Numera 11:1-35
11 Ua muimui tagata i fofoga o Ieova talu ai ua latou manatu ua leaga tele lo latou tulaga. Ina ua faafofoga Ieova i lea mea,+ ona matuā toʻasā ai lea o ia, ua alu ifo le afi mai iā Ieova iā i latou, ma ua faaumatia ai nisi o i latou i le faatausiʻusiʻuga o le togālauapi.+
2 Ua fetagisi atu le nuu iā Mose, ona ia faatoga atu lea iā Ieova+ ma ua pē ai le afi.
3 Ua faaigoa lea nofoaga o Tapara,+ ona o le afi mai iā Ieova lea sa matuā mumū iā i latou.
4 Ua faaalia e tagata ese e toʻatele+ ua iā i latou le mananaʻo tele i meaʻai,+ ua amata ai foʻi ona toe fetagisi le fanauga a Isaraelu ma faapea ane: “O ai ea e na te aumaia ni aano o manu e tatou te aai ai?+
5 O le mea lea e tatou te manatua ai pea iʻa e masani ona tatou aai fua ai i Aikupito,+ o kukama, o meleni, o liki, o aniani ma kaliki!
6 Ae o lenei ua mamago o tatou tino. Ua na o le manai ua vāai i ai o tatou mata.”+
7 O le manai+ foʻi ua pei o le fatu o le koriano,+ ma e foliga e pei o le petala.*+
8 Ua taape solo tagata e aoina le manai,+ ona latou olo lea i maaolo, pe tuʻi i se tanoa, ua saka foʻi i le ulo,+ pe faia ai ni falaoa lapotopoto, ma o lona tofo e pei o se falaoa suamalie ua iai sina suāuu.+
9 Pe a paʻū ifo le sau i luga o le mea ua tutū ai faleʻie i le pō, ona paʻū ifo ai foʻi lea o le manai.+
10 Ua lagona e Mose le fetagisi o tagata i o latou aiga, e taʻitasi le tane i le faitotoʻa o lona faleʻie. Ona matuā toʻasā+ ai lea o Ieova, ma o se mea leaga lea i le manatu o Mose.+
11 Ona fai atu lea o Mose iā Ieova: “Aiseā ua e faatupu ai ia mea leaga i lau auauna, aiseā foʻi ua ou lē maua ai lou finagalo malie, i lou tuuina mai o nei tagata uma ua avea o se avega mamafa iā te aʻu?+
12 Po o aʻu ea o le tinā o nei tagata uma? Po o aʻu ea na fanaua i latou, ua e faapea mai ai iā te aʻu, ‘Ia e ave i latou i lou fatafata,+ e pei ona ave e le tausitama o se pepe,’+ seʻia oo atu i le laueleele na e tautō ai i o latou augātamā?+
13 O fea ou te alu e aumai ai ni aano o manu e avatu i ia tagata? Ua latou fetagisi mai iā te aʻu ma faapea mai, ‘Ia e aumai aano o manu matou te aai ai!’
14 Ou te lē lavā ona tauave nei tagata uma e na o aʻu, auā ua mamafa tele mo aʻu.+
15 Afai o le mea lea ua e faia iā te aʻu, faamolemole ia e fasiotia lava aʻu,+ afai ua e finagalo malie mai iā te aʻu, ia aua neʻi oʻu vaai i loʻu puapuaga.”
16 Ona fetalai mai lea o Ieova iā Mose: “Ia faapotopoto mai mo aʻu ni toeaina se toʻafitu sefulu o Isaraelu,+ o ē ua e iloa o i latou o toeaina ma leoleo o le nuu,+ ia e avatu i latou i le faleʻie o le feiloaʻiga, ma e ao ona latou tutū ai i inā faatasi ma oe.
17 Ou te alu ifo+ ma talanoa ma oe;+ ou te ave se vaega o le agaga+ ua iā te oe ma tuu i luga o i latou, ma o le a latou fesoasoani iā te oe i le tauaveina o le avega mamafa ona o le nuu, ina ia aua neʻi e tauaveina toʻatasi.+
18 Ia e fai atu i le nuu, ‘Ia faapaiaina outou lava mo a taeao,+ ma o le a outou aai i aano o manu, ona ua outou fetagisi i fofoga o Ieova+ e faapea: “O ai na te aumaia aano o manu matou te aai ai, auā sa manuia lava i matou i Aikupito?”+ O lea e avatu ai e Ieova iā te outou aano o manu ma outou aai ai lava.+
19 E lē na o le tasi le aso e tou te aai ai, pe lua aso, pe lima aso, pe sefulu aso pe lua sefulu aso,
20 ae e mo le masina atoa, seʻia oo ina sau i fafo mai i o outou pūisu ma ua outou matuā ʻinoʻino i ai,+ talu ai ua outou teena Ieova o lē ua faatasi ma outou, ma ua outou fetagisi i ona luma e faapea: “Aiseā na matou ō mai ai fua mai i Aikupito?”’”+
21 Ona faapea atu lea o Mose: “O tagata ua iā te aʻu e toʻaono selau afe tane+ ia e savavali, a o oe ua e fetalai mai, ‘O le aano o manu ou te avatu iā te i latou, e latou te aai ai mo le masina atoa’!
