Luka 12:1-59
12 I lenā taimi, ua faapotopoto mai ai le faitau afe o le motu o tagata, o lea ua soli ai e le tasi le isi. Ona ia fetalai muamua atu lea i ona soo: “Ia outou mataala i le mea faafefete+ a le ʻau Faresaio, o le faafiaamiotonu lea.+
2 Auā e leai se mea e matuā natia e lē faaalia, e leai foʻi se mea lilo e lē faailoaina.+
3 O mea ua outou taʻu atu i le pōuliuli, e lagonaina i le ao; o mea foʻi tou te musumusu atu i o outou lava potu, e talaʻia mai i tumutumu o fale.+
4 Ou te fai atu foʻi iā te outou aʻu uō e,+ Aua tou te matataʻu i ē e fasiotia le tino, auā pe a uma, ona lē toe mafai lea ona latou faia o se isi mea.+
5 Ae peitaʻi, o le a ou faailoa atu o lē e tou te matataʻu i ai: Ia matataʻu i lē+ e iai le pule e lafoina ai i Kena,*+ pe a uma ona fasiotia e ia. Ioe, ou te fai atu iā te outou, ia matataʻu+ iā te Ia.
6 Pe e lē faatauina atu ea ni tamaʻi manulele se lima i tupe iti e lua? Ae e lē galo i le Atua+ se tasi o na tamaʻi manulele.
7 Ae ua faitaulia lauulu+ uma o o outou ulu. Aua neʻi outou fefefe; e sili atu ona tāua outou nai lo tamaʻi manulele e tele.+
8 “Ou te fai atu iā te outou, O sē na te taʻu+ atu lona aufaatasi ma aʻu i luma o tagata, e taʻu atu foʻi e le Atalii o le tagata lona aufaatasi ma ia i luma o agelu a le Atua.+
9 A o sē e faafitia+ aʻu i luma o tagata, ou te faafitia foʻi o ia i luma o agelu a le Atua.+
10 O sē e tautala taufaaleaga i le Atalii o le tagata, e faamagaloina o ia, a o lē e upuleaga i le agaga paia, e lē faamagaloina lava.+
11 Pe afai latou te tuuina atu outou i luma o fono, tagata o le malo, ma pule, aua tou te popole pe faapefea ona outou tali atu, ma po o ā foʻi upu tou te tautatala+ atu ai.
12 Auā e aʻoaʻo outou e le agaga paia+ i lenā lava taimi, i mea e ao ona outou fai+ atu ai.”
13 Ona fai mai lea o se tasi o le motu o tagata: “Le Aʻoaʻo e, ia e fetalai atu i loʻu uso ina ia vaelua mai le tofi iā te aʻu.”
14 Ua fetalai atu o ia: “Sole, o ai na tofia aʻu e faamasinoina+ pe vaevaeina o outou tofi?”
15 Ua ia fetalai atu iā i latou: “Ia outou mataala pea ma leoleo iā te outou i le manaʻo tele,+ aua e lē ola se tasi i le tele o ana mea ua iā te ia.”+
16 Ua ia fetalai atu iā i latou i se talafaatusa: “Ua fua tele mai le fanua o se tasi tagata mauʻoa.
17 Ona manatu ifo lea o ia e faapea, ‘O le ā se mea ou te faia, auā o lenei ua leai se mea e tuu ai aʻu saito?’
18 Ona ia faapea lea, ‘O le mea lenei o le a ou faia:+ O le a ou tala i lalo oʻu fale saito, ma toe fau ni fale tetele, o i inā o le a ou teuina ai aʻu saito ma aʻu mea lelei uma.+
19 Ona ou faapea+ ifo lea iā te aʻu: “Ua ou maua le tele o mea lelei ua faaputuina mo le tele o tausaga; ia ou+ faifaimālie ai, ia ʻai ma inu, ma fiafia.”’
