Mareko 5:1-43
5 Ua latou ō atu i le isi itu o le sami i laufanua o Kerekese.+
2 Ua maliu ese o ia mai le vaa, ona sau ai loa lea iā te ia o se tamāloa mai le fanuatanu, o lē ua pulea e agaga leaga.+
3 Ua nofo o ia i tuugamau, ma e oo ane i le taimi lenā, e leai lava se tagata ua mafai ona saisaia o ia i filifili,
4 auā sa masani ona saisai o ia i mea e faamau ai vae ma filifili, ae sa ia motusia filifili ma talepe mea e noanoa ai vae, e leai foʻi se tagata malosi ua mafai ona puʻe iā te ia.
5 Ua alaga pea o ia i pō ma ao i tuugamau ma mauga, ma selei iā te ia i maa.
6 Peitaʻi, ina ua ia iloa mamao mai Iesu, ona tamoʻe mai lea ma ifo iā te ia,
7 ma ua alaga mai o ia ma le leotele,+ ua faapea mai: “O oe na le Alo o le Atua Silisili Ese,+ aiseā ua e faalavelave mai ai iā te aʻu? Ou te fai atu iā te oe, ia e tautō+ mai i le Atua e te lē faapuapuagatiaina aʻu.”+
8 Auā ua ia fetalai atu i le agaga leaga: “Ia e alu i fafo mai i le tamāloa, o oe lenā le agaga leaga.”+
9 Ae ua ia fesili atu: “O ai lou igoa?” Ua tali mai o ia: “O loʻu igoa o Lekeono,+ auā e toʻatele i matou.”+
10 Ua ia ʻaiʻoi mai pea iā te ia e aua neʻi auina ese atu agaga mai i le atunuu.+
11 O le taimi lea o loo aai se lafu puaa+ tele i le mauga.+
12 O lea, ua latou ʻaiʻoi mai ai iā te ia: “Ia e auina atu i matou i puaa, ina ia matou uluitino i ai.”
13 Ua ia tuu atu i latou e ō. Ona ō mai ai lea o agaga leaga i fafo ma uluitino i le lafu puaa; ona taufetuli atu ai lea o le lafu puaa i le tofē ma feosofi i le sami, pe tusa ma le lua afe o puaa, ma ua taʻitasi ma malemo ai i le vai.+
14 Ona sosola ai lea o ē na tausia le lafu, ma logo atu mea uma i le aai ma le nuu atoa; ua ō mai tagata e vāai i le mea na tupu.+
15 Ua latou ō mai iā Iesu, ma iloa atu ai le tamāloa sa uluitinoina e temoni, o loo nofo ma ua fai ona ofu, ua toe lelei lona mafaufau. O le tamāloa lenei sa iai le lekeono;* ma ua matataʻu ai i latou.
16 O ē na vāai i lenā mea, ua latou faamatala atu iā i latou le mea na tupu i le tamāloa na uluitino e temoni ma le lafu puaa.
17 Ona latou ʻaiʻoi mai lea iā te ia ina ia maliu ese atu mai i lo latou itumalo.+
18 A o maliu mai o ia i luga o le vaa, ua ʻaiʻoi mai le tamāloa na uluitino e temoni, pe mafai ona la ō faatasi pea ma ia.+
19 Ae peitaʻi, ua ia vavao iā te ia ma fetalai atu: “Ia e alu i lou fale i lou aiga,+ ma faamatala atu iā i latou mea uma ua faia e Ieova+ mo oe, ma lona alofa mutimutivale+ iā te oe.”
20 Ona alu lea o ia ma faailoa atu i Tekapoli+ mea uma na faia e Iesu iā te ia, ma ua maofa ai tagata uma.+
21 Ina ua toe foʻi mai Iesu i le vaa i le isi itu o le vai, ona potopoto mai ai lea o le motu o tagata e toʻatele, a o iai o ia e lata ane i le sami.+
22 Ona sau ai lea o se tasi o pule o le sunako e igoa iā Iairo, ina ua iloa mai o ia, ona ia faapaʻū ai lea i ona vae+
23 ma ʻaiʻoi mai pea iā te ia e faapea: “Ua matuā maʻi tigāina loʻu afafine. Faamolemole, pe e mafai ona e maliu atu ma tuu ou aao+ i luga iā te ia, ina ia toe malosi ma ola ai o ia.”+
24 Ona la ō ai lea. Ae ua mulimuli mai le motu o tagata e toʻatele ma latou fetaomi lava iā te ia.+
25 E iai le fafine ua sefulu lua tausaga+ talu ona maʻi i le punatoto,+
26 ma e tele mea ua tigā ai o ia ona o fomaʻi e toʻatele,+ ua uma ai ana tupe ae e leʻi aogā, a ua atili ai ona tigāina o ia.
