Luka 6:1-49
6 Ua agaʻi atu o ia i le togāsaito i le sapati, ma ua tau+ mai ai e ona soo o fuifui saito, ua mili i o latou lima ma aai ai.+
2 Ona fai mai lea o nisi o le ʻau Faresaio: “Aiseā ua outou faia ai le mea e sā+ i le sapati?”+
3 A ua tali atu Iesu iā i latou: “Tou te leʻi faitau ea i le mea na faia e Tavita+ ma tagata na iā te ia ina ua fia aai?+
4 Pe na lē ulu atu ea o ia i le fale o le Atua, ma maua falaoa e laulauina+ i luma o le Atua, ua ʻai ai o ia ma avatu i tamāloloa na faatasi ma ia, o le mea e faasā e le tulafono ona ʻai ai se tasi, a ua na o ositaulaga?”+
5 Ona fetalai atu lea o ia iā i latou: “O le Alii o le sapati, o le Atalii lea o le tagata.”+
6 I le isi sapati,+ ua ulufale atu o ia i le sunako ma aʻoaʻo atu ai. Ua iai i inā le tagata ua pē lona lima taumatau.+
7 O lea, ua tulimataʻi+ ai o ia e le ʻautusiupu ma le ʻau Faresaio, pe na te faia se faamālōlōga i le sapati, ina ia latou molia ai o ia.+
8 Ae ua ia silafia o latou manatunatuga,+ ona fetalai atu lea o ia i le tagata ua pē lona lima: “Tū ia i luga ma sau i le ogatotonu.” Ona tū lea o ia i luga.+
9 Ona fetalai atu lea o Iesu iā i latou: “Ou te fesili atu iā te outou, pe e faataga ea ona fai se mea lelei+ po o se mea leaga i le sapati, pe e faaola se tagata pe e fasiotia?”+
10 Ua silasila solo o ia iā i latou uma, ona fetalai atu lea i le tamāloa: “Ia faaloaloa mai lou lima.” Ona ia faia lea faapea, ma ua toe lelei ai lona lima.+
11 Ona matuā feita ai lea o i latou, ma taupulepule i se mea e fai iā Iesu.+
12 A o faagasolo ia aso, ona maliu aʻe lea o ia i le mauga e tatalo ai,+ ua tatalo atu pea o ia i le Atua i le pō atoa.+
13 Ua malama aʻe le taeao, ona ia valaau atu lea i ona soo e ō mai iā te ia ma ia filifilia ai mai iā i latou o tane e toʻasefulu lua, o ē ua ia taʻua o “aposetolo”:+
14 O Simona o lē ua ia faaigoa iā Peteru+ ma Aneterea lona uso, o Iakopo ma Ioane,+ o Filipo+ ma Patolomaio,
15 o Mataio ma Toma,+ o Iakopo le atalii o Alefaio ma Simona o lē ua taʻua “o le tagata maelega,”+
16 o Iuta le atalii o Iakopo, ma Iuta le Sekara o lē na avea ma faalata.+
17 Ona maliu ifo lea o ia i lalo faatasi ma ona soo, ma tū i le mea laugatasi. O loo iai i inā le toʻatele o ona soo, atoa foʻi ma le motu o tagata+ mai i Iutaia ma Ierusalema, ma nuu tū matafaga o Turo ma Saitonu, ua ō mai i latou e faalogologo iā te ia, ma faamālōlō o latou maʻi.+
18 Ua faamālōlōina foʻi i latou ua mafatia ona o agaga leaga.
19 Ua taumafai tagata uma ina ia papaʻi+ mai iā te ia, auā ua alu ese le mana+ mai iā te ia ma faamālōlōina ai i latou uma.
20 Ua silasila atu o ia i ona soo ma fetalai atu:+
“E fiafia outou o ē e matitiva,+ auā e fai mo outou le malo o le Atua.
21 “E fiafia outou o ē fia aai+ i le taimi nei, auā e maoona outou.+
“E fiafia outou o ē e fetagisi i le taimi nei, auā e ʻataʻata outou.+
22 “E fiafia outou pe a inosia+ outou e tagata, ma latou tuliesea outou, ma faalumaina outou, ma taʻuleagaina+ o outou igoa ona o le Atalii o le tagata.
23 Ia outou olioli ma fiafia* i lenā aso, faauta foʻi! o i le lagi lo outou taui e tele; auā o mea foʻi na, na faia e o latou augātamā i le ʻauperofeta.+
24 “Oi talofa iā te outou tagata mauʻoa,+ auā e na o le pau lava na o mea tou te mauaina.+
25 “Oi talofa iā te outou ua maoona, auā e fia aai outou.+
“Oi talofa iā te outou ua ʻataʻata, auā e faavauvau ma fetagisi outou.+
26 “Oi talofa iā te outou pe a faaviivii mai tagata uma iā te outou, auā o mea foʻi na, na faia e o latou augātamā i perofeta pepelo.+
27 “Ae ou te fai atu iā te outou o ē o faalogologo mai, Ia alolofa atu pea i o outou fili,+ ia faia mea lelei+ i ē ua ʻinoʻino mai iā te outou,
28 ia faamanuia atu iā i latou o ē faamalaia mai iā te outou, ia tatalo mo ē ua faalumaina outou.+
