Mareko 1:1-45
1 O le amataga lenei o le tala lelei iā Iesu Keriso:
2 E pei ona tusia e le perofeta o Isaia: “(Faauta! ou te auina atu laʻu avefeʻau i ou luma, o lē na te saunia lou ala.)+
3 Faalogo! O loo alaga se tasi i le toafa, ‘Ia outou sauniuni le ala o Ieova, ma ia faasaʻosaʻo ala i ona luma,’”+
4 ua alu atu foʻi Ioane le papatiso i le toafa, ma talaʻi atu ai le papatisoga, o le faailoga lea o le salamō mo le faamagaloina o agasala.+
5 Ona ō atu lea o tagata uma mai Iutaia ma Ierusalema iā te ia, ua ia papatisoina i latou i le Vaitafe o Ioritana, ua latou faailoa atu a latou agasala.+
6 Ua ofu Ioane i le fulufulu kamela ma le fusipaʻu i lona sulugātiti,+ o ana meaʻai foʻi o sē akerise+ ma le meli vao.+
7 Ua talaʻi atu o ia e faapea: “O loo mulimuli mai se tasi, e sili atu lona malosi i lo o aʻu; e lē aogā aʻu ona punou ifo e tatala i nonoa o ona seevae.+
8 Na ou papatisoina outou i le vai, ae o ia na te papatisoina outou i le agaga paia.”+
9 A o faagasolo ia aso, ua alu atu foʻi Iesu mai Nasareta i Kalilaia ma papatisoina ai e Ioane i le vaitafe o Ioritana.+
10 Ina ua maliu aʻe loa o ia mai i le vai, ona ia silafia ai lea o le lagi ua avanoa, ma ua alu ifo i ona luga+ le agaga e pei o se lupe;
11 ona oo mai lea o le siʻufofoga mai i le lagi ua faapea mai: “O loʻu Atalii pele oe, ua malie loʻu loto iā te oe.”+
12 Ona taʻitaʻi atu loa lea e le agaga paia o ia i le toafa.+
13 Ua nofo ai pea o ia i le toafa mo aso e fā sefulu,+ ma ua faaosoosoina ai o ia e Satani.+ E iai foʻi manufeʻai i inā, ae ua auauna atu agelu iā te ia.+
14 Ina ua lafo Ioane i le falepuipui, ona maliu atu lea o Iesu i Kalilaia+ e talaʻi atu le tala lelei e uiga i le Atua+
15 ma faapea atu: “Ua taunuu le taimi ua atofaina,+ ma ua latalata mai le malo o le Atua. O lea, ia outou salamō ai,+ ma ia faatuatua i le tala lelei.”
16 A o savali i tafatafa ane o le sami* o Kalilaia, ua ia silafia ai Simona+ ma Aneterea lona uso, o loo lafo o la upega i le sami, auā o tagata faifaiva i laʻua.+
17 Ona fetalai atu lea o Iesu iā i laʻua: “Inā mulimuli mai ia iā te aʻu, ou te faia oulua ma faifaiva i tagata.”+
18 Ona la tuua loa lea o o la upega, ae mulimuli atu iā te ia.+
19 Ua maliu teisi atu o ia, ma iloa ai Iakopo le atalii o Sepetaio ma lona uso o Ioane, o i luga o le vaa o loo fono masaesae o o latou upega;+
20 ma ua ia valaau atu loa iā i laʻua. Ona la tuua loa lea o lo laʻua tamā o Sepetaio i le vaa ma le ʻaufaigaluega, ae mulimuli atu iā te ia.
21 Ona latou ō atu lea i Kapanaumi.+
Ua oo i le sapati ona ulufale atu lea o ia i le sunako ma amata ai ona aʻoaʻo atu.
