Mareko 10:1-52
10 Ua tulaʻi o ia ma ua oo atu i tuaoi o Iutaia, ma sopo atu i le isi itu o Ioritana. Ua toe mulimuli mai foʻi iā te ia le motu o tagata, ona ia toe aʻoaʻo atu lea iā i latou e pei o lana masani.+
2 Ua ō ane foʻi le ʻau Faresaio e tofotofo iā te ia, ma fesiligia o ia pe e taga i le tulafono ona faateʻa* e se tamāloa lana avā.+
3 Ua ia tali atu iā i latou: “O le ā le mea na poloaʻi atu ai Mose iā te outou?”
4 Ona latou faapea mai lea: “Na faataga e Mose ona tusia se tusi faamaonia e faateʻa ai le avā.”+
5 A ua faapea atu Iesu iā i latou: “Ona o lo outou lotomaaa,+ na ia tusia ai lenei poloaʻiga.
6 Peitaʻi, talu mai le foafoaga, ‘Na ia faia i laʻua o le tane ma le fafine.+
7 O le mea lea e tuua ai e le tane lona tamā ma lona tinā,
8 ona avea ai lea o i laʻua ma tino e tasi’;+ ua lē toe toʻalua ai i laʻua, ae ua avea ma tino e tasi.
9 O lea la, o ē ua faatasia* e le Atua, aua neʻi tuueseeseina e se tagata.”+
10 A o iai i le fale,+ ona fesili mai lea o le ʻausoo iā te ia e faatatau i lenei mea.
11 Ua ia fetalai atu iā i latou: “Ai se tasi e faateʻa i lana avā ma toe faaipoipo atu i se isi, ua mulilua+ o ia, ma ua agasala ai i le fafine muamua,
12 pe afai foʻi e toe faaipoipo le fafine i se tasi ina ua uma ona faateʻa i lana tane, ua mulilua foʻi lenā fafine.”+
13 Ona aumaia lea e tagata o tamaiti iā te ia, ina ia paʻi ane o ia iā i latou, ae ua vavao i latou e le ʻausoo.+
14 Ua silafia e Iesu lenei mea, ona lē fiafia ai lea ma fetalai atu iā i latou: “Tuu ai pea tamaiti e ō mai iā te aʻu, ae aua le taofia i latou. Auā ua fai le malo o le Atua ma tofi o ē e pei o nei tamaiti.+
15 E moni ou te fai atu iā te outou, O sē na te lē taliaina le malo o le Atua e pei o se tamaitiiti, e lē ulu atu lava i ai o ia.”+
16 Ona siitia lea e ia o tamaiti i ona lima, ua faamanuia iā i latou ma faaee ona aao iā i latou.+
17 A o maliu ese atu o ia, ua tamoʻe mai se tamāloa ma tootuli i ona luma, ma fesili mai iā te ia: “Le Aʻoaʻo lelei e, o ā ni mea e tatau ona ou faia ina ia ou maua ai le ola e faavavau?”+
18 Ua fetalai atu Iesu iā te ia: “Aiseā ua e taʻua ai aʻu e lelei?+ E leai se tasi e lelei ua na o le toʻatasi, o le Atua lea.+
19 Ua e iloa poloaʻiga, ‘Aua le fasioti tagata,+ Aua le mulilua,+ Aua le gaoi,+ Aua le molimau pepelo,+ Aua le taufaasesē,+ Ia e āva i lou tamā ma lou tinā.”’+
20 Ua fai mai le tamāloa iā te ia: “Le Aʻoaʻo e, ua ou tausia na mea uma talu mai loʻu talavou.”
21 Ua silasila atu Iesu ma ua alofa iā te ia, ua fetalai atu: “E tasi lava le mea lenā e te lē o faia: Ia e alu e faatau atu au meafaitino ma foaʻi atu i ē matitiva, ona e maua ai lea o ʻoa i le lagi, ona e sau ai lea ma mulimuli mai iā te aʻu.”+
22 A ua faanoanoa o ia ona o ia upu, ona alu ese ai lea o ia, ua tigā lona loto, auā e tele lava ana meafaitino.+
23 Ona silasila solo lea o Iesu, ua fetalai atu i ona soo: “E matuā faigatā lava mo ē e tele tupe+ ona ulu atu i le malo o le Atua!”+
24 Ua faateʻia+ ona soo i ana fetalaiga. Ona toe tali atu lea o Iesu iā i latou: “Le fanau e, e matuā faigatā lava ona ulu atu i le malo o le Atua!
25 E sili ona faigofie ona sao o se kamela i le pū o le nila, nai lo o le sao atu o se tagata mauʻoa i le malo o le Atua.”+
26 Ua atili ai ona latou ofo ma faapea mai iā te ia: “O ai la e mafai ona faaolaina?”+
27 Ua silasila totoʻa atu Iesu iā i latou ma faapea atu: “E lē mafaia e tagata lenei mea, ae e mafaia e le Atua, auā e mafaia e le Atua mea uma lava.”+
28 Ona tali mai lea o Peteru iā te ia: “Faauta! Ua matou tuua mea uma ae mulimuli atu iā te oe.”+
29 Ua faapea atu Iesu: “E moni ou te fai atu iā te outou, O so o se tasi na te tuua le fale, po o uso, o tuafāfine, o le tinā, o le tamā, o le fanau, po o fanua, ona o aʻu ma le tala lelei,+
30 e maua e ia e taʻiselau+ i le taimi nei, o fale, o uso, o tuafāfine, o tinā, o fanau, ma fanua, faatasi ai ma sauāga,+ ma le ola e faavavau i le lumanaʻi.
