai ma pologa.
43 Aua e te pule ma le sauā+ iā te ia, a ia e mataʻu i lou Atua.+
44 E maua mai i atunuu e siʻomia ai outou, o lau tane pologa ma lau teine pologa, e tou te faatau mai iā i latou o se tane pologa ma se teine pologa.
45 E maua mai foʻi i fanau a ē e aumau o ni tagata ese ua iā te outou,+ e tou te faatau mai ai iā i latou ni pologa, e mai foʻi i o latou aiga ua faatasi ma outou o ē na latou fanauina i lo outou laueleele; o outou e ona i latou.
46 E tou te tuu atu ia tagata i o outou atalii o se tofi e fai mo i latou i aso uma lava.+ Ia outou faafaigaluega ia tagata, ae aua tou te pule ma le sauā+ i o outou uso, o le tasi i le isi, o le fanauga lea a Isaraelu.
47 “‘Ae afai e oo ina mauʻoa se tagata ese po o sē e aumau, ae ua oo ina mativa lou uso Isaraelu i lou vaipanoa, ma ua ia faatau atu o ia i le tagata ese po o lē e aumau faatasi ma oe, po o se isi o le aiga o le tagata ese,
48 e faaauau pea le aiā o le toe faatau mai o ia+ pe a uma ona ia faatauina atu o ia.+ E mafai e se tasi o ona uso ona toe faatau mai o ia.+
49 E mafai ona toe faatau mai o ia e le uso o lona tamā, po o le atalii o le uso o lona tamā, po o se isi o ona toto ma aano,+ o se tasi o lona aiga e mafai ona toe faatau mai o ia.
“‘Pe afai foʻi ua oo ina mauʻoa o ia, e mafai ona ia toe faatau mai o ia lava.+
50 E ao ona la faitau ma lē na faatauina mai o ia mai i le tausaga na faatauina atu o ia lava iā te ia seʻia oo i le tausaga o le Iupelī,+ ma e tatau ona tutusa le tau na faatau atu ai o ia lava ma ia tausaga.+ Ia vaai i lana galuega i na tausaga uma e pei lava o aso o se tagata faigaluega totogi.+
51 Afai e tele pea tausaga o totoe, e ao ona ia toe totogi atu le tupe na faatau ai o ia e tusa ma tausaga o totoe.
52 Ae afai e itiiti tausaga o totoe seʻia oo i le tausaga o le Iupelī,+ e ao ona ia faia se faatatauga mo ia. E na te faaitiitia le tau o lona faatauina mai e tusa ma tausaga ia e totoe.
53 E ao ona faia pea o ia e pei o se tagata faigaluega totogi+ mai i lea tausaga i lea tausaga. Ia e faamautinoa e lē pule sauā+ o ia iā te ia.
54 Peitaʻi afai e lē mafai ona ia faatauina mai o ia lava e tusa ma ia tuutuuga, e ao ona alu o ia i le tausaga o le Iupelī,+ o ia ma ona atalii faatasi ma ia.
55 “‘Auā o le fanauga a Isaraelu o pologa i latou iā te aʻu. O i latou o aʻu pologa+ na ou aumaia mai i le atunuu o Aikupito.+ O aʻu o Ieova o lo outou Atua.+
