Mika 1:1-16
1 O le afioga a Ieova na oo mai iā Mika+ le Morese, i aso o Iotama,+ o Aasa,+ ma Esekia,+ o tupu ia o Iuta,+ na ia iloa ai i se faaaliga e uiga iā Samaria+ ma Ierusalema:+
2 “Nuu uma e, ia outou faalogo mai; Le lalolagi e, atoa ma mea ua tumu ai,+ ia uaʻi mai, seʻi fai le Alii Pule Silisili Ese o Ieova ma molimau faasaga iā te outou,+ o Ieova lava mai i lona malumalu paia.+
3 Auā faauta! o loo afio mai Ieova mai i lona afioaga,+ e afio ifo o ia ma soli mea maualuluga o le lalolagi.+
4 E liusuavai mauga i lalo iā te ia,+ e māvaevae fanua laugatasi e pei o le gaʻo* ona o le afi,+ e pei foʻi o vai ua tafe ifo i le tofē.
5 “Ua tutupu ia mea uma ona o le fouvalega a Iakopo, ona o agasala foʻi a le aiga o Isaraelu.+ O le ā le fouvalega a Iakopo? Pe e lē o Samaria ea?+ O ā mea maualuluga a Iuta?+ Pe e lē o Ierusalema ea?
6 O le mea lea ou te faia ai Samaria ma faaputuga o mea ua faatafunaina o le fanua,+ ma mea e totō ai togāvine; ou te lafo ifo i le vanu ona maa, ou te faataatia fua ona faavae.+
7 E nutililiia uma ona faatusa ua tā,+ e susunuina i le afi meaalofa uma na avatu iā te ia o se totogi;+ ma ou te faaumatia ana tupua uma. Auā o ia mea uma na maua e Samaria mai i tupe o ana faiga faatalitane, o le a aveese nei ina ia totogi ai fafine talitane i se isi mea.”+
8 O le mea lea ou te tagiauē ai ma uiō;+ ou te savali e leai ni oʻu seevae ma lē lavalavā.*+ Ou te tagiauē e pei o taʻifau o le vao, ma faavauvau e pei o iaena fafine.*
9 Auā e lē toe pē lona manuʻa;+ ona ua oo atu i Iuta,+ ua pāʻia lava le faitotoʻa o loʻu nuu i le mala, e oo atu i Ierusalema.+
10 “Aua neʻi o outou taʻu atu i Kata; aua foʻi neʻi o latou vāai mai o outou fetagisi.+
“Ia taafili i le lefulefu i le ‘fale o Afira.’+
11 Le tama fafine e, o lē e mau i Safiri, inā ui ane ia i le lē lavalavā ma le mā.+ E leʻi alu atu foʻi le tama fafine o loo mau i Saanana. O le tagiauē a Peteseli o le a aveesea ai le nofoaga o sulufaʻiga mai iā te outou.
12 Ua faatalitali le tama fafine o loo mau i Marota mo le mea lelei,+ ae peitaʻi, ua alu ifo le leaga mai iā Ieova i le faitotoʻa o le pā o Ierusalema.+
13 Le tama fafine e, o lē o loo mau i Lakisa,+ inā nonoa ia solofanua i le kariota. Na avea oe ma amataga o le agasala i le tama fafine a Siona.+ Auā ua maua iā te oe le tama fafine a Siona, fouvalega a Isaraelu.+
14 O le mea lea e te avatu ai meaalofa faamavae iā Morese-kato.+ E fai foʻi fale o Akasepa+ ma mea pepelo i tupu o Isaraelu.
15 Le tama fafine e, o lē e mau i Maresa,+ o le a ou avatu iā te oe+ o lē e aveesea meatotino a tagata. E oo atu lava i Atulame+ le mamalu o Isaraelu.
16 Ia tafi lou lauulu ma sele mamā lou ulu ona o ou atalii ua e fiafia i ai.+ Ia tula lou ulu e pei o le aeto, auā ua latou ō ese mai iā te oe, ua ave faapagota i le isi atunuu.”+
Faamatalaga Pito i Lalo
^ O le gaʻo lea e maua mai i lagomeli.
^ Po o “faasausau lona tino.”
^ O se manu e umī lona ua, e iai ona apaʻau ae e lē lele. O le upu Peretania o le ostrich.
