Neemia 4:1-23
4 Ina ua faalogo Sanepalata+ ua matou toe fausia le pā, ona ita tele+ ai lea o ia ma ua lotoa lava, ua ia faaauau pea ona faifai+ mai i tagata o Iutaia.
2 Ona fai atu lea o ia i luma o ona uso+ ma le ʻautau a Samaria, ua faapea atu: “O ā ea mea ua faia e nei tagata Iutaia vaivai? Pe e latou te manatu ea e mafai ona latou faia o lenei galuega tele? Pe e latou te fai taulaga ea?+ Pe e uma ea i le aso e tasi? Pe e latou te toe faafoʻisia mai maa mai i faupuʻega otaota+ ua susunuina?”
3 Sa iai Tovia+ le Amoni+ faatasi ma ia, ua ia faapea mai: “Afai e alu aʻe se alope*+ i le mea o loo latou fausiaina, e na te soloia lava i lalo la latou pā maa.”
4 Lo matou Atua e, ia e faafofoga+ mai auā ua inosia i matou;+ ma ia e toe faafoʻi atu i luga o o latou ulu a latou faifaiga,+ ma ia avea i latou ma ē ua faoa a latou mea i le nuu e ave faapagota i ai.
5 Aua neʻi ufiufia la latou mea sesē+ ma la latou agasala i ou luma. Aua neʻi soloiesea, auā ua latou faatigā i ē o loo faia le pā.
6 Na matou fausia pea le pā, ua fesootaʻi le pā atoa e oo i le ʻafa o lona maualuga, ma ua loto pea i ai le nuu e faia le galuega.+
7 Ae ina ua faalogo i ai Sanepalata,+ o Tovia,+ o tagata Arapi,+ o sa Amonī,+ ma tagata Asetota,+ o loo agaʻigaʻi pea i luma le toe faaleleia o pā o Ierusalema, auā ua amata ona puluti mea na pūpū, ona latou matuā feita ai lea.
8 Ona taupulepule+ faatasi lea o i latou uma ina ia ō mai e siitaua iā Ierusalema, ma faavevesi mai iā i matou.
9 Ae na matou tatalo+ i lo matou Atua ona o i latou, ma tofia se leoleo e leoleoina i matou mai iā i latou i le ao ma le pō.
10 Ona fai mai lea o Iuta: “Ua vaivai o ē e ave avega,+ ma ua matuā tele le otaota+ e tatau ona lafoaʻia; ua lē mafai ai ona matou fausia le pā.”
11 Ua faapea ane foʻi o matou fili: “E latou te lē iloa+ ma e latou te lē o vaaia foʻi, seʻia oo ina matou ō atu i totonu iā i latou, e matou te fasiotia lava i latou ma taofia le galuega.”
12 Pe a ō mai foʻi tagata Iutaia o ē na nonofo e lata ane iā i latou, e latou te faapea mai faasefulu iā i matou: “O itu uma lava e tou te toe foʻi mai ai iā i matou, e osofaʻia ai e fili outou.”
13 Ona ou tofia lea o tane e leoleo i tua o le pā i fanua maulalo ma taalaelae, ma ou tofia le nuu e tusa ma o latou aiga e leoleo ma a latou pelu,+ o a latou tao,+ ma a latou ʻaufana.
14 Ina ua ou iloaina lo latou fefefe, ona ou tulaʻi loa lea ma faapea atu i tamālii,+ o sui pule,+ ma le nuu uma: “Aua tou te fefefe+ ona o i latou. Ia outou manatuaina pea Ieova o le Atua sili+ ma mataʻutia;+ ma ia outou tau mo o outou uso,+ o outou atalii, o outou afafine, o a outou avā, ma o outou fale.”
15 Ina ua faalogo o matou fili ua matou iloaina, ua faalēaogā e le Atua moni a latou taupulega,+ ma ua matou toe foʻi uma lava i le pā, e taʻitasi i lana galuega,
16 ioe, na amata mai i lenā aso ona galulue ma le filigā le ʻafa o oʻu tauleleʻa+ i le galuega, a o le isi ʻafa o i latou sa uu a latou tao, o talipupuni, o ʻaufana, ma ofutau uʻamea;+ ma sa tutū perenise+ i tua o tagata Iutaia e lagolagoina i latou.
17 A o ē na faia le pā ma i latou na tauaveina le avega a ē e ave avega, na taʻitasi le tagata ma galue ma le filigā i le galuega i lona lima e tasi, a o le isi lima+ na uu ai le auupega.+
18 Ua taʻitasi ē na faia le pā ma fusi lana pelu i lona puimanava+ a o faia le galuega;+ na iai foʻi lē e ilia le pū+ i oʻu tafatafa.
19 Ona ou fai atu lea i tamālii, o sui pule,+ ma le nuu uma: “O le galuega e matuā telē lava, ma ua salalau solo i tatou i luga o le pā e vavamamao le tasi mai i le isi.
20 O le mea e tou te faalogo ai i le leo o le pū, o i inā e tou te faapotopoto faatasi mai ai iā i matou. O le a tau lo tatou Atua mo i tatou.”+
21 A o matou galulue ma le filigā i le galuega, ua uu e le isi ʻafa o i latou a latou tao, e amata mai i le tafa o ata seʻia oo ina aliali mai fetu.
22 Ona ou fai atu lea i le nuu i lenā taimi: “Ia taʻitasi le tagata ma nonofo i le pō ma lana auauna i totonu o Ierusalema,+ ia avea i latou ma leoleo mo i tatou i le pō, ae galulue i le ao.”
23 A o aʻu,+ o oʻu uso,+ o aʻu auauna,+ ma leoleo+ o ē na iai i oʻu tua, e leʻi aveesea o matou ofu, na taʻitasi le tagata ma uu lana auupega+ i lona lima taumatau.
Faamatalaga Pito i Lalo
^ O le “alope” o se ituaiga o taʻifau. O le upu Peretania o le fox.
