Levitiko 8:1-36
8 Ua fetalai mai Ieova iā Mose e faapea:
2 “Ia aumai Arona ma ona atalii faatasi ma ia,+ o ofu,+ o le suāuu e faauu+ ai, o le povi poʻa o le taulaga o agasala,+ o mamoe poʻa e lua, o le ato o falaoa e lē faafefeteina,+
3 ma ia faapotopoto+ le faapotopotoga atoa i luma o le faitotoʻa o le faleʻie o le feiloaʻiga.”+
4 Ua faia e Mose e pei ona poloaʻi mai ai Ieova iā te ia, ma ua faapotopoto faatasi le faapotopotoga uma i luma o le faitotoʻa+ o le faleʻie o le feiloaʻiga.
5 Ua faapea atu Mose i le faapotopotoga: “O le mea lenei ua poloaʻi mai ai Ieova e fai.”+
6 Ona aumaia lea e Mose o Arona ma ona atalii, ua ia faatonuina i latou e tāʻeele+ i le vai.+
7 Ona ia faaofu lea o ia i le ofu talaloa+ ma fusi o ia i le fusi ʻie,+ ma faaofu o ia i le ofu talaloa lima pupuu,+ ma ua ia faaofu o ia i le efota+ ma fusimau iā te ia i le fusi+ o le efota.
8 Ona ia avane ai lea o le ufifatafata,+ ma tuu i le ufifatafata o le Urima ma le Tumema.+
9 Ona ia nonoa lea i luga o lona ulu o le pulou ʻie,+ ma tuu le pale auro iila o le faailoga paia lea o le tuuina atu,+ i luga o le pulou ʻie, e pei ona fetalai mai ai Ieova iā Mose.
10 Ua ave foʻi e Mose o le suāuu e faauu ai ma faauu i le faleʻie paia,+ ma mea uma lava ua iai, ma faapaiaina na mea.
11 Ua ia sausau faafitu sina vaega o le suāuu i luga o le fata faitaulaga, ma faauu ai le fata faitaulaga,+ o mea uma e faaaogā ai, o le faatanoa ma lona tulaga, ina ia faapaiaina ai ia mea.
12 Ona ia liligi lea o se vaega o le suāuu e faauu ai, i luga o le ulu o Arona, ma faauu ai o ia ina ia faapaiaina ai o ia.+
13 Ona aumaia+ lea e Mose o atalii o Arona ma faaofu i latou i ofu talaloa, ma fusi iā i latou i fusi ʻie,+ ma nonoa pulou+ i o latou ulu, e pei ona poloaʻi mai ai Ieova iā Mose.
14 Ona ia taʻitaʻi atu lea o le povi poʻa+ e fai ai le taulaga o agasala, ua faaee foʻi e Arona ma ona atalii o latou lima i luga o le ulu+ o le povi poʻa o le taulaga o agasala.
15 Ona fasi+ lea e Mose o le povi poʻa ma ave le toto,+ ua lolō i ai lona tamatamaʻilima ma nini ai seu o le fata faitaulaga ina ia soo ma faapaiaina ai le fata faitaulaga mai i le agasala, a o le toto ua totoe, ua ia sasaa i lalo o le fata faitaulaga, ina ia faapaiaina ai ma faia ai le togisala+ mo le fata faitaulaga.
16 Ona ia ave lea o gaʻo uma ua ufiufi ai gaʻau, o le gaʻo i luga o le ate, ma fatugaʻo e lua ma gaʻo o ia mea, ma ua susunuina ai e Mose i luga o le fata faitaulaga.+
17 Ua susunu le povi poʻa, o lona paʻu, o lona aano ma ona otaota i tua o le togālauapi,+ e pei ona poloaʻi mai ai Ieova iā Mose.
18 Ona ia aumaia lea o le mamoe poʻa o le taulaga mū, ma ua faaee foʻi e Arona ma ona atalii o latou lima i luga o le ulu o le mamoe poʻa.+
19 Ua mavae lea, ona fasi ai lea e Mose o le mamoe poʻa ma sausau le toto ma ua soo ai le fata faitaulaga.+
20 Ua ia pena le mamoe poʻa i tufaaga,+ ona susunuina ai lea e Mose o le ulu ma tufaaga ma le gaʻo.
21 Ua ia fufulu gaʻau ma vae* i le vai, ona susunu atoa lea e Mose o le mamoe poʻa i luga o le fata faitaulaga.+ O le taulaga mū ua fai ma mea manogi e faamalieina ai.+ O se taulaga iā Ieova ua faia i le afi, e pei ona poloaʻi mai ai Ieova iā Mose.