31 Ae o le toʻatele o ē e muamua o le a mulimuli, ma o ē e mulimuli o le a muamua.”+
32 Ua latou agaʻi aʻe i le ala i Ierusalema, ma o loo muamua atu Iesu i o latou luma, ona taufaiofo ai lea o i latou, ae ua fefefe ē o loo mulimuli mai. Ona ia toe ave lea o le toʻasefulu lua ma faamatala atu iā i latou mea o le a oo iā te ia:+
33 “O lea ua tatou ō atu i Ierusalema, o le a tuuina atu ai le Atalii o le tagata i le ʻaufaitaulaga sili ma le ʻautusiupu, o le a latou faasalaina o ia i le oti, ma tuuina atu o ia i tagata o nuu ese,+
34 latou te tauemu ma tuufeanu iā te ia, ma sasa tigāina ma fasiotia o ia, ae o le a toe faatūina o ia i le aso lona tolu.”+
35 Ua sōsō mai iā te ia Iakopo ma Ioane, o atalii e toʻalua o Sepetaio,+ ma faapea mai: “Le Aʻoaʻo e, ma te mananaʻo ia e faia mea uma ma te talosaga atu ai iā te oe.”+
36 Ua ia fetalai atu iā i laʻua: “O le ā se mea lua te mananaʻo ou te faia mo oulua?”
37 Ua la fai mai iā te ia: “Ia e tuu mai iā i maʻua e nofo le tasi i lou itu taumatau, ma le isi i lou itu tauagavale i lou mamalu.”+
38 A ua fetalai atu Iesu iā i laʻua: “Lua te lē iloa le mea ua oulua talosaga mai ai. Pe e mafai ea ona oulua inu i le ipu ua ou inu ai, pe papatisoina foʻi oulua i le papatisoga e papatisoina ai aʻu?”+
39 Ua la fai mai iā te ia: “Ma te mafaia.” Ona fetalai atu lea o Iesu iā i laʻua: “Lua te inu i le ipu ua ou inu ai, lua te papatiso foʻi i le papatisoga e papatisoina ai aʻu.+
40 Ae peitaʻi, ou te lē filifilia+ po o ai e nofo i loʻu itu taumatau ma loʻu itu tauagavale, ae e maua lenā mea e i latou o ē ua saunia i ai.”
41 Ua faalogo ai le isi toʻasefulu i lenei mea, ona feita ai lea o i latou iā Iakopo ma Ioane.+
42 A ua valaau atu Iesu e ō mai iā te ia, ona ia faapea atu lea: “Tou te iloa, o ē ua taʻua o taʻitaʻi o malo, e pulepuletutū i latou i tagata, ma o ē ua sili, ua pule foʻi i latou i tagata.+
43 Ae e lē faapena outou; o sē e fia sili iā te outou e tatau ona avea o ia ma a outou auauna,+
44 ma o sē e fia muamua iā te outou, e tatau ona avea o ia ma pologa a tagata uma.+
45 Auā e leʻi sau le Atalii o le tagata ina ia auauna mai tagata iā te ia, ae ia auauna atu,+ ma foaʻi atu lona ola e fai ma togiola+ e sui aʻi tagata e toʻatele.”+
46 Ua taunuu i latou i Ieriko. Ae ina ua tuua e ia ma ona soo ma le motu o tagata e toʻatele Ieriko, ua iai se tagata ʻaisi e tauaso o Patimaio lona igoa, o le atalii o Timaio, o loo nofo i tafatafa o le auala.+
47 Ina ua faalogo o ia ua maliu ane Iesu le Nasareta, ona ia alaga lea ma faapea mai: “Iesu e, le Alo o Tavita,+ ia e alofa* mai iā te aʻu!”+
48 Ona matuā fai atu lea o le toʻatele o tagata iā te ia e soia le pisa, ae ua atili ai ona ia alaga: “Le Alo e, o Tavita, ia e alofa* mai iā te aʻu!”+
49 Ona tū lea o Iesu ma fetalai atu: “Ia valaau iā te ia e sau.” Ona latou valaau atu lea i le tagata tauaso: “Ia tū i luga ma ia lototele, o loo valaau mai o ia e te alu atu.”+
50 Ua oso o ia i luga, ua tiaʻi lona ofu tele, ma sau iā Iesu.
51 Ua tali atu Iesu iā te ia: “O le ā se mea e te manaʻo ou te faia mo oe?”+ Ua fai mai le tagata tauaso: “Le Aʻoaʻo e,* ia e faapupula i oʻu mata.”+
52 Ua fetalai atu Iesu iā te ia: “Inā alu ia, ua e malosi ona o lou faatuatua.”+ Ona pupula loa lea o ona mata,+ ma ua mulimuli atu iā te ia i le auala.+
Faamatalaga Pito i Lalo
^ E tusa ai ma le upu Eleni, “o le tatalaina faaletulafono o le faaipoipoga.”
^ I le gagana Eleni, o le “amo faatasi.”
^ Pe “ia e alofa mutimutivale mai.”
^ Pe “ia e alofa mutimutivale mai.”
