Mataio 26:1-75
26 Ua uma ona fetalai atu Iesu i nei upu, ona ia faapea atu lea i ona soo:
2 “Ua outou iloa ua toe lua aso ona oo lea i le paseka,+ ma e tuuina atu ai le Atalii o le tagata ina ia tutuʻi i luga o le laau.”+
3 O le taimi lea ua faapotopoto ai le ʻaufaitaulaga sili, ma toeaina o le nuu i le lotoā o le ositaulaga sili o lē ua igoa iā Kaiafa,+
4 ma taupulepule+ e fai se togafiti ina ia puʻe ai Iesu ma fasiotia.
5 Peitaʻi, ua latou faapea atu: “Aua le faia i le tausamiga ina neʻi vevesi tagata.”+
6 A o iai Iesu i Petania+ i le fale o Simona le lepela,+
7 ona sau ai lea o se fafine ma se fagu alapasa ua iai le suāuu manogi taugatā,+ ma liligi i lona ao a o taoto o ia e taumafa.
8 Ua vāai atu le ʻausoo i lenei mea, ona feita ai lea ma fai ane: “Aiseā ua maʻimau ai?+
9 Auā e mafai ona faatau atu lenei mea i ni tupe se tele, ma foaʻi atu i tagata matitiva.”+
10 Ua silafia+ e Iesu lenei mea, ona faapea atu lea iā i latou: “Aiseā e tou te faalavelave ai i le fafine? Auā o se gaoioiga lelei lea ua ia faia mai iā te aʻu.+
11 Auā tou te faatasi pea ma tagata matitiva,+ ae tou te lē faatasi pea ma aʻu.+
12 Auā ina ua uu e lenei fafine loʻu tino i le suāuu manogi, ua ia saunia ai loʻu tino mo loʻu tanuga.+
13 E moni ou te fai atu iā te outou, Po o fea lava i le lalolagi e talaʻiina ai lenei tala lelei, e taʻua ai foʻi ma le mea na faia e lenei fafine, e faamanatu ai iā te ia.”+
14 Ona alu atu lea o le tasi o le toʻasefulu lua, e igoa iā Iuta le Sekara+ i le ʻaufaitaulaga sili,
15 ma faapea atu: “E fia se mea tou te aumaia iā te aʻu ou te faalataina ai o ia iā te outou?”+ Ona latou lotomalilie lea e avatu iā te ia le tolu sefulu tupe siliva.+
16 Ona amata mai ai lea i lenā lava aso, ona ia saʻili se avanoa lelei e faalataina ai o ia.+
17 I le aso muamua o le tausamiga o falaoa e lē faafefeteina,+ ua ō mai ai soo iā Iesu ma faapea mai: “O fea e te finagalo matou te saunia e te taumafa ai le paseka?”+
18 Ua ia faapea atu: “Ia ō atu i le aai i le tasi tagata+ ma fai atu i ai, Ua fai mai le Aʻoaʻo, ‘Ua lata mai loʻu taimi ua atofaina; ou te faamanatuina ai le paseka ma oʻu soo i lou fale.’”+
19 Ona faia lea e le ʻausoo e pei ona faatonuina atu e Iesu iā i latou, ma ua latou saunia mea mo le paseka.+
20 Ua oo i le afiafipō,+ ua taoto o ia e aai faatasi ma ona soo e toʻasefulu lua.+
21 A o latou aai, ua fetalai atu o ia: “E moni ou te fai atu iā te outou, E iai se tasi o outou e na te faalataina aʻu.”+
22 Ona o le matuā tigā i lenei mea, ua latou taʻitasi ma fesili mai iā te ia: “Le Alii e, o aʻu ea?”+
23 Ua ia tali atu: “O lē e loiloi faatasi a ma falaoa i le ipu, o ia lenā e faalataina aʻu.+
24 E moni, e pei ona tusia+ e faatatau iā te ia, e alu lava le Atalii o le tagata, a o lē na te faalataina le Atalii o le tagata,+ oi talofa+ iā te ia! Sa sili ai pe ana lē fanau mai o ia.”
25 Ona tali mai lea o Iuta, o lē ua toeitiiti ona ia faalataina lea o ia, e faapea: “Le Aʻoaʻo e, o aʻu ea?” Ua fetalai atu o ia: “O lenā tonu lava ua e tali mai ai.”
