Luka 19:1-48
19 Ua ui atu o ia i Ieriko.+
2 E iai i inā se tagata e igoa iā Sakaio; o ia o le aolafoga sili, ma e mauʻoa.
3 Ioe, ua matuā naunau o ia e fia vaai+ iā Iesu, ae e leʻi mafai ona o le motu o tagata, auā e puupuu o ia.
4 Ua tamoʻe muamua atu o ia ma aʻe i le laau o le sukamoru, ina ia iloa atu ai o ia, auā ua toeitiiti ona maliu ane lea o ia i inā.
5 O lea, ina ua oo atu Iesu i inā, ona tepa aʻe lea o ia ma fetalai atu: “Sakaio e, sau vave i lalo, auā e tatau ona ou nofo i lou fale i le asō.”
6 Ua faavave ona alu ifo o ia i lalo, ma ua talia e ia ma le olioli Iesu e avea ma ana mālō.
7 Ae ina ua latou vāai i lenei mea, ona latou tomumumu+ lea ma faapea mai: “Ua alu o ia e nonofo ma le tagata agasala.”
8 A ua tulaʻi Sakaio ma faapea mai i le Alii: “Le Alii e, Faauta! Ua ou avatu le ʻafa o aʻu mea uma i tagata matitiva, ma o mea foʻi na ou aveesea mai i se tasi i se tuuaʻiga pepelo,+ ou te toe taui atu e taʻifā.”+
9 O lea, ua fetalai atu ai Iesu iā te ia: “O le aso nei, ua oo mai ai le faaolataga i lenei aiga, auā o ia foʻi o le atalii o Aperaamo.+
10 Auā ua sau le Atalii o le tagata e saʻili ma faaolaina i latou ua leiloloa.”+
11 A o faalogologo ona soo i nei mea, ona ia fetalai atu lea i se isi talafaatusa, auā ua latalata o ia i Ierusalema, ma ua manatu i latou e faaalia mai loa le malo o le Atua.+
12 Ona ia fetalai atu lea: “E iai se tasi alii mamalu ua alu malaga i se nuu mamao, ina ia fai o ia ma tupu, ona toe foʻi mai ai lea.+
13 Ua valaau atu o ia i ana pologa e toʻasefulu, ma avatu i ai mina* e sefulu ma fai atu iā i latou, ‘Ia ō e fai ai ni a outou pisinisi seʻia ou sau.’+
14 A ua ʻinoʻino+ i ai ona tagatānuu ma aauina atu ni sāvali e mulimuli atu iā te ia ma faapea atu, ‘Matou te lē mananaʻo e fai lenei tagata ma o matou tupu.’+
15 “Mulimuli ane, ua toe foʻi mai o ia ina ua maua le tofi o le tupu, ona ia poloaʻi atu lea i ana pologa na ia tuuina atu i ai tupe siliva e ō mai, ina ia iloa ai po o ā ni mea ua latou maua mai i a latou pisinisi.+
16 Ona sau ai lea o lē na muamua, ua faapea mai, ‘Le Alii e, ua maua isi mina e sefulu mai i au mina.’+
17 Ona ia faapea atu lea iā te ia, ‘Malo lava, le pologa lelei e! Auā ua e faamaoni i sina mea itiiti, o lea ia e pule ai i aai e sefulu.’+
18 Ona sau lea o le lona lua, ua faapea mai, ‘Le Alii e, ua maua isi mina e lima mai i au mina.’+
19 Ua ia faapea atu foʻi iā te ia, ‘Ia e pule foʻi i aai e lima.’+
20 Ona sau ai lea o le isi, ua faapea mai, ‘Le Alii e, o lau mina lea, na ou tago ma afīfī i le ʻie.
21 Auā ua ou fefe iā te oe ona o oe o se tagata faigatā; ua e ave aʻe le mea e te leʻi teuina, ma ua e selesele foʻi i le mea e te leʻi lūlūina.’+
22 Ona ia faapea atu lea iā te ia, ‘Le pologa leaga e, ou te faamasino iā te oe ona o au lava upu.+ Ua e iloa lava o aʻu o le tagata faigatā, ua ou ave aʻe mea ou te leʻi teuina, ma ua ou selesele le mea ou te leʻi lūlūina,+ a ea?
