Mareko 3:1-35
3 Ua toe ulufale atu o ia i se tasi o sunako, ma ua iai i inā se tagata ua pē lona lima.+
2 O lea, ua tulimataʻi ai o ia e le ʻau Faresaio pe na te faamālōlōina lea tagata i le sapati, ina ia latou molia ai o ia.+
3 Ua fetalai atu o ia i le tagata ua pē lona lima: “Tū ia i luga ma sau i le ogatotonu.”
4 Ona ia fetalai atu lea iā i latou: “Pe e faataga ea ona fai se mea lelei po o se mea leaga i le sapati, pe e faaola se tagata pe e fasiotia?”+ A ua lē tali mai i latou.
5 Ua silasila solo o ia ma le toʻasā iā i latou ona ua tigā tele lona finagalo i lo latou lotomaaa,+ ona ia fetalai atu lea i le tagata: “Ia faaloaloa lou lima.” Ona faaloaloa mai lea, ma ua toe lelei ai lona lima.+
6 Ona ō loa lea o le ʻau Faresaio, ua taupulepule ma ē e ʻau ma Herota,+ ina ia maua se mea e fasioti ai Iesu.+
7 A ua tuumuli Iesu ma ona soo agaʻi i le sami; ma ua mulimuli atu iā te ia tagata e toʻatele mai i Kalilaia ma Iutaia.+
8 E oo lava i le toʻatele o tagata mai i Ierusalema, ma Itumaia, o ē e i le isi itu o Ioritana, ma itu uma o Turo+ ma Saitonu, ua latou ō mai ai iā te ia ona ua faalogo i le tele o mea ua ia faia.
9 Ua ia faatonu atu foʻi i ona soo ina ia iai pea se tamaʻi vaa e na te faaaogāina ina neʻi lolofi mai le motu o tagata iā te ia.
10 Talu ai ua ia faamālōlōina le toʻatele o tagata, ua lolofi mai ai i latou uma ua mamaʻi tigāina ina ia papaʻi mai iā te ia.+
11 E oo lava i agaga leaga,+ o so o se mea lava e iloa ai o ia, latou te faapaʻuʻū faō ai i ona luma ma alalaga mai: “O oe lava o le Alo o le Atua.”+
12 Ae ua ia matuā vavao soo atu iā i latou e aua le faailoaina atu o ia.+
13 Ua maliu aʻe o ia i le mauga, ma valaau atu iā i latou ua ia finagalo i ai,+ ona latou ō atu ai lea iā te ia.+
14 Ua ia filifilia foʻi tane e toʻasefulu lua, o ē ua ia taʻua o “aposetolo” ina ia latou faatasi pea ma ia, ma aauina atu i latou e talaʻi+
15 ma tuuina atu iā i latou le pule e tutuli ai temoni.+
16 O tane e toʻasefulu lua ua ia filifilia, o Simona o lē ua ia faaigoa foʻi iā Peteru,+
17 o Iakopo le atalii o Sepetaio ma Ioane le uso o Iakopo,+ (o ē ua ia faaigoa foʻi iā Poaneki, o lona uiga o Atalii o le Faititili)
18 o Aneterea ma Filipo, o Patolomaio ma Mataio, o Toma ma Iakopo le atalii o Alefaio, o Tataio ma Simona le Kanana*
19 ma Iuta le Sekara, o lē na faalataina o ia mulimuli ane.+
Ona alu atu lea o ia i le fale.
20 Ona toe potopoto mai foʻi lea o le toʻatele o tagata, ua lē mafai ai ona latou aai.+
21 Ua faalogo lona aiga+ i le mea ua tupu, ona ō mai lea e mananaʻo e puʻe iā te ia, auā ua latou faapea ane: “Ua faalētonu lona mafaufau.”+
22 Ua faapea ane foʻi tusiupu ua ō mai mai Ierusalema: “Ua iā te ia Pelesepulo le pule o temoni, lea ua mafai ai ona ia tutuli temoni.”+
23 Ua ia valaau atu iā i latou ia ō mai iā te ia, ona ia fetalai atu lea i talafaatusa e faapea: “E faapefea ona tuliese e Satani Satani?
24 Auā afai e fevaevaeaʻi se malo, e lē mafai ona tumau o lenā malo.+
25 Afai e fevaevaeaʻi se aiga, e lē mafai ona tumau o lenā aiga.+
26 Afai foʻi e tetee Satani iā te ia lava ma fevaevaeaʻi ai, e lē mafai ona tumau o ia, ae oo i lona iʻuga.+
27 O le mea moni, e leai se tasi e alu atu i le fale o se tagata malosi e mafai ona ia faoa+ ana meatotino, seʻi vaganā ua fusifusia muamua lea tagata malosi, ona faatoʻā mafai lea ona ia faoa ana mea mai lona fale.+
28 E moni ou te fai atu iā te outou, e faamagaloina lava agasala uma a le fanau a tagata, atoa ma upuleaga ua latou upuleaga ai.+
29 Peitaʻi, o se tasi e fai upuleaga i le agaga paia, e lē faamagaloina lava o ia e faavavau, ae e nofosala o ia e faavavau i lenā agasala.”+
30 Ua ia faapea atu, auā na latou fai mai: “Ua iā te ia le agaga leaga.”+
31 Ua ō mai lona tinā ma ona uso+ ma ua tutū mai i fafo, ona latou feʻau atu lea iā te ia e sau.+
32 Peitaʻi, o loo siʻosiʻomia o ia e le motu o tagata. O lea, ua latou faapea ane ai iā te ia: “Faauta! O lou tinā ma ou uso la e i fafo, o loo saʻili iā te oe.”+
33 A ua tali atu o ia: “O ai ea loʻu tinā, ma o ai foʻi oʻu uso?”+
34 Ua vaavaai solo o ia iā i latou o loo siʻosiʻomia o ia ma faapea atu: “Vaai, o loʻu tinā ma oʻu uso ia!+
35 O lē e faia le finagalo o le Atua, o ia lenā o loʻu uso, o loʻu tuafafine, ma o loʻu tinā.”+
Faamatalaga Pito i Lalo
^ Po o “Simona le tagata maelega.”