29 A pō mai e se tasi lou alafau,+ ia liliu i ai le isi; a ave+ e se tasi lou ofu tele, ia avatu i ai ma lou ofutino.
30 Ia avatu i tagata uma mea ua latou ōle mai ai,+ ma aua foʻi e te fai atu e toe aumai au mea na ave e se tasi.
31 “E pei ona outou mananaʻo e faia mai e tagata iā te outou, ia faapea lava ona outou faia iā i latou.+
32 “Afai tou te alolofa atu i ē e alolofa mai iā te outou, o le ā se aogā iā te outou? Auā e oo foʻi i tagata agasala, latou te alolofa atu i ē e alolofa mai iā i latou.+
33 Afai foʻi tou te faia mea lelei i ē e faia mai mea lelei iā te outou, o le ā se aogā iā te outou? Auā e oo foʻi i tagata agasala, latou te faia na mea.+
34 Afai foʻi tou te nonō atu se tupe e aunoa ma se pasene+ iā i latou tou te faamoemoe e toe totogi mai, o le ā se aogā iā te outou? Auā e oo foʻi i tagata agasala, latou te nonō atu tupe e aunoa ma se pasene i ē agasala, o ē e mafai ona toe totogi mai.+
35 Nai lo lea, ia alolofa atu pea i o outou fili ma ia faia mea lelei, ma ia nonō atu+ e aunoa ma se pasene, e lē faamoemoe e toe totogi mai; ona tele ai lea o lo outou taui. E fai foʻi outou ma atalii o le Silisili Ese,+ auā e agalelei+ mai o ia i ē e lē lotofaafetai ma ē amioleaga.
36 Ia mutimutivale pea lo outou alofa e pei ona mutimutivale o le alofa+ o lo outou Tamā.
37 “Aua foʻi tou te toe faamasino atu, ona lē faamasinoina+ lea o outou; ma aua tou te toe taʻusalaina se tasi, ona lē taʻusalaina lea o outou. Ia outou faamagalo atu pea, ona faamagaloina ai lea o outou.+
38 Ia outou foaʻi atu pea, ona foaʻi mai lea o tagata iā te outou.+ Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu. Auā o le fua tou te fuaina atu, e toe fuaina mai iā te outou.”+
39 Ona ia toe fetalai atu lea iā i latou i talafaatusa: “Pe e mafai ea e se tauaso ona taʻitaʻi se isi tauaso? Pe e lē paʻuʻū uma ai ea i laʻua i le lua?+
40 E lē sili le tagata aʻoga i lona faiaʻoga, a o lē ua aʻoaʻoina lelei o le a pei o lona faiaʻoga.+
41 Aiseā e te vaavaai ai i le fasilaau i le mata o lou uso, ae e te lē vaai i le utupoto* i lou lava mata?+
42 E faapefea ona e fai atu i lou uso, ‘Loʻu uso e, tuu mai seʻi oʻu ʻeuese le fasilaau i lou mata,’ ae e te lē vaai i le utupoto i lou lava mata?+ O oe le tagata faafiaamiotonu! Ia muamua ona aveese le utupoto i lou lava mata,+ ona e iloa lelei ai lea ʻeuese le fasilaau i le mata o lou uso.+
43 “E lē fua mai e le laau lelei ni fua pala; e lē fua mai foʻi e le laau pala ni fua lelei.+
44 Auā e iloa laau taʻitasi i ona fua.+ O se faaaʻoaʻoga, e lē tauina mai e tagata ni mati mai i laau tuitui, ma latou te lē tauina mai ni vine mai i laau talatala.+
45 Ua aumaia e le tagata lelei mea lelei mai oloa lelei+ o loo i lona loto, a ua aumaia e le tagata leaga mea leaga mai i lona oloa leaga; auā o le tele o mea i le loto e tautala mai ai lona gutu.+
46 “Aiseā tou te fai mai ai iā te aʻu, ‘Le Alii e! Le Alii e!’ ae lē faia mea ou te fai atu ai?+
47 O lē e sau iā te aʻu ma faalogo i aʻu upu ma faia, ou te faailoa atu iā te outou lē ua tusa i ai o ia:+
48 Ua pei o ia o le tagata ua fau se fale, ua eli maulalo ma faataatia le faavae i luga o le papa. Ina ua oo mai lologa,+ ua tafe mai le vai ma taia ai le fale, ae e leʻi lūlūina ona o le malosi o le fale.+
49 Peitaʻi ane, o lē e faalogo ae lē faia,+ ua pei o le tagata na fausia lona fale i luga o le palapala e aunoa ma se faavae lelei. Ua tafe mai le vai ma taia ai le fale, ma malepe+ ai loa i lalo, ma ua matuā faaleagaina.”+