23 Aiseā la na e lē tuu ai laʻu tupe siliva i le fale tupe? Pe a ou sau, ona ou maua ai lea o laʻu tupe atoa ma lona pasene.’+
24 “Ua ia faapea atu iā i latou o loo tutū ai, ‘Ia fao le mina mai iā te ia ma avatu i lē ua iai mina e sefulu.’+
25 A ua latou fai mai iā te ia, ‘Le Alii e, o loo iā te ia mina e sefulu!’
26 ‘Ou te fai atu iā te outou, O sē ua iai mea, e avatua iā te ia mea e tele; a o lē ua leai ni mea, e oo lava i mea ua iā te ia, e aveesea ia.+
27 O i latou foʻi o ē e ita mai iā te aʻu, e lē mananaʻo e fai aʻu ma o latou tupu, ia outou aumai i inei ma fasioti i latou uma i oʻu luma.”’+
28 Ua uma ona ia fetalai atu i nei upu, ona maliu atu lea o ia ma agaʻi atu i Ierusalema.+
29 A o latalata atu Iesu i Petefake ma Petania i le mauga e taʻua o le Mauga o Olive,+ ona ia aauina atu lea o ona soo e toʻalua,+
30 ma faapea atu: “Ia oulua ō atu i le nuu o loo oulua vāai atu i ai, pe a taunuu i ai, lua te maua ai se tamaʻi asini o loo nonoa e leʻi tiʻetiʻe ai se tagata. Ia tatala ma aumai.+
31 Afai e fai ane se tasi iā te oulua, ‘Aiseā ua lua tatala ai le asini?’ ia oulua fai atu i ai, ‘E manaʻo i ai le Alii.’”+
32 Ona la ō lea ma maua ai e pei ona ia fetalai atu iā i laʻua.+
33 A o la tatalaina le asini, ua fesili ane ē e ona le asini iā i laʻua: “Aiseā ua oulua tatala ai le tamaʻi asini?”+
34 A ua la fai atu: “E manaʻo i ai le Alii.”+
35 Ona la aumai ai lea o le tamaʻi asini iā Iesu, ua fofola o latou ofu tele i luga o le asini ma faatiʻetiʻe ai Iesu.+
36 A o maliu atu o ia,+ ua latou fofola o latou ofu tele i le ala.+
37 Ina ua latalata atu o ia i le auala e alu ifo mai i le Mauga o Olive, ona olioli ai lea ma vivii leotetele i le Atua le ʻausoo uma e toʻatele, ona o galuega mamana uma na latou vāai i ai+
38 ma faapea ane: “E manuia Lē ua maliu mai o se Tupu i le suafa o Ieova!+ Ia iai le filemu i le lagi, ma le mamalu i lē o i mea e sili ona maualuluga!”+
39 Ae peitaʻi, ua fai mai iā te ia nisi o le ʻau Faresaio mai i le motu o tagata: “Le Aʻoaʻo e, ia aʻoaʻi atu i ou soo.”+
40 A ua tali atu o ia: “Ou te fai atu iā te outou, afai e lē alalaga mai nei tagata, e alalaga mai lava maa.”+
41 Ae ina ua latalata atu o ia, ua ia silasila atu i le aai, ona tagi ai lea,+
42 ma faapea atu: “Maʻimau pe ana e iloa+ i lenei aso mea e maua ai le filemu, a o lenei ua natia i lau vaai.+
43 Auā e oo mai iā te oe ona aso e fau ai e ou fili se pā+ e maamaʻai ona tumutumu,+ e siʻo+ ai iā te oe, ma faapuapuaga+ iā te oe mai i itu uma,
44 ma latou te olopalaina oe ma lau fanau i le eleele,+ latou te lē tuua se maa i luga o se isi maa,+ auā e te lē mātauina le taimi e asiasia ai oe.”+
45 Ua ulufale atu o ia i le malumalu ma tutuli i fafo o ē uma ua faia fefaatauaʻiga,+
46 ua ia faapea atu iā i latou: “Ua tusia, ‘E avea loʻu fale ma fale tatalo,’+ a ua faia e outou ma ana o ē e faomea.”+
47 Ua aʻoaʻo atu foʻi o ia i le malumalu i aso fai soo. A ua taumafai le ʻaufaitaulaga sili, ma le ʻautusiupu, ma alii o le nuu e fasioti iā te ia;+
48 ae peitaʻi, e latou te leʻi maua se mea e fai iā te ia, auā ua matuā naunau tagata uma e fia faalogologo iā te ia.+
Faamatalaga Pito i Lalo
^ Tagaʻi i le Faaopoopoga e 14.