26 A o latou aai, ona tago lea o Iesu i le areto,+ ua faia le faafetai, ona ia vaevae+ lea ma avatu i ona soo, ma faapea atu: “Ia outou aai. Auā o le faatusa lenei o loʻu tino.”+
27 Ua ia tago foʻi i le ipu,+ ua faia le faafetai, ma avatu iā i latou, ua faapea atu: “Inā inu ia outou uma i ai;+
28 auā o le faatusa+ lenei o loʻu toto o le ‘toto+ o le feagaiga,’+ e faamaligiina mo tagata e toʻatele+ e faamagalo ai agasala.+
29 Ae ou te fai atu iā te outou, Ou te lē toe inu i lenei uaina, seʻia oo i le aso ou te inu faatasi ai ma outou i le uaina fou i le malo o loʻu Tamā.”+
30 Mulimuli ane, ina ua uma ona usu o viiga,+ ona latou ō atu lea i le Mauga o Olive.+
31 Ua fetalai atu Iesu iā i latou: “Tou te tuua* aʻu i lenei pō, auā ua tusia, ‘Ou te taia le leoleo mamoe ona taapeape ai lea o le lafu mamoe.’+
32 Peitaʻi, pe a mavae loʻu toetū, ona ou muamua atu lea iā te outou i Kalilaia.”+
33 Ae ua tali mai Peteru iā te ia: “E tusa lava pe tuua oe e i latou uma, ae ou te lē tuua lava oe!”+
34 Ua fetalai atu Iesu iā te ia: “E moni, ou te fai atu iā te oe, I le pō lava lenei a o leʻi vivini le moa, ae o le a faatolu ona e faafiti iā te aʻu.”+
35 Ua fai mai Peteru iā te ia: “E tusa lava po ou te oti faatasi ma oe, ou te lē faafitia lava oe.” Ua fai mai foʻi faapena isi soo uma.+
36 Ona latou ō atu lea ma Iesu i le mea+ ua taʻua o Ketesemane, ma ua ia faapea atu i ona soo: “Ia outou nonofo atu i inei, ae seʻi oʻu alu i o ou te tatalo ai.”+
37 Ua ia ave Peteru ma atalii e toʻalua+ o Sepetaio, ua amata ona tigā lona finagalo, ma ua matuā atuatuvale lava.+
38 Ona ia fetalai atu lea iā i latou: “Ua ou matuā tigā lava e oo i le oti.+ Ia outou nonofo i inei ma ia faaauau ona mataala faatasi ma aʻu.”+
39 Ua maliu teisi atu o ia i luma, ua faapaʻū faō ma tatalo+ atu e faapea: “Loʻu Tamā e, afai e mafai, ia aveese lenei ipu+ iā te aʻu. Ae aua le faia loʻu loto+ a o lou finagalo.”+
40 Ua sau o ia i ona soo, ua maua i latou o momoe, ona ia fetalai atu lea iā Peteru: “Pe e tou te lē mafai ea ona mataala faatasi ma aʻu i se itula e tasi?+
41 Ia faaauau ona mataala+ ma tatalo+ e lē aunoa, ina ia aua neʻi outou lolo atu i faaosoosoga.+ Ua naunau i ai le loto,* a ua vaivai le tino.”+
42 Ua toe maliu faalua+ atu foʻi o ia ma tatalo atu e faapea: “Loʻu Tamā e, afai e lē mafai ona aveese lenei ipu seʻi vaganā ua ou inu ai, ia faia lou finagalo.”+
43 Ua toe maliu ane o ia ma maua i latou ua momoe auā ua vaivai.+
44 Ua ia tuua i latou, ma toe maliu ese ma o le faatolu+ ai lea ona tatalo atu i upu lava na.
45 Ona maliu atu lea o ia i le ʻausoo ma faapea atu: “Aiseā ua outou momoe ai ma mālōlō i lenei taimi? Faauta! Ua oo mai le itula e faalataina ai le Atalii o le tagata, ma tuuina atu i tagata agasala.+
46 Inā tutū ia i luga ma tatou ō. Faauta! Ua latalata mai lē na te faalataina aʻu.”+
47 A o fetalai o ia, faauta! ua sau Iuta,+ o le tasi o le toʻasefulu lua, faatasi ma le motu o tagata ma a latou pelu+ ma pouvai mai le ʻaufaitaulaga sili ma toeaina o le nuu.+
48 Ua uma ona tuuina e lē na te faalataina o ia le faailoga iā i latou e faapea: “O lē ou te sogi i ai, o ia lenā; ia outou puʻe iā te ia.”+
49 Ona savali saʻo mai lea o ia iā Iesu ma faapea mai: “Malo lava iā te oe le Aʻoaʻo e!”*+ ma sogi+ lemū mai iā te ia.
50 A ua fetalai atu Iesu+ iā te ia: “Sole, o le ā le mea ua e sau ai?” Ona latou fetagofi atu lea ma puʻe iā Iesu.+
51 Faauta, ua iai se tasi ua faatasi ma Iesu, ua tago o ia i lana pelu ua seʻi, ma tā ai le pologa a le ositaulaga sili, ma tipiesea ai lona taliga.+
52 Ona fetalai atu lea o Iesu iā te ia: “Ia toe sulu lau pelu i lona faamoega,+ auā o i latou uma e tago i le pelu, e faaumatia i le pelu.+
53 Pe e te manatu e lē mafai ona ou ʻaiʻoi atu i loʻu Tamā, ia aauina mai loa iā te aʻu i le taimi nei le sili atu ma le sefulu lua o lekeono o agelu?+
54 Afai o lea, e faapefea la ona faataunuuina o mea ua tusia i Tusitusiga Paia e tatau ona tutupu?”
55 Ona fetalai atu lea o Iesu i lenā taimi i le motu o tagata: “Po ua outou ō mai ea ma a outou pelu ma pouvai e puʻe iā te aʻu, e pei o se tagata faomea?+ O aso taʻitasi na ou nofo ai i le malumalu+ ma aʻoaʻo atu, ae tou te leʻi puʻeina aʻu.
