Luka 8:1-56
8 E leʻi umi mulimuli ane, ae malaga atu loa o ia mai i lea aai i lea aai, ma mai i lea nuu i lea nuu, ua talaʻi ma folafola atu le tala lelei o le malo o le Atua.+ Ua faatasi ma ia le toʻasefulu lua,
2 ma nisi o fafine+ o ē na ia faamālōlōina mai agaga leaga ma maʻi, o Maria le Makatala, o lē na ō ese mai ai temoni e toʻafitu,+
3 ma Ioana+ le avā a Kusa le pule o le aiga o Herota, ma Susana, ma isi fafine e toʻatele, o ē na auauna iā te ia i a latou meafaitino.
4 Ina ua faapotopoto faatasi mai se motu o tagata faapea ma i latou na ō mai iā te ia mai i lea aai ma lea aai, ona ia fetalai atu lea iā i latou i se talafaatusa:+
5 “Na alu atu se tagata lūlū fatu e lūlū ana fatu. A o ia lūlū, na paʻuʻū nisi fatu i tafatafa o le auala ma na solia i vae, ona ō mai lea o manufelelei o le lagi ma ʻaina.+
6 Na paʻuʻū nisi i le mea papa, ua tupu, a ua toe magumagu auā e lē susū le eleele.+
7 A ua paʻuʻū foʻi isi i le vao tuitui, ma ina ua tutupu aʻe faatasi ma le vao tuitui, ona fetinaʻiina ai lea.+
8 Na paʻuʻū foʻi isi i le eleele lelei, ma ina ua tutupu, ona fua mai ai lea e taʻiselau.”+ A o fetalai atu o ia i nei mea, ua leotele ma faapea atu: “O lē ua iai taliga e faalogo ai, inā faalogo mai ia o ia.”+
9 A ua fesili mai ona soo iā te ia i le uiga o lenei talafaatusa.+
10 Ua fetalai atu o ia: “Ua tuuina atu ina ia outou malamalama i mea lilo paia o le malo o le Atua, ae ua faamatala atu iā i latou i talafaatusa,+ ina ia vaavaai ae e lē iloa mea o loo latou vāai i ai, pe e faalogo ae e lē iloa le uiga.+
11 O le uiga lenei o le talafaatusa:+ O le fatu, o le upu lea a le Atua.+
12 O fatu i tafatafa o le auala, o i latou ia na faalogo,+ ona sau lea o le Tiapolo+ ma aveese le upu mai i o latou loto, ina neʻi talitonu ma faaolaina ai i latou.+
13 O fatu i luga o le mea papa, o i latou ia ua faalogo i le upu, ua talia ma le olioli, ae peitaʻi, e leai ni o latou aa. Ua latou talitonu mo sina taimi, ae peitaʻi, pe a oo i taimi o tofotofoga, ona latou paʻuʻū ai lea.+
14 A o fatu na paʻuʻū i le vao tuitui, o i latou ia ua faalogo, ae ua tosina atu i popolega, ma le tamaoaiga, ma fiafiaga+ o lenei olaga, ua matuā fetinaʻiina ai, ona lē oo lea ina matua o latou fua.+
15 A o le fatu na lūlū i le eleele lelei, o i latou ia ua faalogo i le upu ma le loto mamā ma lelei,+ ma tausi i ai, ua fua mai, ma ua tumau.+
16 “E leai se tasi e uma ona tutu le molī, ona ufiufi lea i se ipu pe tuu i lalo o se moega, ae na te tuuina i luga o le tuugāmolī, ina ia iloa ai le malamalama e i latou e ulufale mai.+
17 Auā e leai se mea lilo+ e lē faailoaina, e leai foʻi se mea e matuā natia e lē faailoaina mai ma faaalia i luma o tagata.+
18 O lea la, ia uaʻi atu i la outou faalogo; auā o sē ua iai mea, e foaʻiina atu nisi mea iā te ia,+ a o sē ua leai se mea, e aveeseina mea ua manatu ua iā te ia.”+
19 Ua ō mai lona tinā ma ona uso+ iā te ia, ae e leʻi mafai ona oo atu i ai ona o le motu o tagata.+
20 A ua taʻu mai iā te ia e faapea: “O loo tutū mai i fafo lou tinā ma ou uso e fia vāai iā te oe.”+
21 Ua tali atu o ia iā i latou: “O loʻu tinā ma oʻu uso, o i latou ia e faalogo i le upu a le Atua ma faia.”+
22 I se tasi aso, ua maliu atu ai o ia i le vaa ma ona soo, ona ia fetalai atu lea iā i latou: “Seʻi o tatou ō i le isi itu o le vaituloto.” Ona latou ō ai lea.+
23 A o folau atu i latou, ua moe o ia. Ona agi mai ai lea o se matagi malosi i le vaituloto, ma ua amata ona tumu le vaa i vai, ma ua lamatia ai.+
24 Ua latou ō ane ma fafagu iā te ia, ua faapea atu: “Le Faiaʻoga e, le Faiaʻoga e, o le a matou feoti!”+ Ona nofo lea o ia i luga, ua vavao+ i le matagi ma le vai sousou, ona malū ai lea ma toʻafilemu.