20 A ua fetalai atu le Atua iā te ia, ‘O oe na le tagata lē faautauta, o le pō nei e latou te mananaʻo ai i lou+ ola. O ai la o le a fai mo ia mea na e faaputuina?’+
21 O lea, e faapena le tagata e faaputu ʻoa mo ia lava, ae e lē mauʻoa i le silafaga a le Atua.”+
22 Ua fetalai atu o ia i ona soo: “Ona o lenei mea, ou te fai atu ai iā te outou, Aua tou te toe popole i o outou ola i mea tou te aai ai, po o outou tino i ofu tou te oofu+ ai.
23 Auā e sili ona tāua o le ola nai lo o meaʻai, ma le tino nai lo o ofu.
24 Ia vaavaai lelei i oreva,*+ auā latou te lē lūlū ni fatu pe selesele, pe faaputu i se fale saito, ae e fafagaina i latou e le Atua. Pe e lē sili ea ona tāua outou i lo manufelelei?+
25 O ai ea se tasi o outou e mafaia i lona popole ona faaopoopo ni nai aso* i lona olaga?+
26 O lea, afai tou te lē mafai ona faia o lenei mea, aiseā la e popole+ ai fua i isi mea o totoe?
27 Ia vaavaai lelei pe e faapefea ona tutupu lili o le vao,+ latou te lē galulue, e lē milo foʻi. Ae ou te fai atu iā te outou, E oo lava iā Solomona ma lona mamalu uma, e leʻi tutusa lona matagofie ma se tasi o nei lili.+
28 O lenei, afai ua faaofuina e le Atua laau o le vao ia ua iai i le asō, ae lafoina i le ogaumu a taeao, e sili atu ona ia faaofuina outou o ē faatuatua itiiti!+
29 O lea, aua tou te toe soona popole+ i le saʻilia po o ā mea tou te aai ai, ma po o ā foʻi mea tou te inu ai.
30 Auā o mea uma ia o loo saʻilia ma le naunau e tagata o nuu ese. Ae ua silafia e lo outou Tamā, o mea ia o loo outou manaʻomia.+
31 Ae peitaʻi, ia faaauau pea ona outou saʻili lona malo, ona faaopoopoina ai lea o nei mea iā te outou.+
32 “Aua le fefefe+ le lafu mamoe itiiti e,+ auā ua finagalo malie lo outou Tamā e tuuina atu le malo+ iā te outou.
33 Ia faatau atu+ a outou mea ma foaʻi atu meaalofa.+ Ia fai ni a outou ato tupe anagatā, o le ʻoa i le lagi+ e lē mou atu, e leai foʻi se gaoi e osofaʻi atu ma gaoia, e lē atia foʻi e se mogamoga.*
34 Auā o le mea e iai lo outou ʻoa, e iai foʻi ma o outou loto.+
35 “Ia fusia o outou sulugātiti,+ ma ia mumū pea a outou molī,+
36 ona pei lea o outou o tagata ua faatalitali i le toe foʻi mai o lo latou matai+ mai i le faaipoipoga.+ Ua taunuu o ia ma tuʻituʻi+ mai, ona latou tatala atu loa lea iā te ia.
37 E fiafia na pologa pe a taunuu mai lo latou matai, ma maua mai o loo latou mataala!+ E moni, ou te fai atu iā te outou, E sauniuni loa*+ o ia ma fai atu iā i latou e taooto e aai, ona alu ane lea o ia ma auauna atu iā i latou.+
38 E fiafia i latou+ pe a taunuu mai o ia i le leoleoga lona lua, po o le leoleoga lona tolu* foʻi, ma maua i latou o faia faapea!
39 Ae ia iloa lenei mea, pe ana iloa e le tagata o le aiga le itula o le pō e sau ai le gaoi, semanū e faaauau ona mataala o ia ma na te lē tuua lona fale ia gaoia.+
