Mataio 5:1-48
5 Ua silasila atu o ia i le motu o tagata, ona maliu aʻe ai lea i le mauga, ua nofo i lalo, ona ō atu ai lea iā te ia o ona soo.
2 Ua fetalai atu o ia ma aʻoaʻo atu iā i latou e faapea:
3 “E fiafia o ē e naunau i mea faaleagaga,*+ auā e fai mo i latou le malo o le lagi.+
4 “E fiafia o ē e faanoanoa, auā e faamāfanafanaina+ i latou.
5 “E fiafia o ē e agamalu,+ auā e fai mo latou tofi le lalolagi.+
6 “E fiafia o ē e fia aai ma fia inu+ i le amiotonu, auā e maoona i latou.+
7 “E fiafia o ē e alolofa mutimutivale,+ auā e faaalia i ai le alofa mutimutivale.
8 “E fiafia o ē e lotomamā,+ auā e latou te iloa atu le Atua.+
9 “E fiafia o ē e faatupuina le filemu,+ auā e taʻua i latou o ‘atalii+ o le Atua.’
10 “E fiafia o ē e sauāina+ ona o le amiotonu, auā e fai mo i latou le malo o le lagi.
11 “E fiafia outou pe a upuleagaina,+ sauāina,+ ma tuuaʻia pepelo outou i mea leaga uma ona o aʻu.
12 Ia outou olioli ma fiafia,+ auā o loo i le lagi lo outou taui+ e tele; auā na faapena foʻi ona latou faasauā i perofeta+ o ē na muamua atu iā te outou.
13 “O outou o le masima+ o le lalolagi; ae afai e magalo le masima, e faapefea ona toe faamāi? E leai se mea e toe aogā i ai, ua na ona lafo i fafo+ ma solia e tagata.
14 “O outou o le malamalama o le lalolagi.+ E lē mafai ona lilo le aai pe a tū i luga o le mauga.
15 Pe a tutu e tagata le molī ma tuu i luga o le tuugāmolī ae lē i lalo o se ato e fua ai mea,+ ona susulu atu ai lea i ē uma o i le fale.
16 Ia faapea foʻi ona susulu atu lo outou malamalama+ i luma o tagata, ina ia latou iloa a outou galuega lelei+ ma vivii+ atu ai i lo outou Tamā o i le lagi.
17 “Aua neʻi outou manatu ua ou sau e faalēaogā le Tulafono+ po o le ʻau Perofeta. Ou te leʻi sau e faalēaogā, ae ia faataunuuina.+
18 E moni ou te fai atu iā te outou, e faigofie ona mavae+ atu le lagi ma le lalolagi, ae e faigatā ona mavae atu se mataʻitusi* po o sina vaega o le Tulafono, seʻia taunuu mea uma.+
19 O lea, o sē na te solia+ se poloaʻiga e aupito itiiti o nei poloaʻiga ma faapea foʻi ona aʻoaʻo atu i tagata, e taʻua o ia o lē e ‘faatauvaa’ i le malo o le lagi.+ A o sē na te tausia nei poloaʻiga ma aʻoaʻo+ atu, e taʻua o ia o lē e ‘sili’+ i le malo o le lagi.
20 Auā ou te fai atu iā te outou, afai e lē sili la outou amiotonu i lo le ʻautusiupu ma le ʻau Faresaio,+ tou te lē ulu+ atu lava i le malo o le lagi.
21 “Ua outou faalogo na faapea atu i ē anamua, ‘Aua e te fasioti tagata;+ a o sē e fasioti tagata,+ e nofosala o ia i le faamasinoga.’+
22 Ae ou te fai atu iā te outou, o sē faaauau ona ita+ i lona uso e faasalaina+ o ia i le faamasinoga; ma o sē e upu vale i lona uso e faasalaina o ia i le Faamasinoga Sili; a o sē fai atu, ‘Le tagata valea e, e leai sou aogā,’ e nofosala o ia i le afi i Kena.*+
23 “Pe afai foʻi e te avatu lau taulaga i le fata faitaulaga,+ ona e manatua ai lea o loo iai se mea e lē malie ai lou uso iā te oe,+
24 inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso,+ ona e sau ai lea ma avatu lau taulaga.+
25 “Ia vave ona oulua faalelei ma lē ua molia oe i le tulafono, manū o i le ala oulua, ina neʻi tuuina atu oe e lē ua molia+ oe i le faamasino, ona tuuina atu lea o oe e le faamasino i le leoleo, ma lafo ai oe i le falepuipui.
