Luka 23:1-56
23 Ua tutū i luga le motu o tagata e toʻatele, ma avatu o ia iā Pilato.+
2 Ua latou tuuaʻia foʻi o ia+ e faapea: “Ua faatupu e lenei tagata le fouvale+ i lo tatou nuu, ma vavao le totogiina atu o lafoga+ iā Kaisara, ua ia faapea mai foʻi o ia o Keriso, o le tupu.”+
3 Ona fesili mai lea o Pilato iā te ia: “Po o oe ea o le tupu o tagata Iutaia?” A ua tali atu o ia: “O lenā tonu lava ua e fai mai ai.”+
4 Ona fai atu lea o Pilato i le ʻaufaitaulaga sili ma le motu o tagata: “Ou te lē iloa se mea sesē na faia e lenei tagata.”+
5 Ae ua finau mai i latou e faapea: “Ua ia faavevesi tagata i ana aʻoaʻoga i Iutaia atoa, e amata mai i Kalilaia seʻia oo mai i inei.”
6 Ua faalogo i ai Pilato, ona fesili ane lea po o ia o se tagata Kalilaia.
7 Ina ua iloa o ia e mai i le itumalo o Herota,+ ona ia auina atu lea o ia iā Herota, o lē o loo iai i Ierusalema i na aso.
8 Ua vaai Herota iā Iesu, ona matuā olioli ai lea, auā ua leva ona ia fia vaai+ iā te ia ona o tala na ia faalogo+ i ai e uiga iā te ia, ma ua fia vaai foʻi Herota i se faailoga e faia e Iesu.
9 Ua ia fesiligia o ia i le tele o fesili, a ua lē tali+ atu lava o ia.
10 Ae peitaʻi, ua tutū atu pea le ʻaufaitaulaga sili, ma le ʻautusiupu, ma matuā tuuaʻia o ia.+
11 Ona faalumaina ai lea o ia+ e Herota ma ana fitafita, ma ula+ iā te ia i le faaofuina o ia i se ofu sesega ma toe auina atu o ia iā Pilato.
12 I lea lava aso, ua toe lelei ai le va o Herota ma Pilato;+ auā sa feitagaʻi muamua i laʻua.
13 Ona faapotopoto faatasi lea e Pilato o le ʻaufaitaulaga sili, o ē e taʻitaʻi, ma tagata,
14 ma faapea atu: “Ua outou aumaia lenei tagata iā te aʻu ma faapea mai ua faatupu e ia le fouvale i le nuu. Faauta! ua uma ona ou suʻesuʻeina o ia i o outou luma, ae e leai se mea+ ua ou maua i lenei tagata e tusa ai ma mea ua outou molia ai o ia.
15 O le mea moni, e leʻi iloa foʻi e Herota auā ua ia toe auina mai o ia iā i tatou; faauta! e leai se mea ua faia e ia ua tatau ai ona oti.+
16 O le mea lea, ou te faasalaina+ ai o ia ma faasaʻoloto o ia.”
17 * ——
18 A ua alalaga mai tagata uma lava: “Ia aveese+ atu lenei tagata, ae faasaʻoloto mai Parapa iā i matou!”+
19 (O ia lea na falepuipui ona o le fouvale i le aai ma le fasioti tagata.)
20 Ona toe valaau atu foʻi lea o Pilato iā i latou, auā ua manaʻo o ia ina ia faasaʻoloto Iesu.+
21 A ua latou feʻei mai e faapea: “Ia tutuʻi o ia i luga o le laau! Ia tutuʻi o ia!”+
22 Ua fai atu faatolu o ia iā i latou: “Aiseā, o le ā se mea leaga ua faia e lenei tagata? Ou te lē iloa se mea ua faia e ia ua tatau ai ona oti; o lea, ou te faasala o ia ma faasaʻoloto iā te ia.”+
23 Ona latou matuā faatauanau atu lea ma le leotetele ina ia tuʻituʻia o ia; ma ua mālō o latou leo.+
24 Ona fai atu lea o Pilato e fai le mea ua latou mananaʻo ai:+
25 ua ia faasaʻoloto+ le tagata na falepuipui ona o le fouvale ma le fasioti tagata, o lē na latou mananaʻo i ai, ma ua ia tuuina atu Iesu e tusa ma lo latou manaʻo.+
26 A o latou taʻitaʻi ese atu o ia, ona latou taofia lea o le tagata Kurene e igoa iā Simona, ua sau mai i nuu i tua, ma latou tuu atu i lona ua le laau e faapuapuagatia ai Iesu,+ ma mulimuli atu iā te ia.