40 O le mea lea ia outou nofosauni ai, auā o le itula tou te lē manatunatu ai, e sau+ ai le Atalii o le tagata.”
41 Ona fai mai lea o Peteru iā te ia: “Le Alii e, po o e fetalai mai lenei talafaatusa iā i matou po o tagata uma?”
42 Ua fetalai atu le Alii: “O ai foʻi le auauna pule e faamaoni+ ma faautauta,+ ua tofia e lona matai e vaavaaia lana ʻautautua, ma avatu a latou meaʻai e talafeagai i le taimi tatau?+
43 E fiafia lenā pologa pe a taunuu mai lona matai, ma maua mai o loo ia faia faapea!+
44 E moni ou te fai atu iā te outou, o le a ia tofia o ia e vaavaaia ana mea uma.+
45 Ae afai e faapea ifo lenā pologa i lona loto, ‘Ua tuai mai+ loʻu matai,’ ma amata ona ia fasi i auauna tane ma auauna fafine, ua ʻai ma inu ma ua onā,+
46 o le a sau le matai o lenā pologa i le aso e na te leʻi faatalitalia ma le itula e na te leʻi iloa,+ ona ia matuā faasala lea iā te ia ma tofia o ia faatasi ma tagata lē faamaoni.+
47 O le pologa na iloa lelei le finagalo o lona matai ae leʻi nofosauni, pe e leʻi gaoioi foʻi e tusa ma lona finagalo, e matuā sasaina i ni tā+ se tele.
48 A o lē na te leʻi iloa+ ma faia mea e tatau ai le sasa, e itiiti+ ana tā. E moni, o lē na avatu i ai o mea e tele, e tāpā+ mai iā te ia mea e tele, a o lē na tuuina i ai e tagata le vaaiga o mea e tele, e latou te tāpā mai iā te ia+ o mea e sili atu ona tele.
49 “Ua ou sau e tutu le afi+ i le lalolagi, ma o le ā la se isi mea ou te toe manaʻo i ai pe afai ua uma ona tutu?
50 O le mea moni, e iai le papatisoga e tatau ona papatisoina ai aʻu, ma pagā loʻu mafatia seʻia oo ina faaiʻuina!+
51 Po ua outou manatu ea ua ou sau e avatu le filemu i le lalolagi? Ou te fai atu iā te outou, e leai, a o fevaevaeaʻiga.+
52 Auā e amata atu nei ona iai ni tagata se toʻalima e fevaevaeaʻi i se aiga, e tetee le toʻatolu i le toʻalua, ma e tetee foʻi le toʻalua i le toʻatolu.+
53 E fevaevaeaʻi i latou: o le tamā i lona atalii ma le atalii i lona tamā, o le tinā i lana tama teine ma le tama teine i lona tinā, o le tinā i le avā a lana tama tama e faapena foʻi le avā i le tinā o lana tane.”+
54 Ona ia toe fetalai atu foʻi lea i le motu o tagata: “Pe a outou vāai atu ua alu aʻe le ao i le itu i sisifo, ona outou faapea mai lea, ‘O le a agi mai se matagi malosi,’ ma e taunuu lava.+
55 Pe a outou iloa ua agi mai se matagi mai le itu i saute, ona outou faapea mai lea, ‘O le a oo mai le lāmala,’ ma e taunuu lava.
56 O outou tagata faafiaamiotonu, ua outou iloa ona mātau foliga o le lalolagi ma le lagi, ae aiseā ua outou lē iloa ai ona mātau lenei taimi patino?+
57 Aiseā ua outou lē faamasino ai iā te outou lava i le mea ua tonu?+
58 Auā pe a oulua ō i se alii pule ma sē ua molia oe i le tulafono, ia taumafai e faalelei la oulua finauga manū o i le ala oulua, ina neʻi tuuina atu e ia o oe i le faamasinoga, ona tuuina atu lea o oe e le faamasino i le leoleo, ma e na te lafoina oe i le falepuipui.+
59 Ou te fai atu iā te oe, E te lē magalo lava mai i le falepuipui seʻia e totogi atu tupe* uma lava.”+
Faamatalaga Pito i Lalo
^ Tagaʻi i le Faaopoopoga e 4.
^ O le “oreva” o se manulele.
^ I le gagana Eleni o “le kupita e tasi.”
^ O le upu Eleni e faasino atu i se ituaiga o lelefua e ʻaina lavalava.
^ I le gagana Eleni, e “fusi lona manava.”
^ Pe “seʻia e totogi atu tupe uma e oo lava i sene.” I le gagana Eleni, o le “kotane,” o se sene e matuā itiiti lava lona aogā. Tagaʻi i le Faaopoopoga e 14.
