Mataio 20:1-34
20 “Ua faatusaina le malo o le lagi i se matai o le aiga, o lē na usu atu i le taeaopō e saʻili ni tagata e faafaigaluega i lona togāvine.+
2 Na ia aauina atu i latou i le togāvine, ina ua malilie faatasi ma le ʻaufaigaluega, e galulue mo le tenari i le aso.+
3 Ina ua toe alu atu i le itula e tolu,*+ na ia vaaia ai ni tagata e lē o faia ni galuega o loo tutū i le maketi;+
4 ona ia fai atu lea iā i latou, ‘Ia outou ō atu foʻi i loʻu togāvine, ma ou te avatu iā te outou le totogi e tatau ai.’
5 Ona latou ō ai lea. Na ia toe alu atu i le itula e ono*+ ma le itula e iva*+ ma faia foʻi faapea.
6 Ona ia alu atu ai lea pe tusa o le itula e sefulu tasi,* ma maua atu ai foʻi isi o loo tutū mai, ona ia fai atu lea iā i latou, ‘O le ā le mea ua outou tutū ai i le aso atoa ae leai ni a outou galuega e fai?’
7 Ona latou fai mai lea iā te ia, ‘Auā e leai se isi e faafaigaluegaina i matou.’ Ona ia fai atu lea, ‘Ia outou ō atu foʻi i le togāvine.’+
8 “Ina ua oo i le afiafi,+ ona fai atu ai lea o lē e ana le togāvine i lē e pule i lana ʻaufaigaluega, ‘Ia valaau atu i le ʻaufaigaluega ma avatu o latou totogi,+ e amata i ē na mulimuli e oo i ē na muamua.’
9 Ina ua ō mai tamāloloa na amata i le itula lona sefulu tasi, na tofu i latou ma le tenari.
10 Ae ina ua ō mai i latou na muamua, na latou manatu e sili atu se mea latou te maua, ae na latou maua foʻi le totogi o le tenari e tasi.
11 Ina ua maua le tenari, ona latou muimui ai lea i lē e ana le togāvine+
12 ma faapea mai, ‘E na o le tasi le itula na galulue ai i latou na mulimuli mai, ae ua tutusa o matou totogi e ui ua alu le aso atoa o matou tigāina i le vevela o le lā!’
13 Ae na tali atu o ia i le tasi o i latou, ‘Sole, e leai se mea sesē ua ou faia iā te oe, pe ta te leʻi malilie faatasi ea i le tenari e tasi?+
14 Ia tago loa i lou totogi ma e alu. Ou te manaʻo e avatu i lenei tagata mulimuli le totogi na ou avatu foʻi iā te oe.+
15 Pe e faasā ona ou pule i le mea e fai i aʻu lava mea? Po ua e lotoleaga*+ ea ina ua ou agalelei?’+
16 O lenei, o ē e mulimuli e avea ma ē e muamua, ma o ē e muamua e avea ma ē e mulimuli.”+
17 A o agaʻi aʻe i Ierusalema, ona ave ai lea e Iesu o ona soo e toʻasefulu lua+ ua na o i latou, ua faapea atu o ia iā i latou i le ala:
18 “Faauta! O le a tatou ō aʻe i Ierusalema, ma e tuuina atu ai le Atalii o le tagata i le ʻaufaitaulaga sili ma le ʻautusiupu, ma latou te faasalaina o ia i le oti,+
19 e latou te tuuina atu foʻi o ia i tagata o nuu ese, latou te tauemu, ma sasa tigāina, ma tutuʻi o ia i luga o le laau,+ ae e toe faatūina o ia i le aso lona tolu.”+
20 Ona faalatalata mai lea o le tinā o atalii o Sepetaio+ faatasi ma lana fanau tama, ua ifo ma talosaga mai mo se mea mai iā te ia.+
21 Ua ia fetalai atu iā te ia: “O le ā se mea e te manaʻo i ai?” Ua fai mai o ia: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou malo.”+
22 Ona tali atu lea o Iesu: “Lua te lē iloa le mea ua oulua talosaga mai ai. Pe e mafai ea ona oulua inu i le ipu+ lea ua toeitiiti oʻu inu ai?” Ua la fai mai iā te ia: “E ma te mafaia.”
23 Ua ia fetalai atu iā i laʻua: “Lua te inu lava i laʻu ipu,+ ae ou te lē pule po o ai e nofo i loʻu itu taumatau ma loʻu itu tauagavale, ae e maua lenā tulaga e i latou ua saunia i ai e loʻu Tamā.”+
24 Ua faalogo i ai le isi toʻasefulu i lenei mea, ona feita ai lea o i latou i lea ʻauso e toʻalua.+
25 A ua valaau atu Iesu iā i latou e ō mai iā te ia ma faapea atu: “Tou te iloa o taʻitaʻi o malo e pulepuletutū i tagata, o ē ua sili foʻi ua pule iā i latou.+
26 Ae e lē faapena outou;+ o sē e fia sili iā te outou e tatau ona avea o ia ma a outou auauna,+
27 ma o sē e fia muamua iā te outou, e tatau ona avea o ia ma a outou pologa.+
28 Auā e leʻi sau le Atalii o le tagata ina ia auauna mai tagata iā te ia, ae ia auauna atu,+ ma foaʻi atu lona ola e fai ma togiola e sui aʻi tagata e toʻatele.”+
29 A o tuua e i latou Ieriko,+ ua mulimuli atu le motu o tagata e toʻatele iā te ia.
30 Faauta! o loo nonofo ni tamāloloa tauaso se toʻalua i tafatafa o le auala, ma ua la faalogo ua maliu ane Iesu, ona la alalaga mai lea: “Le Alii e, le Alo o Tavita, ia e alofa* mai iā i maʻua!”+
31 A ua matuā fai atu le motu o tagata iā i laʻua e aua le pisa; ae ua atili ai ona alalaga ma faapea mai: “Le Alii e, le Alo o Tavita, ia e alofa* mai iā i maʻua!”+
32 Ona tū lea o Iesu ma valaau atu iā i laʻua ma faapea atu: “O le ā se mea lua te mananaʻo ou te faia mo oulua?”
33 Ua la faapea mai iā te ia: “Le Alii e, seʻi e faapupulaina o maʻua mata.”+
34 Ua mutimutivale le alofa o Iesu ma ua papaʻi atu i o la mata,+ ona pupula ai loa lea o i laʻua ma ua mulimuli mai iā te ia.+
Faamatalaga Pito i Lalo
^ “Itula e tolu” pe tusa o le tā o le 9 i le taeao.
^ “Itula e ono” pe tusa o le tā o le 12 i le aoauli.
^ “Itula e iva” pe tusa o le tā o le 3 i le afiafi e amata mai i le oso aʻe o le lā.
^ “Itula e sefulu tasi” pe tusa o le tā o le 5 i le afiafi.
^ I le gagana Eleni, “pe e amioleaga ou mata?”
^ Pe “ia e alofa mutimutivale mai.”
^ Pe “ia e alofa mutimutivale mai.”
