Mika 3:1-12
3 Ona ou fai atu lea: “Faamolemole, ia faalogo mai outou o ulu o le aiga o Iakopo ma outou o taʻitaʻiʻau o le aiga o Isaraelu.+ Pe e lē o la outou tiute tauave ea le iloa o le faamasinotonu?+
2 O outou o ē e ʻinoʻino i mea lelei+ ma o ē e fiafia i mea leaga,+ ua outou saeese o latou paʻu ma o latou aano mai i o latou ponaivi;+
3 ua outou aai foʻi aano o loʻu nuu,+ ua outou saeese o latou paʻu mai iā i latou ma nutililii o latou ponaivi, ma vaevaeina i latou e pei ona vaevaeina o se manu mate ina ia tuu i le ulo e telē le gutu, e pei foʻi o le aano ua tuu i totonu o se ulo.+
4 I lenā taimi, latou te alalaga atu ai iā Ieova mo se fesoasoani, ae e lē tali mai o ia iā i latou.+ E ʻaloese foʻi ona fofoga mai iā i latou i lenā taimi,+ auā ua leaga a latou mea e fai.+
5 “O le fetalaiga lenei a Ieova e faatatau i perofeta o ē ua faasesē i loʻu nuu,+ ua ū o latou nifo+ ma valaau atu, ‘Ua filemu!’+ ae pe a lē tuu atu e se isi se mea i o latou gutu, ona latou sauni* lea e tau ma ia,+
6 ‘O lea, e lē oo iā te outou le pō+ ina ia leai ai se faaaliga;+ ae o le a oo iā te outou le pogisa, ina ia lē faia ai valovaloga faataulāitu. E goto foʻi le lā i luga o ia perofeta, ma pogisa ai le ao iā i latou.+
7 E māsiasi+ o ē e vāai i faaaliga,+ e lē fiafia foʻi o ē e faia valovaloga faataulāitu.+ E ufiufi foʻi e i latou a latou ʻavaaluga,+ o i latou uma, auā e leai se tali mai i le Atua.’”+
8 A o aʻu, ua tumu aʻu i le mana ona o le agaga o Ieova, o le faamasinotonu foʻi ma le lototele,+ ina ia taʻu atu iā Iakopo o lana fouvalega, ma Isaraelu o lana agasala.+
9 Faamolemole, ia faalogo mai i lenei mea, o outou o ulu o le aiga o Iakopo, o taʻitaʻiʻau o le aiga o Isaraelu,+ o ē e ʻinoʻino i le faamasinotonu ma o ē e faapiʻopiʻo i mea saʻo uma;+
10 o ē ua atiaʻe ma le faamasaatoto Siona ma atiaʻe ma le amiolētonu Ierusalema.+
11 Ua faia e ona taʻitaʻi le faamasinoga i faiga faaalatua,+ ua aʻoaʻo atu foʻi ona ositaulaga mo se totogi,+ ua faia valovaloga faataulāitu e ona perofeta ona o le mananaʻo i tupe;+ ae ua latou faalagolago pea iā Ieova ma faapea ane: “Pe e lē o faatasi ea Ieova ma i tatou?+ E lē oo mai iā i tatou se mala.”+
12 O lea, o le a suatia Siona e pei o se fanua ona o outou, e avea foʻi Ierusalema ma faaputuga o mea ua faatafuna,+ ma e avea le mauga o le fale e pei o mea maualuluga o se togāvao.
Faamatalaga Pito i Lalo
^ Po o le “faapaia.”