25 Ona ia fetalai atu lea iā i latou: “Po o ifea ea lo outou faatuatua?” Ae ua fefefe i latou ma ofo, ua faapea ane le tasi i le isi: “O ai lava lenei tagata, auā ua ia faatonu e oo lava i le matagi ma le vai, ua usiusitaʻi iā te ia?”+
26 Ua taunuu le vaa i laufanua o Kerekese, i le isi itu o Kalilaia.+
27 A o maliu atu o ia i uta, ona la fetaui ai lea ma se tagata mai le aai o lē ua uluitino e temoni. Ua tele aso o nofo e lē lavalavā i le fanuatanu,+ ae e lē i lona aiga.
28 Ua ia iloa mai Iesu, ona alaga lea ma faapaʻū i ona luma, ma faapea mai ma le leotele: “O oe na le Alo o le Atua Silisili Ese, aiseā ua e faalavelave mai ai iā te aʻu?+ Ou te ʻaiʻoi atu iā te oe, aua e te faapuapuagatia iā te aʻu.”+
29 (Auā ua ia faatonu i le agaga leaga ina ia alu i fafo mai i le tamāloa. Ua umi se taimi o taofiofia o ia e le temoni,+ ma ua masani ona fusifusia o ia i filifili uʻamea ma mea e faamau ai vae, ma leoleoina o ia. Ae ua ia motusi ia noanoataga ma ave o ia e le temoni i nofoaga tuufua.)
30 Ua fesili atu Iesu iā te ia: “O ai lou igoa?” Ua tali mai o ia: “O Lekeono,” auā e toʻatele temoni ua uluitino iā te ia.+
31 Ua latou ʻaiʻoi+ mai pea iā te ia, e aua neʻi auina atu i latou i le tō.+
32 O le taimi lea o loo aai ai se lafu puaa+ tele i le mauga. Ona latou ʻaiʻoi mai lea iā te ia e tuu atu i latou e uluitino i puaa,+ ona ia tuu atu lea o i latou e ō.
33 Ona ō ese ai lea o temoni mai le tamāloa ma uluitino i le lafu puaa, ona taufetuli atu ai lea o le lafu puaa i le tofē, ua feosofi i le vaituloto ma malelemo ai.+
34 Ae ina ua vāai atu o ē na tausia le lafu puaa i le mea ua tupu, ona latou sosola lea ma tala atu mea uma i le aai ma le nuu atoa.+
35 Ua ō mai tagata e vāai i le mea na tupu, ua ō mai iā Iesu, ma iloa ai le tamāloa ua ō i fafo iā te ia temoni, ua fai ona ofu ma ua toe lelei lona mafaufau, o loo nofo i vae o Iesu; ona fefefe ai lea o i latou.+
36 Ua faamatala atu e ē na vāai i lenei mea iā i latou, le auala na toe malosi ai le tamāloa na uluitino e temoni.+
37 Ona talosaga mai lea o le motu o tagata mai nuu tuaoi o Kerekese iā te ia, ina ia maliu ese mai iā i latou, auā ua matuā fefefe i latou.+ Ona maliu atu lea o ia i le vaa ma alu ese.
