Luka 18:1-43
18 Ua ia faamatala atu iā i latou se talafaatusa i le manaʻomia ona latou tatalo e lē aunoa, ma ia aua le faavaivai,+
2 ua faapea atu: “I se tasi aai, sa iai se faamasino e lē mataʻu i le Atua, ma e lē faaaloalo foʻi i tagata.
3 Ae e iai se fafine ua oti lana tane i lenā aai, ua alu atu pea+ iā te ia ma faapea atu, ‘Ia e faia le faamasinogatonu mo aʻu ona o lē ua agaleaga mai iā te aʻu.’
4 O lea, e ui ina musu le faamasino, ae mulimuli ane ua ia faapea ifo, ‘E ui ina ou lē mataʻu i le Atua pe faaaloalo i se tagata,
5 ae ona o le faalavelave mai pea o lenei fafine ua oti lana tane,+ o le a ou faia ai le faamasinogatonu mo ia, ina neʻi sau soo o ia ma faatigā+ mai iā te aʻu, ma iʻu ai ina ou fiu.’”
6 Ona fetalai atu lea o le Alii: “Po ua outou faalogo ea i le mea ua fai mai ai le faamasino e ui ina amiolētonu?
7 O le mea moni, pe e lē faia ea e le Atua le faamasinogatonu+ mo ē ua ia filifilia, o loo alalaga atu iā te ia i le ao ma le pō, e ui lava o loo faapalepale+ mai pea o ia iā i latou?
8 Ou te fai atu iā te outou, E vave+ ona ia faia le faamasinogatonu mo i latou. Ae pe a sau le Atalii o le tagata, pe na te maua ea le faatuatua moni i le lalolagi?”
9 A ua ia fetalai atu foʻi i lenei talafaatusa i nisi o ē ua faatuatua iā i latou lava, o ni tagata faafiaamiotonu,+ o ē ua vaai maulalo i isi:+
10 “E toʻalua ni tamāloloa ua ō atu i le malumalu e tatalo ai, o le tasi o le Faresaio, a o le isi o le aolafoga.
11 Ua tū+ le Faresaio ma tatalo+ e faapea, ‘Le Atua e, ou te faafetai atu iā te oe ona ua ou lē pei o isi tagata, o ē e faia mea faapiʻopiʻo, o ē e amiolētonu, o ē e mulilulua, ua ou lē pei foʻi o lenei aolafoga.+
12 E faalua ona ou anapogi i le vaiaso, ou te avatu le sefuluaʻi o mea uma ou te maua.’+
13 A ua tū mamao mai le aolafoga, ma e leʻi mafai ona tepa aʻe ona mata i le lagi, a ua tuʻituʻi pea lona fatafata+ ma faapea atu, ‘Le Atua e, ia e alofa mai iā te aʻu le tagata agasala.’+
14 Ou te fai atu iā te outou, Na alu lenei tagata i lona aiga, ua sili ona amiotonu+ o ia nai lo o lea tagata; auā o sē e faaeaina e ia o ia lava, e faamaulaloina lea, a o sē e faamaulaloina e ia o ia lava, e faaeaina lea.”+
15 Ona aumaia lea e tagata o tamaiti iā te ia, ina ia paʻi ane o ia iā i latou; ae ina ua vāai atu i ai le ʻausoo, ona latou vavao lea o i latou.+
16 Ae peitaʻi, ua valaau atu Iesu i tamaiti e ō mai iā te ia ma faapea atu: “Tuu ai pea tamaiti e ō mai iā te aʻu, ae aua le taofia i latou. Auā ua fai le malo o le Atua ma tofi o ē e pei o nei tamaiti.+
17 E moni ou te fai atu iā te outou, O sē na te lē taliaina le malo o le Atua e pei o se tamaitiiti, e lē ulu atu lava i ai o ia.”+
18 Ua fesili mai se tasi alii pule iā te ia: “Le Aʻoaʻo lelei e, o ā ni mea e tatau ona ou faia ina ia ou maua ai le ola e faavavau?”+
19 Ua fetalai atu Iesu iā te ia: “Aiseā ua e taʻua ai aʻu e lelei? E leai se tasi e lelei ua na o le toʻatasi, o le Atua lea.+
