Luka 21:1-38
21 Ua tepa aʻe o ia ma silafia ai tagata mauʻoa o loo lafo a latou meaalofa i mea e teu ai tupe.+
2 Ua silafia foʻi e ia le tasi fafine mativa ua oti lana tane, ua lafo i ai ni tupe iti* se lua.+
3 Ona fetalai atu lea o ia: “E moni ou te fai atu iā te outou, E sili atu mea ua lafo e lenei fafine e ui ina mativa ma ua oti lana tane, nai lo o i latou uma.+
4 Auā o i latou uma, ua lafo atu nisi mea mai i a latou tupe e tele, a o lenei fafine mativa, ua lafo tupe uma ua iā te ia e ola ai.”+
5 Mulimuli ane, a o talatalanoa nisi e faatatau i le malumalu ma le matagofie o lona teuteuina i maa lelei, ma meaalofa e avatu i le Atua,+
6 ona ia faapea atu lea: “O nei mea ua outou vāai atu i ai, e oo mai aso e lē toe tiʻetiʻe ai le tasi maa i luga o le isi maa, ae e soloia i lalo.”+
7 Ona latou fesili mai lea iā te ia: “Le Aʻoaʻo e, o afea e oo ai ia mea, ma o le ā foʻi le faailoga e iloa ai o le a taunuu nei mea uma?”+
8 Ua ia fetalai atu: “Ia faaeteete ina neʻi faasesēina outou;+ auā e toʻatele o ē e ō mai i loʻu igoa ma faapea ane, ‘O aʻu o ia,’ ma ‘Ua latalata mai le taimi atofaina.’+ Aua tou te mulimuli atu iā i latou.
9 Aua foʻi neʻi outou atuatuvale+ pe a outou faalogo i taua ma fouvalega. Auā e ao ona taunuu muamua o nei mea, ae e lē oo mai loa le iʻuga.”
10 Ua ia fetalai atili atu iā i latou: “O le a siitaua atu le tasi atunuu i le isi atunuu,+ ma le tasi malo i le isi malo;+
11 o le a iai foʻi mafuiʻe tetele, o faamaʻi ma oge+ i lea mea ma lea mea; o le a iai foʻi vaaiga e matataʻu ai, ma faailoga tetele i le lagi.+
12 “A o leʻi tutupu nei mea uma, o le a puʻea ma sauāina+ outou e tagata, e tuuina atu outou i sunako ma falepuipui, e molia foʻi outou i luma o tupu ma kovana ona o loʻu igoa.+
13 E fai lea ma avanoa tou te molimau atu ai.+
14 O lea, aua neʻi outou muaʻi manatunatu i se upu e tou te tali atu ai,+
15 auā ou te tuuina atu upu ma le atamai i o outou gutu, e lē mafai ai e ē e faasagatau ona tetee pe e finau mai.+
16 O le a tuuina atu foʻi outou e o outou lava mātua,+ ma uso, ma aiga, ma uō, e latou te fasiotia foʻi nisi o outou;+
17 e inosia foʻi outou e tagata uma ona o loʻu igoa.+
18 E lē paʻū foʻi se lauulu+ o o outou ulu.
19 O lo outou tumau, e maua ai lo outou ola.+
20 “Pe a outou iloa foʻi ua siʻosiʻomia+ Ierusalema e ʻautau, ona outou iloa ai lea ua lata lona faatafunaina.+
21 O lea, o ē o i Iutaia ia sosola i mauga, o i latou o i totonu o le aai, ia ō ese, ma aua neʻi toe foʻi atu i le aai i latou o i tua.+
22 Auā o ia aso e faaoo atu ai le faamasinoga,* ina ia taunuu ai mea uma ua tusia.+
23 Oi talofa i fafine totō ma ē failelele i na aso!+ Auā e tele mafatiaga e oo i le laueleele ma le toʻasā i nei tagata;
24 e paʻuʻū i latou i le pelu, ma taʻitaʻiina faapagota i nuu uma;+ e solia foʻi Ierusalema e nuu ese seʻia faataunuuina taimi atofaina+ o nuu ese.
25 “E iai foʻi faailoga i le lā,+ le masina, ma fetu, e atuatuvale foʻi atunuu o le lalolagi ma fememeaʻi i latou ona o le ū o le sami+ ma le sousou.+
26 E matapogia foʻi tagata ona o le fefefe+ ma faatalitali i mea e oo mai i le lalolagi uma,+ auā e lūlūina mea malolosi i le lagi.+
27 Ona latou vaaia lea o le Atalii o le tagata+ o loo sau i le ao ma le mana ma le mamalu tele.+
28 Pe a amata ona tutupu o nei mea uma, ia tutū i luga ma ia ea i luga o outou ulu, auā ua latalata ona laveaʻiina outou.”
29 Ona ia fetalai atu lea iā i latou i se talafaatusa: “Ia mātau le laau o le mati ma isi laau uma:+
30 Pe a fuga mai, ua outou vāai, ona outou iloa ai lea ua latalata le tau māfanafana.+
31 E faapea foʻi outou, pe a outou vāai ua tutupu nei mea, ia outou iloa ua latalata mai le malo o le Atua.+
32 E moni ou te fai atu iā te outou, E lē mavae atu lenei tupulaga seʻia taunuu mea uma.+
33 E mavae+ atu le lagi ma le lalolagi, ae e lē mavae lava aʻu upu.+
34 “Ia outou uaʻi atu iā te outou lava, ina neʻi faamamafaina o outou loto i le ʻai tele, ma le inu tele,+ ma le popole+ i mea o le olaga nei, neʻi oo faafuaseʻi mai lenā aso iā te outou+
35 e pei o se mailei.+ Auā e oo mai iā i latou uma o ē o nonofo i le lalolagi atoa.+
36 O lea la, ia mataala pea,+ ma ia faatoga+ atu i taimi uma, ina ia outou sao mai i nei mea uma o le a oo mai, ma ia tutū i luma o le Atalii o le tagata.”+
37 I le ao, e aʻoaʻo atu ai o ia i le malumalu,+ ae i le pō e maliu atu ai o ia ma nofo i le mauga ua taʻua o le Mauga o Olive.+
38 I le taeaopō foʻi, e ō mai ai tagata uma+ i le malumalu e faalogologo iā te ia.
Faamatalaga Pito i Lalo
^ Po o le “kotane e tasi.” O le kotane o se tupe e matuā itiiti lava lona aogā. Tagaʻi i le Faaopoopoga e 14.
^ I le gagana Eleni, “o le aso o le tauimasui.”