22 Po o le a fasia ea lafu mamoe ma lafu povi mo i latou, ina ia lava ai i latou?+ Pe fagota mai ea iʻa uma o le sami mo i latou, ina ia lava ai i latou?”
23 Ua fetalai mai Ieova iā Mose: “Po ua faapuupuuina ea le lima o Ieova?+ O lenei o le a e iloa lava pe taunuu le mea ua ou fai atu ai iā te oe pe leai.”+
24 Mulimuli ane, ona ulufafo lea o Mose ma taʻu atu i le nuu fetalaiga a Ieova. Ua ia faapotopoto foʻi o tane e toʻafitu sefulu mai i toeaina o le nuu, ma faatonuina i latou e tutū faataamilo i le faleʻie.+
25 Ona afio ifo lea o Ieova i le ao+ ma fetalai mai iā te ia,+ ua ave se vaega o le agaga+ ua i ona luga ma tuu i luga o toeaina taʻitoʻatasi e toʻafitu sefulu. Ua alu ifo ai le agaga i o latou luga, ona latou gaoioi lea e pei o ni perofeta; ae na gata ai i lea aso ona latou faia faapea.+
26 Ua nonofo pea tane e toʻalua i le togālauapi. O le igoa o le tasi o Elitato a o le isi o Metato. Ua oo foʻi iā i laʻua le agaga, auā ua tusia foʻi o la igoa ae e leʻi ō atu i laʻua i le faleʻie. Ona la gaoioi ai lea e pei o ni perofeta i le togālauapi.
27 Ua tamoʻe atu se tauleʻaleʻa ma taʻu atu iā Mose e faapea: “Ua gaoioi Elitato ma Metato e pei o ni perofeta i le togālauapi!”
28 Ua tali mai Iosua le atalii o Nuno, o le auauna+ a Mose mai i lona talavou e faapea: “Loʻu alii e Mose, ia e taofi iā i laʻua!”+
29 A ua fai atu Mose iā te ia: “Po ua e popole neʻi afāina ai aʻu?* E leai, ou te manaʻo ia avea tagata uma o Ieova ma perofeta, auā e tuuina mai e Ieova lona agaga iā i latou!”+
30 Mulimuli ane, ua alu atu Mose i le togālauapi, o ia faatasi ma toeaina o Isaraelu.
31 Ua agi mai le matagi+ mai iā Ieova ma ua aumai ai salu* mai i le sami,+ ua taape solo i luga aʻe o le togālauapi e tusa ma le malaga o le aso e tasi i le tasi itu, ma e tusa ma le malaga o le aso e tasi i le isi itu, ua siʻomia atoa ai le togālauapi, ma ua felelei ai manulele e tusa ma le lua kupita le maualuga aʻe i le fogāeleele.
32 Ona ō atu lea o tagata i lenā aso atoa, ma le pō atoa ma le aso ua sosoo ai, ma ao mai salu. O lē e aupito i laʻitiiti ana mea na ao e sefulu somera,+ ma ua latou folasia ia mea mo i latou lava i le togālauapi atoa.
33 Ua iai le aano o manu i le va o o latou nifo+ ae e leʻi lamuina, ua matuā toʻasā+ Ieova i le nuu, ma ua taia e Ieova le nuu i se faaumatiaga tele.+
34 Ona faaigoa ai lea o lea mea o Kiperota-atava,+ auā o i inā na latou tanu ai tagata o ē sa soona mananaʻo i meaʻai.+
35 Ua malaga ese le nuu mai i Kiperota-atava ma ō atu i Haserota, ma ua nonofo ai i Haserota.+
Faamatalaga Pito i Lalo
^ O se pulu manogi e maua mai i laau iti.
^ I le gagana Eperu, “Po ua e fuā ona o aʻu?”
^ O se tamaʻi manulele peti e tusa ma le 18 senitimita (7 inisi) lona umi. E lelei mo le tausami.
