Mareko 13:1-37
13 A o maliu ese atu o ia mai i le malumalu, ua fai mai se tasi o ona soo iā te ia: “Le Aʻoaʻo e, silasila foʻi, maʻeu le tetelē o nei maa ma nei fale!”+
2 A ua tali atu Iesu iā te ia: “Po ua e vaai atu ea i nei fale tetele?+ E lē toe tiʻetiʻe se tasi maa i luga o se isi maa,+ ae o le a soloia i lalo.”+
3 A o nofo o ia i le Mauga o Olive, ua iloa atu foʻi le malumalu. Ua na o i latou ma Peteru,+ Iakopo, Ioane ma Aneterea, ona latou fesili mai lea iā te ia:+
4 “Ia e fetalai mai iā i matou, Pe e oo afea ia mea, ma o le ā foʻi le faailoga o le taufaaiʻuiʻuga o nei mea uma?”+
5 Ona faapea atu lea o Iesu iā i latou: “Ia faaeteete neʻi faasesēina outou e se tasi.+
6 E toʻatele o le a ō mai i loʻu igoa ma faapea ane, ‘O aʻu o ia,’ ma faasesēina ai le toʻatele.+
7 Pe a outou faalogo i taua ma tala o taua; aua neʻi outou atuatuvale ai. Auā e ao ona taunuu o nei mea ae e leʻi oo mai le iʻuga.+
8 “Auā o le a siitaua le isi atunuu i le isi atunuu, ma le isi malo i le isi malo,+ o le a iai mafuiʻe+ i lea mea ma lea mea, o le a iai foʻi oge.+ O le amataga ia o le tigā o puapuaga.+
9 “A o outou, ia outou nofosauni, auā o le a tuuina atu outou e tagata i faamasinoga,+ o le a sasaina outou i sunako,+ ma o le a tuuina atu outou i luma o kovana ma tupu ona o aʻu, e fai ma molimau iā i latou.+
10 E ao foʻi ona muaʻi talaʻiina atu le tala lelei+ i atunuu uma lava.+
11 Ae afai latou te tuuina atu outou i faamasinoga, aua e tou te popole i upu e tou te tautatala atu ai,+ ae o upu e tuuina atu i lenā taimi, ia outou tautatala atu ai, auā e lē o outou o loo tautatala atu a o le agaga paia.+
12 O le a tuuina atu foʻi e le uso lona uso ia fasiotia, e tuuina atu foʻi e le tamā se tasi o lana fanau,+ e tetee atu foʻi le fanau i mātua ma tuuina atu mātua ina ia fasiotia;+
13 o le a inosia foʻi outou e tagata uma ona o loʻu igoa.+ A o lē e tumau seʻia oo i le iʻuga,+ e faaolaina o ia.+
14 “Ae peitaʻi, pe a outou vaaia le mea e inosia+ e faatafuna+ aʻi ua tū i le mea e lē tatau ona tū ai (o lē e faitau, ia iā te ia le faautaga loloto),+ ona sosola atu lea i mauga+ o ē o loo i Iutaia.
15 O lē o loo i luga o le fale, ia aua neʻi alu ifo i lalo, pe alu atu i totonu e aveese ni mea mai lona fale;+
16 o lē o loo i le fanua, aua neʻi toe foʻi e ave lona ofu tele.+
17 Oi talofa i fafine totō ma ē failele i na aso!+
18 Ia faaauau ona outou tatalo ina neʻi tupu lenā mea i le tau mālūlū;+
19 auā o le a avea na aso ma aso o le puapuaga,+ lea e leai sona tusa talu le amataga o foafoaga na foafoaina e le Atua seʻia oo mai i lea taimi, ma e lē toe tupu foʻi se mea faapea.+
20 O le mea moni, a lē faapuupuuina e Ieova+ ia aso, e leai se tagata e faaolaina. Ae e faapuupuuina na aso ona o ē ua filifilia.+
21 “Afai e fai ane se tasi iā te outou i lea taimi, ‘Vaai, Ua i inei le Keriso,’ pe ‘Vaai, Ua i inā,’+ aua tou te talitonu i ai.+
22 Auā o le a tulaʻi mai Keriso pepelo ma perofeta pepelo,+ e latou te faia faailoga tetele, ma mea ofoofogia+ ina ia faasesē ai, pe afai e mafai e oo lava i ē ua filifilia.+
23 O lea, ia outou mataala+ ai, auā ua uma ona ou taʻu atu nei mea uma iā te outou.+
24 “I ia aso, pe a mavae lea puapuaga, o le a pogisa le lā, e lē toe susulu foʻi le masina,
25 o le a paʻuʻū fetu mai le lagi, ma o le a lūlūina mea malolosi i le lagi.+
26 Ona latou vaaia lea o le Atalii o le tagata+ o loo sau i ao, ma le mana tele, ma le mamalu.+
27 Ona ia aauina atu lea o agelu e latou te aoaoina mai o ē ua filifilia+ mai i matāmatagi e fā, e mai i le tuluʻiga o le lalolagi e oo atu i le tuluʻiga o le lagi.+
28 “O lenei, ia iloa lenei mea mai i le talafaatusa i le laau o le mati: Pe a faatoʻā tutupu ona lālā fou ma oso ai foʻi ma ona lau, ona outou iloa lea ua latalata le tau māfanafana.+
29 E faapea foʻi outou, pe a outou vāai ua tutupu nei mea, ia outou iloa ua latalata mai o ia, ua i faitotoʻa lava.+
30 E moni ou te fai atu iā te outou, e lē mavae atu lenei tupulaga seʻia taunuu o nei mea uma.+
31 O le a mavae atu le lagi+ ma le lalolagi, ae e lē mavae+ lava aʻu upu.+
32 “E lē iloa e se tasi lea aso ma le itula, e oo lava i agelu i le lagi, po o le Atalii, ae ua na o le Tamā lava.+
33 Ia vaavaai pea, ia mataala pea,+ auā tou te lē iloa le taimi atofaina.+
34 Ua faatusaina i se tagata na alu malaga i nuu mamao+ ua tuua lona fale, ma tuu atu le pule i ana pologa, e tofu i latou ma galuega, ma faatonuina le leoleo faitotoʻa e faaauau ona mataala.
35 O lea, ia faaauau ona mataala,+ auā tou te lē iloa pe e sau afea le matai o le aiga, po o le afiafipō,* po o le vaeluapō,* po o le vivini o moa* po o le taeaopō;*+
36 ina neʻi taunuu faafuaseʻi mai o ia ma maua mai outou o loo momoe.+
37 A o aʻu upu ou te fai atu ai iā te outou, ou te fai atu ai foʻi i tagata uma, Ia faaauau ona mataala.”+
Faamatalaga Pito i Lalo
^ “Afiafipō.” O le leoleoga muamua e tusa ai ma le vaevaeina e Eleni ma Roma o pō, e amata mai i le goto o le lā e oo atu i le tā o le 9 i le pō.
^ “Vaeluapō.” O le leoleoga lona 2 e tusa ai ma le vaevaeina e Eleni ma Roma o pō, e amata mai i le pe tusa o le 9 i le pō e oo atu i le vaeluapō.
^ “Le vivini o moa.” O le leoleoga lona 3 e tusa ai ma le vaevaeina e Eleni ma Roma o pō, e amata mai i le vaeluapō e oo atu i le tā o le 3 i le vaveao.
^ “Taeaopō.” O le leoleoga lona 4 e tusa ai ma le vaevaeina e Eleni ma Roma o pō, e amata mai pe tusa o le tā o le 3 i le vaveao e oo atu i le oso aʻe o le lā.