56 Ae ua oo nei mea uma ina ia taunuu ai tusitusiga a le ʻauperofeta.”+ Ona tuua lea o ia e ona soo uma ma latou sosola.+
57 Ona ō atu lea o ē na puʻeina Iesu ma taʻitaʻi atu o ia iā Kaiafa+ le ositaulaga sili, ma o i inā ua potopoto faatasi ai le ʻautusiupu ma le ʻautoeaina.+
58 A ua mulimuli mamao mai Peteru iā te ia, ua oo i le lotoā+ o le ositaulaga sili ma ua ulu atu i ai, ua nofo o ia faatasi ma auauna o le fale ina ia iloa po o le ā le iʻuga.+
59 O le taimi foʻi lea ua saʻilia ai e le ʻaufaitaulaga sili ma alii uma o le Faamasinoga Sili, ni molimau pepelo iā Iesu ina ia mafai ona faasalaina ai o ia i le oti,+
60 ae e leʻi maua lava e ui ina toʻatele molimau pepelo na ō mai.+ Mulimuli ane, ona ō mai ai lea o isi molimau e toʻalua
61 ma faapea mai: “Na fai mai lenei tagata, ‘E mafai ona ou tala i lalo le malumalu o le Atua ma toe fausia i aso e tolu.’”+
62 O lea, ua tulaʻi ai le ositaulaga sili ma faapea mai iā te ia: “E te lē tali mai ea? O le ā lenei mea ua molia ai oe e nei tagata?”+
63 Ae ua lē tali atu Iesu.+ Ona faapea mai lea o le ositaulaga sili iā te ia: “Ou te fai atu iā te oe, ia e tautō+ i le Atua soifua e te tautala i le mea moni, ma taʻu mai iā i matou po o oe o le Keriso,+ le Alo o le Atua!”
64 Ua fetalai atu Iesu+ iā te ia: “O lenā tonu lava ua e tali mai ai.+ Ae ou te fai atu iā te outou, O le a outou+ vāai i le Atalii o le tagata+ o loo nofo i le itu taumatau+ o Lē e Malosi, ma e sau foʻi o ia i ao o le lagi.”+
65 Ona saeia lea e le ositaulaga sili o ona ofu tele ma faapea ane: “Ua upuleaga o ia i le Atua!+ O le ā le aogā o nisi molimau+ iā i tatou? O lenā ua outou faafofoga i ana upuleaga i le Atua.+
66 O le ā so outou finagalo?” Ua latou tali ane: “E tatau ona oti o ia.”+
67 Ona latou tuufeanu lea i ona fofoga+ ma tatuʻi+ iā te ia. Ua tapō foʻi e isi ona fofoga,+
68 ma fai mai: “Le Keriso e,+ afai o oe o se perofeta, ia taʻu mai iā i matou po o ai na pō atu iā te oe?”+
69 O le taimi lea o loo nofo ai Peteru i fafo i le lotoā, ma ua alu atu se auauna teine ma faapea atu: “O oe foʻi lenā, sa oulua faatasi ma Iesu le Kalilaia!”+
70 Ae ua ia faafiti i o latou luma ma faapea ane: “Ou te lē iloa le mea o e fai mai ai.”
71 Ua alu atu o ia i le faapaologa o le faitotoʻa, ua mātauina o ia e se isi foʻi teine ma ua ia faapea atu i ē ua iai i inā: “Sa faatasi lenei tagata ma Iesu le Nasareta.”+
72 Ua toe faafiti foʻi o ia ma tautō ane: “Ou te lē iloa lenā tagata!”+
73 E leʻi leva lava, ae ō ane ē ua tutū mai ma faapea atu iā Peteru: “E moni, o oe o se tasi o i latou, auā e iloa i lau gagana.”+
74 Ona ia tautō lea ma fai atu ma le maumauaʻi: “Ou te lē iloa lava lenā tagata!” Ona vivini loa lea o le moa.+
75 Ua manatua ai e Peteru le fetalaiga a Iesu: “E te faafiti faatolu iā te aʻu a o leʻi vivini le moa.”+ Ona alu lea o ia i fafo ma tagi masūsū.+
Faamatalaga Pito i Lalo
^ I le gagana Eleni, “tou te tausuai ona o aʻu.”
^ Po o le “agaga.” Tagaʻi i le Faaopoopoga e 5.
^ I le gagana Eleni, o “Rapi” po o se faiaʻoga.
