Mika 5:1-15
5 “O lenei taimi ua e selei ai iā te oe lava,+ le tama fafine e, o le aai ua osofaʻia; ua siʻomia i tatou e le fili.+ E latou te tā i le tootoo le alafau o le faamasino o Isaraelu.+
2 “O oe, Peteleema Efarata e,+ o lē e sili ona itiiti ma e lē aofia i le faitau afe o Iuta,+ e tupu mai iā te oe+ mo aʻu o lē o le a avea ma pule i Isaraelu,+ o lē e mai anamuā lona tupuaga, e mai i aso lava ua leva.+
3 “O lea, o le a tuua i latou+ e le Atua seʻia oo i le taimi e fanau mai ai e ia o lē o le a fanau mai.+ O le a toe foʻi isi o ona uso uma i le fanauga a Isaraelu.
4 “O le a tulaʻi o ia ma leoleo le lafu i le malosi o Ieova,+ i le mamalu silisili o le suafa o Ieova lona Atua.+ E latou te nonofo pea,+ auā o ia aso o le a sili ai o ia e oo atu i tuluʻiga o le lalolagi.+
5 E aumaia e ia le filemu.+ A o le Asuria, pe a sau o ia i lo tatou laueleele ma pe a solia e ia o tatou maota,+ o le a tatou faatulaʻi aʻe foʻi ni leoleo mamoe se toʻafitu e faasagatau atu iā te ia, ioe, o ni alo alii se toʻavalu mai i tagata.
6 E latou te faaoo le faasalaga i le atunuu o Asuria i le pelu,+ ma le atunuu o Nimarota+ i ona faitotoʻa. E na te laveaʻi iā i tatou mai i le Asuria,+ pe a sau o ia i lo tatou atunuu ma ia solia ai o tatou laueleele.
7 “O i latou e totoe o Iakopo,+ e pei i latou o le sau mai iā Ieova i totonu o nuu e tele,+ e pei foʻi o timuga tetele i luga o vao,+ o le mea e lē faamoemoe i tagata pe e faatalitali i atalii o tagata.+
8 O le a iai foʻi o ē e totoe o Iakopo i nuu, i totonu o nuu e tele, e pei o se leona i manu o le togāvao, e pei foʻi o se leona taanoa i lafu mamoe, pe a alu ane, e na te solia i lalo ma saeia;+ ae e leai sē e laveaʻiina.
9 E maualuga lou lima i luga o ē e tetee iā te oe,+ ma o le a fasiotia ou fili uma.”+
10 “O lenā aso,” ua fetalai mai ai Ieova, “ou te fasimatea au solofanua ma ou faaleagaina au kariota.+
11 Ou te faaumatia foʻi aai o lou atunuu, ma lepeti i lalo au mea malupuipuia uma.+
12 Ou te faaumatia togafiti faataulāitu mai i lou lima, e lē toe iai foʻi iā te oe o ni ē e faia faiga faaagaga.+
13 Ou te faatamaʻia au faatusa ua tā ma ou poutū paia, ma o le a e lē toe ifo ai i galuega a ou lima.+
14 Ou te liaʻiina ou pou paia+ o iā te oe ma faatamaʻia ou aai.
15 I loʻu ita ma loʻu ita tele, ou te faaoo atu ai le tauimasui i atunuu ua lē usiusitaʻi mai.”+