27 Ua mulimuli atu foʻi iā te ia le motu o tagata e toʻatele, ma fafine o loo taufaitagituʻi ma tagiauē ona o ia.
28 Ua faliu Iesu i fafine ma fetalai atu: “Tama fafine a Ierusalema e, aua tou te toe fetagisi iā te aʻu. A ia outou fetagisi iā te outou ma a outou fanau;+
29 auā faauta! e oo mai aso e faapea ane ai tagata, ‘Amuia fafine pā, ma manava e leʻi fananau, ma susu e leʻi susuina!’+
30 Ona latou alalaga atu lea i mauga, ‘Mafuli mai ia iā i matou!’ ma aʻega, ‘Ia tanumia i matou!’+
31 Auā pe afai latou te faia nei mea i le laau mata, o le ā le mea e tupu pe a mago le laau?”+
32 A ua taʻitaʻiina atu foʻi isi tamāloloa solitulafono e toʻalua, ina ia fasiotia faatasi ma ia.+
33 Ua latou taunuu i le nofoaga ua taʻua o le Ulupoo,+ ma o i inā ua latou tutuʻi ai o ia faatasi ma ē e solitulafono, o le tasi i lona itu taumatau, ma le isi i lona itu tauagavale.+
34 [[A ua fetalai atu Iesu: “Loʻu Tamā e, ia e faamagalo+ iā i latou, auā ua latou lē iloa le mea ua latou faia.”]] Ua latou tufatufa foʻi ona ofu e fai ai le vili.+
35 Ua tutū tagata ma vaavaai mai.+ A ua tauemu o ē e taʻitaʻi ma faapea mai: “Sa ia faaolaina isi; ia faaola+ e ia iā te ia pe afai o ia o le Keriso a le Atua, o Lē ua Filifilia.”+
36 Ua ula+ foʻi fitafita iā te ia, ma ua faalatalata ane e avatu le uaina oona+
37 ma faapea ane: “Afai o oe o le tupu o tagata Iutaia, ia e faaola iā te oe.”
38 Ua tusia foʻi i ona luga aʻe upu ia, “O le tupu lenei o tagata Iutaia.”+
39 Peitaʻi, o le tasi o tagata solitulafono ua faatautau faatasi ma ia, ua ia fai mai upu lē mafaufau+ iā te ia e faapea: “Pe e lē o oe ea o le Keriso? Ia e faaola iā te oe ma i maʻua.”
40 A ua tali mai le tasi ma vavao iā te ia, ua faapea mai: “Pe e te lē mataʻu ea i le Atua, ina ua faasala faatasi i tatou?+
41 Auā o i taʻua, ua tonu lava la ta sala, ua tauia foʻi i taʻua e tusa ma mea ua ta faia; a o lenei tagata, e leai se mea e sala ai o ia.”+
42 Ona faapea mai lea o ia: “Iesu e, ia e manatua mai aʻu pe a e oo i lou malo.”+
43 A ua fetalai atu Iesu iā te ia: “E moni ou te fai atu iā te oe i le asō,* O le a ta faatasi+ ma oe i le Parataiso.”+
44 O lea, pe tusa o le itula e ono,* ua pogisa le lalolagi atoa seʻia oo i le itula e iva,*+
45 auā ua faapouliuligia foʻi le lā; ona saeluaina ai lea mai i luga e oo i lalo+ o le ʻie puipui+ o le malumalu.
46 Ua alaga Iesu ma faapea atu: “Loʻu Tamā e, ou te tuuina atu loʻu agaga i ou aao.”+ Ua ia fetalai i nei upu, ona maliu ai lea o ia.+
47 Ua vaai atu le taʻitaʻiʻau i le mea ua tupu, ona ia faamamaluina lea o le Atua ma faapea ane: “E moni, o le tagata amiotonu lenei.”+
48 O le motu o tagata o ē na ō atu e vāai i lenei mea mataʻutia, ua latou iloa mea sa tutupu, ona toe foʻi lea ma pōpō i o latou fatafata.
49 Ua tutū mamao uma mai i latou o ē sa masani iā te ia.+ E faapena foʻi ma fafine na mulimuli iā te ia mai i Kalilaia, ua latou tutū ma vaavaai atu i nei mea uma.+
50 Faauta! o le tagata e igoa iā Iosefa, o se sui o le Fono, o se tagata lelei ma amiotonu+
51 (e leʻi lagolagoina e ia la latou faufauga ma gaoioiga)+ e sau o ia mai i Arimataia o se aai o tagata Iutaia, ma o loo faatalitali atu o ia i le malo o le Atua.+
52 Ua alu atu lenei tagata iā Pilato ma talosaga atu mo le tino o Iesu.+
53 Ona ia tuu ifo lea o le tino i lalo,+ ma afīfī i le ʻie lino lelei, ma tuu o ia i le tuugamau+ ua vane i le papa e leʻi tuuina ai muamua se tagata.+
54 O le aso lea o le Sauniuniga,+ i le afiafi ua latalata i le sapati.+
55 Ua mulimuli atu foʻi fafine na ō mai faatasi ma ia mai i Kalilaia, ua vaavaai i le tuugamau+ ma le teuina o lona tino;+
56 ona latou toe foʻi lea ma sauniuni mea manogi ma suāuu manogi.+ Peitaʻi ua latou mālōlō i le sapati+ e tusa ai ma le tulafono.
Faamatalaga Pito i Lalo
^ O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.
^ “Asō.” E leʻi faaaogāina ni koma i le uluaʻi gagana Eleni. Ua tuu e lenei faaliliuga le koma pe a uma le upu “asō” e tusa ai ma faamatalaga a isi mau o le Tusi Paia e pei o le Ioa 20:17; Ga 1:1-3, 9; 10:40; 1Ko 15:20; Ko 1:18.
^ “Itula e ono” pe tusa o le tā o le 12 i le aoauli.
^ Pe e tusa o le tā o le 3 e amata mai i le oso aʻe o le lā.