20 A ua e iloa poloaʻiga,+ ‘Aua le mulilua,+ Aua le fasioti tagata,+ Aua le gaoi,+ Aua le molimau pepelo,+ Ia e āva i lou tamā ma lou tinā.”’+
21 Ua fai mai le tamāloa iā te ia: “Ua ou tausia na mea uma talu mai loʻu talavou.”+
22 Ua uma ona ia faalogo i na mea, ona fetalai atu lea o Iesu iā te ia: “E tasi lava le mea lenā e te lē o faia: Ia e alu e faatau atu au meafaitino uma lava ma tufatufa atu i ē e matitiva, ona e maua ai lea o ʻoa i le lagi, ona e sau ai lea ma mulimuli mai iā te aʻu.”+
23 Ua faalogo o ia i lenei mea, ona matuā tigā ai lea o lona loto, auā e mauʻoa tele o ia.+
24 Ua silasila atu Iesu iā te ia ma fetalai atu: “E matuā faigatā lava mo ē e tele tupe ona ulu atu i le malo o le Atua!+
25 E moni, e sili atu ona faigofie ona sao se kamela i le pū o le nila, nai lo o le sao atu o se tagata mauʻoa i le malo o le Atua.”+
26 Ua faapea mai i latou ua faalogo i ai: “O ai moni la e mafai ona faaolaina?”
27 Ua ia fetalai atu: “O mea e lē mafaia e tagata, e mafaia ia e le Atua.”+
28 A ua fai mai Peteru: “Faauta, ua matou tuua a matou mea uma ae e mulimuli atu iā te oe.”+
29 Ua fetalai atu o ia: “E moni ou te fai atu iā te outou, O sē e tuua le fale, le avā, po o uso, po o mātua, po o le fanau, ona o le malo o le Atua,+
30 e maua e ia le tele o mea i le taimi nei, ma le ola e faavavau+ i le lumanaʻi.”
31 Ona ia ave lea o le toʻasefulu lua ma fetalai atu iā i latou: “Faauta! O le a tatou ō aʻe i Ierusalema, ma e faataunuuina ai mea uma ua tusia e perofeta,+ e faatatau i le Atalii o le tagata.+
32 Auā e tuuina atu o ia i tagata o nuu ese, ma latou te tauemu+ ma faileagaina o ia,+ ma tuufeanu+ iā te ia;
33 ma pe a uma ona sasa tigāina,+ ona latou fasiotia+ lea o ia, ae e toe faatūina o ia i le aso lona tolu.”+
34 Ae peitaʻi, latou te leʻi malamalama i le uiga o nei mea; ae ua natia nei upu mai iā i latou, ma e latou te leʻi malamalama foʻi i mea ua ia fetalai i ai.+
35 Ua latalata o ia i Ieriko, ua iai se tagata ʻaisi+ e tauaso o loo nofo i tafatafa o le auala.
36 Talu ai ua ia faalogo o loo savavali ane le motu o tagata, ona ia fesili ai lea po o le ā le uiga o lenei mea.
37 Ua latou taʻu atu iā te ia: “O Iesu le Nasareta lea e maliu ane!”+
38 Ona alaga mai lea o ia: “Iesu e, le Alo o Tavita, ia e alofa* mai iā te aʻu!”+
39 A o i latou ua muamua atu, ua latou matuā vavao atu iā te ia ma fai atu e soia le pisa, a ua atili ai ona ia alaga mai: “Le Alo e, o Tavita, ia e alofa* mai iā te aʻu.”+
40 Ona tū lea o Iesu ma fai atu ina ia taʻitaʻi mai iā te ia+ le tamāloa. Ina ua latalata mai, ona fesili atu lea o Iesu iā te ia:
41 “O le ā se mea e te manaʻo ou te faia mo oe?”+ Ua fai mai le tagata tauaso: “Le Alii e, ia e faapupula i oʻu mata.”+
42 Ona fetalai atu lea o Iesu iā te ia: “Ia pupula ou mata, ua e malosi ona o lou faatuatua.”+
43 Ona pupula loa lea o ona mata,+ ma ua mulimuli atu iā te ia ma ua ia faamamaluina le Atua.+ O i latou uma foʻi ua vāai i lenei mea, ua vivii atu i le Atua.