22 Ua ia aumaia le mamoe poʻa lona lua, o le mamoe poʻa o le tofiga,+ ma ua faaee foʻi e Arona ma ona atalii o latou lima i luga o le ulu o le mamoe poʻa.
23 Ona fasi ai lea e Mose ma ave sina toto ma tuu i le lautaliga taumatau o Arona, ma i luga foʻi o le limamatua o lona lima taumatau, ma le vaematua o lona vae taumatau.+
24 Ona aumaia ai lea e Mose o atalii o Arona ma tuu sina vaega o le toto i lautaliga o o latou taliga taumatau, i limamatua o o latou lima taumatau, ma vaematua o o latou vae taumatau; a o le toto ua totoe ua sausau e Mose ma ua soo ai le fata faitaulaga.+
25 Ua ia ave foʻi le gaʻo ma le siʻusiʻu gaʻoa, o gaʻo uma i luga o gaʻau,+ o le gaʻo o le ate, o fatugaʻo e lua ma le gaʻo o ia mea, ma le alagavae taumatau.+
26 Ua ia aumai mai i le ato o falaoa e lē faafefeteina, lea o loo i luma o Ieova, o le falaoa e lē faafefeteina lapotopoto+ e tasi, atoa ma le falaoa lapotopoto e tasi ua iai sina uu,+ ma le falaoa manifinifi+ e tasi. Ona ia tuu lea o ia mea i luga o le gaʻo ma le alagavae taumatau.
27 Ua ia tuu o ia mea i luga o alofilima o Arona ma luga o alofilima o ona atalii, ona lūlū ai lea o ia mea i le isi itu ma le isi itu, o le taulaga lūlū lea iā Ieova.+
28 Ona aveese lea e Mose o ia mea mai i o latou lima ma susunu i luga o le fata faitaulaga, e susunu faatasi ma le taulaga mū.+ O le taulaga o le tofiga+ lea, o se mea manogi lea ua faamalieina ai.+ O le taulaga iā Ieova ua faia i le afi.+
29 Ua ave foʻi e Mose o le fatafata+ ma lūlū i le isi itu ma i le isi itu, o le taulaga lūlū lea i luma o Ieova.+ E fai mo Mose lenei tufaaga+ mai i le mamoe poʻa o le tofiga, e pei ona poloaʻi mai ai Ieova iā Mose.
30 Ona ave lea e Mose o sina uu e faauuina ai,+ ma se vaega o le toto o loo i luga o le fata faitaulaga, ua sausau i luga o Arona ma ona ofu, i luga o ona atalii ma ofu o ona atalii faatasi ma ia. O le mea lea, ua ia faapaiaina+ ai Arona ma ona ofu, o ona atalii ma ofu o ona atalii+ faatasi ma ia.
31 Ona fai atu lea o Mose iā Arona ma ona atalii: “Ia saka+ le aano o le manu i luma o le faitotoʻa o le faleʻie o le feiloaʻiga, ma o i inā foʻi tou te aai ai i le aano o le manu,+ atoa ma le falaoa ua i totonu o le ato o le tofiga, e pei ona ou poloaʻi atu e faapea, ‘E ʻai e Arona ma ona atalii.’
32 A o mea ua totoe o le aano o le manu ma falaoa, e tou te susunuina i le afi.+
33 Aua neʻi outou ulufafo i le faitotoʻa o le faleʻie o le feiloaʻiga mo aso e fitu,+ seʻia oo i le aso e faataunuu ai lo outou tofiga, auā e manaʻomia aso e fitu e tuuina atu ai le pule*+ iā te outou.
34 E pei ona faia i le asō, ua poloaʻi mai Ieova e fai ina ia faia ai le togisala mo outou.+
35 Ia outou nonofo i le faitotoʻa o le faleʻie o le feiloaʻiga i le ao ma le pō i aso e fitu,+ ma e tatau ona outou faia le leoleoga ua tuuina mai e Ieova,+ neʻi outou oti; auā ua faapea lava ona poloaʻi mai ai iā te aʻu.”
36 Ua faia e Arona ma ona atalii o mea uma ua poloaʻi mai ai Ieova e ala iā Mose.
Faamatalaga Pito i Lalo
^ E faasino atu i le vaega pito i lalo o le tulivae agaʻi i lalo i le tapuvae.
^ I le gagana Eperu, “ia faatumu le lima i le mana” ma e faasino atu i le tuu atu o le pule atoa i lima o ē e auauna o ni ositaulaga.