38 Peitaʻi, ua ʻaiʻoi mai pea le tamāloa o lē na ō ese mai ai temoni, ina ia faatasi pea ma ia. A ua ia vavao i le tamāloa ma faapea atu:+
39 “Ia e alu i lou aiga, ma faamatala atu pea mea ua faia e le Atua mo oe.”+ Ona alu lea o ia ma faailoa atu i le aai atoa, mea ua faia e Iesu iā te ia.+
40 Ua toe foʻi atu Iesu, ma ua talia ma le fiafia o ia e le motu o tagata, auā ua faatalitali i latou uma iā te ia.+
41 Faauta foʻi! ua sau se tamāloa e igoa iā Iairo, o ia o le pule o le sunako. Ua faapaʻū o ia i vae o Iesu ma augani mai ina ia maliu atu i lona fale,+
42 auā o le a oti lona afafine e toʻatasi, pe ā ma le sefulu lua tausaga.+
A o maliu atu o ia, ua lolofi ane le motu o tagata iā te ia.+
43 Ua iai se fafine o lē ua sefulu lua tausaga o maʻi i le punatoto,+ e leʻi mafai lava e se tasi ona togafiti lona maʻi.+
44 Ua ui mai o ia i ona tua ma paʻi mai i le pito+ o lona ofu tele,+ ona uma ai lea o lona punatoto.+
45 Ua fetalai atu Iesu: “O ai na paʻi mai iā te aʻu?”+ Ua faafiti i latou uma, a ua faapea mai Peteru: “Le Faiaʻoga e, o loo lolofi ma fetaomi mai le motu o tagata iā te oe.”+
46 Ae peitaʻi, ua fetalai atu Iesu: “Na paʻi mai lava se tasi iā te aʻu; auā ua ou iloa ua alu ese atu le mana+ mai iā te aʻu.”+
47 A ua iloa e le fafine e lē mafai ona lilo o ia, ona sau ai lea o ia ua gatete ma faapaʻū i ona luma, ma faamatala atu i tagata uma le māfuaaga o lona paʻi atu iā te ia, ma ua faamālōlōina ai loa o ia.+
48 A ua ia fetalai atu iā te ia: “Loʻu afafine e, ua e malosi ona o lou faatuatua;+ inā alu ia oe ma le manuia.”+
49 A o fetalai atu o ia, ona sau lea o le tasi tagata ua fai ma sui o le pule o le sunako ma faapea mai: “Ua oti lou afafine, aua e te toe faalavelave i le aʻoaʻo.”+
50 Ua faafofoga Iesu i lenei tala, ma ua tali atu iā te ia: “Aua e te fefe, ae ia e faatuatua,+ ona toe ola ai lea o ia.”
51 Ua taunuu o ia i le fale, ona ia vavao lea o tagata e aua le mulimuli atu iā te ia seʻi vaganā ai Peteru, Ioane ma Iakopo, ma le tamā ma le tinā o le teine.+
52 A ua fetagisi ma tagituʻi tagata uma i le faavauvau ona o ia. Ua ia fetalai atu: “Aua le toe fetagisi,+ auā e leʻi oti le teine, o loo moe.”+
53 A ua latou toē faaamuamu iā te ia auā ua latou iloa ua oti le teine.+
54 Ona tago atu lea o ia i lona lima, ma faapea atu: “Le tamaʻitaʻi e, inā tū ia i luga!”+
55 Ona toe ola*+ lea o ia, ma tū loa i luga.+ Ua ia faatonuina foʻi i latou e avatu se meaʻai ma le teineitiiti.+
56 Ua matuā fiafia ona mātua; ae ua ia faatonuina i laʻua e aua neʻi taʻuina atu i se tasi le mea na tupu.+
Faamatalaga Pito i Lalo
^ Po ua toe maua e ia “le malosi o le ola” po o le “agaga.” Tagaʻi i le Faaopoopoga e 5.
