Luka 15:1-32
15 Ua faalatalata mai pea iā te ia le ʻauaolafoga+ ma ē e agasala+ e faalogologo iā te ia.
2 Ona tomumumu lea o le ʻau Faresaio ma le ʻautusiupu, ma faapea ane: “Ua talia e lenei tagata o ē e agasala, ma aai faatasi ma i latou.”+
3 Ona ia fetalai atu lea o lenei talafaatusa iā i latou e faapea:
4 “Afai e iai se tasi o outou e iai ni mamoe se selau a ua leiloa le tasi, pe e lē tuua ea e ia le iva sefulu iva i le toafa, ae alu atu e saʻili mai le mamoe ua sē seʻia maua o ia?+
5 Pe a maua lea mamoe, ona ia faafuata lea i ona tauau ma le olioli.+
6 Pe a oo o ia i le fale, ona ia valaaulia lea o ana uō, ma ona tuaoi, ma faapea atu, ‘Inā tatou olioli ia faatasi ma aʻu, auā ua ou maua laʻu mamoe na leiloa.’+
7 O lea, ou te fai atu iā te outou, e sili atu ona olioli le lagi ona o le tagata agasala e toʻatasi ua salamō,+ nai lo o tagata amiotonu e toʻaiva sefulu iva e lē tatau i ai le salamō.+
8 “E faapea foʻi se fafine e iai ni tupe siliva* e sefulu, afai e leiloa se tupe e tasi, pe e lē tutu ea e ia le molī, ma salu lona fale, ma suʻe māeʻaeʻa seʻia maua e ia?
9 Pe a ia maua le tupe, ona ia faapotopoto mai lea o ana uō fafine, ma tuaoi, ma faapea atu, ‘Inā tatou olioli ia faatasi ma aʻu, auā ua ou maua le tupe na leiloa.’
10 O lea, ou te fai atu ai iā te outou, e olioli agelu a le Atua pe a salamō se tagata agasala e toʻatasi.”+
11 Ona ia fetalai atu lea: “Sa iai i se tagata ni atalii se toʻalua.+
12 Ona fai atu lea o le uii i lona tamā, ‘Loʻu tamā e, ia e aumai iā te aʻu loʻu tofi o le ʻoa.’+ Ona ia vaeluaina lea o ana mea+ iā i laʻua.
13 Mulimuli ane, ua mavae ni nai aso, ona faapotopoto ai lea e le uii o ana mea uma, ma alu malaga i se atunuu mamao, ma ua faamaʻimau ai ana mea e ala i le ola i se olaga soonafai.+
14 Ina ua uma ana mea uma, ona tupu ai lea o se oge tele i lenā atunuu, ma ua mativa ai o ia.
15 Ua oo lava ina alu atu o ia ma nofo i se tagata o lenā atunuu, ona auina atu ai lea o ia e le tagata i lona fanua e tausi lana lafu puaa.+
16 Ua manaʻo o ia e ʻai i mea e aai ai puaa, ma ua leai se tasi na toe avatua se mea iā te ia.+
17 “Ina ua toe atamai o ia, ona ia faapea ifo lea, ‘E toʻatele le ʻaufaigaluega a loʻu tamā o loo aai i falaoa e tele, a o lenei o le a ou oti i loʻu fia ʻai!
18 O le a ou tulaʻi ma ou toe foʻi+ atu i loʻu tamā ma faapea atu: “Loʻu tamā e, ua ou agasala i le Atua* atoa ma oe.+
19 E lē toe aogā ona taʻua aʻu o sou atalii. Ia avea aʻu ma se tasi o au tagata faigaluega.”’
20 Ona tulaʻi lea o ia ma alu atu i lona tamā. Ua iloa mamao atu o ia e lona tamā, ona mutimutivale ai lea o lona alofa iā te ia. Ua ia tamoʻe atu ma fusi i lona ua, ma sogi lemū atu iā te ia.
21 A ua faapea mai le atalii i lona tamā, ‘Loʻu tamā e, ua ou agasala i le Atua atoa ma oe.+ E lē toe aogā ona taʻua aʻu o sou atalii. Ia avea aʻu ma se tasi o au tagata faigaluega.’+
22 A ua fai atu le tamā i ana pologa, ‘Ia faavave! Aumai se ofu talaloa e sili ona lelei ma faaofu+ iā te ia, ma tuu se mama+ i lona lima, ma fai ni ona seevae.
23 Ia aumai se tamaʻi povi peti+ ma fasi, seʻi o tatou aai ma olioli ai.
24 Auā o loʻu atalii lenei na oti, a ua toe ola+ mai; na leiloa o ia a ua toe maua.’ Ona latou olioli ai lea.
25 “O le taimi lea o loo i le fanua lona atalii matua;+ ua sau o ia ma ua latalata mai i le fale, ua ia faalogoina musika ma faiga siva.
26 Ona ia valaau atu lea i se tasi o auauna ma fesili atu po o ā la mea e fai.
27 Ua fai mai le auauna iā te ia, ‘Ua sau lou uso,+ ma ua fasi ai e lou tamā+ se tamaʻi povi peti, auā ua toe foʻi manuia mai o ia.’
28 A ua ita o ia ma ua lē fia alu i le fale. Ona sau ai lea o lona tamā i fafo ma faaoleole iā te ia.+
29 Ua tali ane o ia i lona tamā, ‘Seʻi vaai, ua tele tausaga o oʻu nofo pologa iā te oe ma ou te leʻi solia lava sau poloaʻiga. Ae e te leʻi aumaia lava se tamaʻi ʻoti ma aʻu matou te olioli ai ma aʻu uō.+
30 Peitaʻi, o lea ua taunuu mai lou atalii+ sa ia faamaʻimau au ʻoa faatasi ma fafine talitane,+ a ua e fasi le tamaʻi povi peti mo ia.’+
31 Ona faapea atu lea o lona tamā iā te ia, ‘Si oʻu atalii e, o loo e faatasi pea ma aʻu, ma o aʻu mea uma lava, o au mea foʻi ia.+
32 A ua tatau ona tatou fiafia ma olioli auā o lou uso lenei na oti, a ua toe ola mai, na leiloa foʻi, a ua toe maua.”’+
Faamatalaga Pito i Lalo
^ I le gagana Eleni, o “tarakama.” O le tupe tarakama, e tusa lea o le tolu vaefā o le totogi e maua i le aso. Tagaʻi i le Faaopoopoga e 14.
^ I le gagana Eleni, “ua ou agasala i le lagi.”