26 E moni ou te fai atu iā te oe, E te lē magalo lava mai le falepuipui seʻia e totogi atu tupe uma.*+
27 “Ua outou faalogo i nei upu, ‘Aua e te mulilua.’+
28 Ae ou te fai atu iā te outou, ai se tasi e vaavaai pea i se fafine+ ma manaʻonaʻo i ai, ua uma ona mulilua+ ma ia i lona loto.+
29 O lenei, afai e te tausuai ona o lou mata taumatau, ia sali ese ma lafoaʻi.+ Auā e sili ona lelei ona aveese o se vaega o lou tino, nai lo le lafo+ o lou tino atoa i Kena.
30 Afai foʻi e te tausuai ona o lou lima taumatau, inā tipi ese ia ma lafoaʻi.+ Auā e sili ona lelei ona aveese se vaega o lou tino, nai lo le lafo o lou tino atoa i Kena.
31 “E pei foʻi ona taʻua, ‘O sē na te faateʻa+ i lana avā, ia avatu iā te ia se tusi e faamaonia ai ua teteʻa.’*+
32 Ae ou te fai atu iā te outou, o sē e faateʻa i lana avā ae leʻi faitaaga,*+ e ono oo ai ina mulilua+ o ia, ma o sē e faaipoipo atu i le fafine ua faateʻaina, ua mulilua foʻi o ia.+
33 “Ua outou faalogo foʻi na fai atu i ē anamua, ‘Aua e te tautō+ ae e te lē tausisi i ai, ae ia e avatu iā Ieova mea ua e tautō ai.’+
34 Ae ou te fai atu iā te outou, aua neʻi tautō+ i le lagi, auā o le nofoālii lea o le Atua;+
35 po o le lalolagi, auā o le mea lea e tū ai ona aao;+ po o Ierusalema auā o le aai+ lea o le Tupu sili.
36 Aua foʻi neʻi tautō i lou ulu, auā e lē mafai ona e faasinasina pe faauliuli se lauulu e tasi.
37 A ia avea la outou upu o le Ioe, ia Ioe; ma le Leai, ia Leai;+ o ni upu e sili i na upu e mai i lē o leaga.+
38 “Ua outou faalogo ua faapea mai le upu, ‘O le mata e sui ai le mata, ma le nifo e sui ai le nifo.’+
39 Ae ou te fai atu iā te outou: Aua le tetee atu i le tagata amioleaga; ae a pō mai e se tasi lou alafau+ taumatau ia liliu atu i ai le isi.
40 A manaʻo se tasi e ave oe i le faamasinoga ina ia maua lou ofu pito i totonu, ia avatu foʻi i ai ma lou ofu tele;+
41 ma pe a tauanau* oe e se pule lua te ō ma ia i le maila e tasi, inā ō ia ma ia i maila e lua.+
42 Ia e avatu i lē ua talosaga mai iā te oe; aua foʻi e te liliuese i lē ua fia nonō se tupe mai iā te oe, e aunoa ma se pasene.+
43 “Ua outou faalogo ua faapea mai le upu, ‘Ia e alofa atu i lē lua te tuaoi+ ae ʻinoʻino i lou fili.’+
44 Ae ou te fai atu iā te outou: Ia alolofa atu pea i o outou fili+ ma tatalo pea mo ē ua sauāina outou;+
45 ina ia avea ai outou ma atalii o lo outou Tamā o i le lagi,+ o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.+
46 Auā o le ā se taui tou te maua pe afai tou te alolofa atu i ē o alolofa mai iā te outou?+ Pe e lē o le mea foʻi lenā o faia e le ʻauaolafoga?
47 O le ā se mea e sili ua outou faia, pe afai tou te faafeiloaʻia na o o outou uso? Pe e lē o le mea foʻi lenā o faia e tagata o nuu ese?
48 Ia atoatoa ona lelei o la outou amio e pei foʻi o lo outou Tamā o i le lagi, e atoatoa ona lelei o ia.+
Faamatalaga Pito i Lalo
^ Pe e “fiafia o ē e manatu mamafa i o latou manaʻoga faaleagaga.” I le gagana Eleni, “e fiafia o ē e matitiva i le agaga.”
^ Po o se “iota” e mai i le upu Eleni, o le i·oʹta.
^ O le vanu e susunu ai lapisi i tuā pa o Ierusalema. Tagaʻi i le Faaopoopoga e 4.
^ Pe “seʻia e totogi atu tupe uma e oo lava i sene.” I le gagana Eleni, o le “kotane,” o se sene e matuā itiiti lava le aogā. Tagaʻi i le Faaopoopoga e 14.
^ O le upu Peretania, o le divorce. E tusa ai ma le upu Eleni, “o le tatalaina faaletulafono o le faaipoipoga.”
^ O lenei upu o loo faasino atu i feusuaʻiga lē mamā uma lava. Tagaʻi i le Faaopoopoga e 8.
^ I le gagana Eleni, e “faatonu oe e fai se auaunaga.”