27 Ua ia faalogo i mea sa faia e Iesu, ona sau ai lea i tua faatasi ma le motu o tagata, ma ua paʻi+ mai i lona ofu tele;
28 ua faapea ifo o ia: “Afai ou te paʻi atu tau lava o ona ofu tele, ona ou toe malosi ai lea.”+
29 Ona uma ai lea o lona punatoto, ma ua ia lagona i lona tino ua teʻa ese atu lona maʻi sa tigāina ai.+
30 Ina ua lagona e Iesu ua alu ese le mana+ mai iā te ia, ona faliu atu lea o ia ma faapea atu i le motu o tagata: “O ai na paʻi mai i loʻu ofu?”+
31 A ua fai mai ona soo iā te ia: “Ua e silasila atu ea i le motu o tagata o loo fetaomi mai iā te oe,+ a e fai mai ea ‘Po o ai na paʻi mai iā te aʻu?”’
32 Peitaʻi, ua silasila solo o ia po o ai le fafine na paʻi mai iā te ia.
33 A ua iloa e le fafine le mea ua tupu, ua fefe ma tetemū ai, ona ia sau lea ma faapaʻū i ona luma, ma faamatala mai le mea atoa na tupu.+
34 Ua ia fetalai atu iā te ia: “Loʻu afafine e, ua e malosi ona o lou faatuatua. Alu ia ma le filemu,+ ma ia e mālōlō mai lou maʻi tigā.”+
35 A o fetalai atu o ia, ona ō mai ai lea o isi tamāloloa mai le aiga o le pule o le sunako ma faapea mai: “Ua oti lou afafine! Aiseā e toe faalavelave ai i le aʻoaʻo?”+
36 Peitaʻi, ua faafofoga atu foʻi Iesu i le tala, ona fetalai atu lea i le pule o le sunako: “Aua e te fefe, ae ia faatuatua.”+
37 O lea, ua ia vavao ai tagata e aua le mulimuli atu iā te ia seʻi vaganā ai Peteru, Iakopo ma Ioane le uso o Iakopo.+
38 Ua latou taunuu i le fale o le pule o le sunako, ona silafia lea e ia o le lauē ma le tagituʻi o ē ua faavauvau.
39 Ina ua ulufale o ia, ona faapea atu lea iā i latou: “Aiseā ua outou lauē ma tagituʻi ai? E leʻi oti le teine, ae o loo moe o ia.”+
40 Ona toē faaamuamu lea o i latou iā te ia. A ua ia faapea atu ia ō uma i fafo, ona ia ave lea o le tamā ma le tinā o le teine ma ē ua faatasi ma ia, ua latou ō atu i le potu o loo iai le teineitiiti.+
41 Ua ia tago atu i le lima o le teineitiiti, ma fetalai atu: “Talita kumi,” o lona uiga pe a faaliliuina: “Le tamaʻitaʻi e, ou te fai atu iā te oe, Inā tū ia i luga!”+
42 Ona tulaʻi loa lea o le teineitiiti ma amata ona savali, ma e sefulu lua foʻi ona tausaga. Ona matuā olioli ai lea o i laʻua.+
43 Peitaʻi, ua ia toe faatonuina pea i latou, ina ia aua neʻi iloa+ e se tasi lea mea, ma ua ia faapea atu, e tatau ona avatu se meaʻai ma le teineitiiti.
Faamatalaga Pito i Lalo
^ O le “lekeono,” o le vaega autū lea o le ʻautau a Roma i aso anamua. O loo faasino atu i se aofaʻiga e matuā toʻatele.