22 Ua matuā ofo i latou i lana aʻoaʻo atu,+ auā ua ia aʻoaʻoina i latou e pei o sē ua iai le pule ae e lē pei o le ʻautusiupu.+
23 Ua iai foʻi i le taimi lenā i lo latou sunako, se tagata ua pulea e se agaga leaga ma ua alaga atu+
24 e faapea: “Iesu e, le Nasareta!+ Aiseā ua e faalavelave mai ai iā i matou? Po ua e sau ea e faaumatia i matou? Ua ou iloa+ o oe o Lē e Paia+ e te sau mai i le Atua.”+
25 Ona vavao atu lea o Iesu iā te ia e faapea: “Ia e filemu, ma ia e alu i fafo mai iā te ia!”+
26 Ua maʻilili le tagata ona o le agaga leaga, ua ee leotele foʻi, ona alu ese ai lea o ia i fafo mai iā te ia.+
27 Ona maofa ai lea o tagata uma, ua latou fesili ai le tasi i le isi, ua faapea ane: “O le ā ea lenei mea? O se aʻoaʻoga fou! Ua iā te ia le pule e faatonu ai e oo lava i agaga leaga, ma ua latou usiusitaʻi iā te ia.”+
28 Ua vave ona salalau atu le tala e uiga iā te ia i vaipanoa uma o Kalilaia.+
29 Ona latou ulufafo loa lea mai i le sunako, ma latou ō atu i le fale o Simona+ ma Aneterea, faatasi ma Iakopo ma Ioane.
30 A ua taoto le tinā o le avā+ a Simona ona ua fiva o ia,+ ma ua latou faailoa atu loa o ia iā Iesu.
31 Ua ia sōsō atu ma faanofo o ia i luga, ua ia tago atu i lona lima, ona teʻa ai lea o lona fiva,+ ma amata loa ona ia auauna atu iā i latou.+
32 Ua oo i le afiafi, ina ua goto le lā, ona aumai ai lea e tagata o i latou uma o ē mamaʻi,+ ma ē ua uluitinoina e temoni;+
33 ua potopoto ane foʻi tagata uma o le aai i le faitotoʻa.
34 Ona ia faamālōlōina ai lea o le toʻatele o i latou ua apoia i maʻi eseese,+ ua ia tutuli foʻi le tele o temoni, ma vavao atu iā i latou e aua le tautatala, auā ua latou iloa o ia o Keriso.+
35 Ua aulia le taeaopō a o pogisa pea, ona tulaʻi lea o ia, ua alu i fafo, ma maliu atu i se nofoaga e tuufua,+ ma tatalo ai.+
36 Ae peitaʻi, ua saʻili o ia e Simona ma i latou ua faatasi ma ia
37 ma ua latou maua o ia, ona faapea mai lea: “O loo saʻili tagata uma iā te oe.”
38 A ua fetalai atu o ia iā i latou: “Seʻi tatou ō atu ia i se isi nofoaga, i aai o loo latalata mai, ina ia ou talaʻi+ atu ai, auā o le mea lea na ou sau ai.”+
39 Ona maliu atu lea o ia i Kalilaia uma ma talaʻi atu ai i o latou sunako, ma tutuli i temoni.+
40 Ona sau ai lea iā te ia o le tagata lepela, ua tootuli ma ʻaiʻoi mai e faapea: “A e finagalo i ai, e mafai lava ona e faamamā iā te aʻu.”+
41 Ona mutimutivale lea o lona alofa,+ ua faaloaloa atu lona aao ma paʻi atu iā te ia, ua fetalai atu: “Ou te loto i ai. Inā mamā ia oe.”+
42 Ona teʻa ai loa lea o lona lepela, ma ua mamā o ia.+
43 Ua ia matuā faatonu atu foʻi iā te ia, ma tuu atu loa e alu,
44 ma faapea atu: “Ia aua neʻi e taʻu atu i se tasi. Ae ia e alu ma faailoa atu oe i le ositaulaga,+ ma avatu le taulaga mo lou faamamāina e pei ona faatonuina e Mose,+ e fai ma molimau iā i latou.”+
45 Peitaʻi, ua alu lenei tagata ma taʻutaʻu atu ma faasalalau atu tala o le mea na tupu. O lea, ua lē mafai ai ona toe faaali atu Iesu i se aai, ae ua nofo o ia i nofoaga tuufua i tua o le aai, ma ua faaauau pea ona ō atu tagata iā te ia mai itu uma.+
Faamatalaga Pito i Lalo
^ O lenei sami, o se vaituloto telē. O nisi taimi e taʻua o le vai o Kalilaia.
