Mataio 2:1-23
2 Ina ua mavae le fanau mai o Iesu i Peteleema+ i Iutaia, i ona pō o le tupu o Herota,+ ona ō mai ai lea o ē e saʻiliʻili i fetu*+ mai sasaʻe i Ierusalema,
2 ua faapea mai: “Po o fea o iai lē ua fanau mai o le tupu+ o tagata Iutaia? Auā na matou vaaia lona fetu+ a o matou iai i sasaʻe, ma ua matou ō mai ai e ifo atu iā te ia.”
3 Ua faalogo le tupu o Herota i lenei tala, ona popole ai lea o ia, atoa ma Ierusalema uma;
4 ona ia faapotopoto lea o le ʻaufaitaulaga sili ma le ʻautusiupu* o le nuu, ma fesili atu iā i latou po o fea e fanau ai le Keriso.
5 Ona latou fai mai lea iā te ia: “O Peteleema+ i Iutaia; auā o le mea lenā ua tusia e le perofeta,
6 ‘O oe Peteleema+ i le atunuu o Iuta, e lē o oe o le aai e pito i faatauvaa i kovana o Iuta; auā e tupu mai iā te oe o lē e pule,+ o lē e na te leoleoina+ loʻu nuu o Isaraelu.’”
7 Ua aami faalilolilo e Herota o ē e saʻiliʻili i fetu, ina ia faamautinoa ai le taimi tonu na latou vaaia ai le fetu;
8 ona ia auina atu lea o i latou i Peteleema, ma faapea atu: “Ia outou ō ma matuā saʻili i le tamaitiiti, a outou maua, ia toe foʻi mai e taʻu mai iā te aʻu, o aʻu foʻi ou te fia alu atu e ifo iā te ia.”+
9 Ua latou faalogo i le tupu, ona latou ō ai lea; faauta foʻi! o le fetu na latou vaaia a o iai i sasaʻe,+ o lea ua muamua atu iā i latou, seʻia oo ina tū i luga aʻe o le mea ua iai le tamaitiiti.
10 Ua latou vaaia le fetu, ona matuā olioli ai lea o i latou.
11 Ua latou ō atu i le fale, ma ua vaaia ai le tamaitiiti ma Maria lona tinā, ona latou faapaʻuʻū ai lea ma ifo atu i ai. Ua talai foʻi a latou oloa ma avatu meaalofa o auro, o mea manogi ma muro.*
12 Ae peitaʻi, ua lapataʻia i latou e le Atua+ i se miti, ina ia aua neʻi toe foʻi atu iā Herota, ona latou ō ai lea i lo latou atunuu i se isi auala.
13 Ua ō i latou, faauta! ua faaali mai le agelu+ a Ieova iā Iosefa e ala i se miti, ua ia faapea mai: “Inā tulaʻi ia ma ave le tamaitiiti ma lona tinā ma sosola i Aikupito, ma nonofo ai seʻia ou toe fai atu; auā o loo saʻili Herota e fasioti i le tamaitiiti.”
14 Ona ia tulaʻi lea ma ave le tamaitiiti ma lona tinā i le pō, ma ō atu i Aikupito,
15 ua ia nofo ai i inā seʻia mavae le oti o Herota, ina ia taunuu+ ai le afioga a Ieova e ala i lana perofeta e faapea: “Na ou valaauina loʻu atalii mai Aikupito.”+
16 Ua iloa e Herota ua pelogia o ia e ē saʻiliʻili i fetu, ona matuā ita tele ai lea o ia, ma aauina atu nisi i Peteleema ma ona itumalo uma, e fasioti i tama uma e lua tausaga ma ē e lāiti ifo, e fua i le taimi na taʻu mai e ē saʻiliʻili i fetu.+
17 Ua faataunuuina ai i inā le valoaga a le perofeta o Ieremia e faapea:
18 “Ua lagona le leo i Rama,+ o le tagiauē ma le tagituʻi; ua tagiauē Rasela+ ona o lana fanau. Ua lē mafai foʻi ona faamāfanafanaina o ia, auā ua lē toe iai i latou.”
19 Ua oti Herota, faauta! ua faaali mai le agelu a Ieova i se miti+ iā Iosefa a o iai i Aikupito,
20 ma fai mai: “Tulaʻi ia, inā ave le tamaitiiti ma lona tinā ma toe foʻi atu i Isaraelu, auā ua feoti i latou na saʻili e fasioti i le tamaitiiti.”
21 Ona tulaʻi lea o ia ma ave le tamaitiiti ma lona tinā ma ō atu i Isaraelu.
22 Ae ina ua faalogo ua pule Arekilao e fai ma tupu i Iutaia e sui i lona tamā o Herota, ona fefe ai lea o ia e alu atu i inā. Talu ai na lapataʻia o ia e le Atua i se miti,+ ona alu ai lea o ia i Kalilaia.+
23 Ua alu atu o ia ma nofo i le aai ua igoa o Nasareta,+ ina ia taunuu ai le upu ua fetalaia mai e ala i perofeta: “E taʻua o ia o le Nasareta.”+
Faamatalaga Pito i Lalo
^ Po o “makoi” e mai i le upu Eleni, o le maʹgoi.
^ O le ʻaufaaliliu ma faiaʻoga o le Tulafono i taimi o Iesu.
^ O se pauta e manaia lona manogi.
